Zechariah 13

Ilonggo (Maayong Balita nga Biblia (2012))

← Chapter 12 Jump to: Chapter 14 →

1Ang Ginoo sang mga hangaway nagsiling, “Kon mag-abot ina nga tion, ang isa ka tuboran pagabuksan sa pagtinlo sang mga kaliwat ni David kag sang mga pumoluyo sang Jerusalem gikan sa ila sala kag pagsimba sa diosdios.

2Sa sadto nga tion kuhaon ko ang mga ngalan sang mga diosdios sa duta, kag wala na sing may magadumdom sa ila. Kuhaon ko man ang bisan sin-o nga magpakapropeta, kag kuhaon ko ang handom sa pagsimba sa mga diosdios.

3Kag dayon ang bisan sin-o nga magpadayon sa paghambal subong sang isa ka propeta, ang iya kaugalingon nga amay kag iloy magasiling sa iya nga dapat sia mapatay, tungod kay nagasiling sia nga nagahambal sia sang pulong sang Ginoo, pero nagabinutig sia. Kon maghambal sia subong sang isa ka propeta, ang iya kaugalingon nga amay kag iloy magabuno sa iya tubtob mapatay sia.

4Kon mag-abot ina nga tion wala sing propeta nga magapabugal sang iya mga palanan-awon, ukon magbayu sang iya sang propeta, ukon magpakunokuno nga isa sia ka propeta.

5Sa baylo, magasiling sia, ‘Indi ako propeta. Mangungoma ako. Nagpanguma ako sa bug-os ko nga kabuhi.’

6Kon may mamangkot sa iya, ‘Ano bala inang mga pilas sa imo dughan?’ magasabat sia, ‘Napilas ako sa balay sang akon amigo.’”

7Ang Ginoo sang mga hangaway nagasiling, “Magmata, espada, kag salakaya ang manugbantay sang karnero nga nagaalagad sa akon! Patya sia, kag ang mga karnero magaalaplaag. Salakayon ko ang akon mga tawo,

8kag sa bug-os nga duta ang duha sang tatlo ka bahin sang mga tawo magakalamatay.

9Kag akon tilawan ang ikatlo nga bahin nga mabilin, kag purawon ko sila subong sang pagpuraw sang pilak sa kalayo. Tilawan ko sila pareho sang pagtilaw sang bulawan. Dayon magapangamuyo sila sa akon kag ako magasabat sa ila. Magasiling ako sa ila, ‘Kamo akon mga tawo,’ kag magasabat sila, ‘Ikaw amo ang amon Dios.’”

← Chapter 12 Jump to: Chapter 14 →