Zechariah 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Sa isa naman ka palanan-awon ang Ginoo nagpakita sa akon sang Pinakamataas nga Pari nga si Josue nga nagatindog sa atubang sang anghel sang Ginoo. Kag didto sa tupad ni Josue nagatindog si Satanas, nga handa sa pagsumbong sa iya.

2Ang anghel sang Ginoo nagsiling kay Satanas, “Kabay nga ang Ginoo magkondenar sa imo, Satanas. Kabay nga ang Ginoo nga nagahigugma sa Jerusalem magkondenar sa imo. Ini nga tawo kaangay sang gatong nga ginkuha sa kalayo.”

3Si Josue nagatindog didto nga mahigko ang bayu.

4Ang anghel nagsiling sa iya langitnon nga mga suloguon, “Ubaha ninyo ang iya mga bayu nga mahigko.” Dayon nagsiling sia kay Josue, “Ginkuha ko ang imo mga sala, kag hatagan ko ikaw sing bag-o nga mga bayu nga inugsuksok.”

5Ginsugo niya ang mga suloguon sa pagbutang sing matinlo nga turban sa ulo ni Josue. Gintuman nila ini, kag ginpasuksokan nila sia sing mga bayu, samtang nagatindog didto ang anghel sang Ginoo.

6Dayon ang anghel nagsugid kay Josue nga

7ang Ginoo sang mga hangaway nagsiling: “Kon tumanon mo ang akon mga kasugoan kag himuon ang mga katungdanan nga ginhatag ko sa imo, ti, magadumala ka sang akon Templo kag sang mga pasiyuhan sa Templo kag pamatian ko ang imo mga pangamuyo, subong nga ginpamatian ko ang mga pangamuyo sang mga anghel nga yara sa akon atubang.

8Gani, Josue, ikaw nga amo ang Pinakamataas nga Pari, magpamati ka, kag pamati man kamo, mga kapareho nga pari ni Josue, kamo ang tanda sang maayo nga palaabuton: dalhon ko diri ang akon alagad nga ginatawag, Ang Sanga!

9Ginabutang ko sa atubang ni Josue ang isa ka bato nga may pito ka nawong. Itigib ko ang akon inugsulat sa sini, kag sa sulod sang isa ka adlaw kuhaon ko ang sala sini nga duta.

10Kon mag-abot ina nga adlaw, ang tagsatagsa magaagda sang iya kaingod sa pagtambong kag sa pag-agom sang paghidait kag kalinong sa palibot sang inyo mga talamnan sang ubas kag mga kahoy nga higera.”

← Chapter 2 Jump to: Chapter 4 →