Zechariah 4

Ilonggo (Maayong Balita nga Biblia (2012))

← Chapter 3 Jump to: Chapter 5 →

1Ang anghel nga nagpakighambal sa akon nag-abot liwat kag ginpukaw niya ako subong abi nga daw natulogan ako.

2Ginpamangkot niya ako, “Ano bala ang makita mo?” Nagsabat ako, “Isa ka kandelirohan nga bulawan. Sa ibabaw may isa ka yahong nga bulotangan sang lana. Sa kandelirohan may pito ka mga lampara. Ang tagsa ka lampara may lugar para sa pito ka mga pabilo.

3May duha ka mga kahoy nga olivo sa tupad sang kandelirohan, isa sa tagsa ka kilid sini.”

4Gani ginpamangkot ko ang anghel, “Ano bala ang buot silingon sini?”

5Ginpamangkot niya ako, “Wala ka bala makahibalo?” Nagsabat ako, “Wala ako makahibalo.”

6Ginsingganan ako sang anghel nga ihatag ini nga mensahe kay Zorobabel halin sa Ginoo: “Magamadinalag-on ka, indi paagi sa mga hangaway, ukon sa imo kaugalingon nga kusog, kundi paagi sa akon Espiritu.

7Ang dalagku nga mga kasablagan nga daw mga bukid makuha sa atubang mo. Patindugon mo liwat ang Templo kag samtang ginapahamtang mo ang katapusan nga bato sa iya lugar ang mga tawo magasilinggit, ‘Katahom! Katahom!’”

8May isa pa gid ka mensahe nga nag-abot sa akon halin sa Ginoo.

9Nagsiling sia, “Si Zorobabel nagpahamtang sang sadsaran, kag tapuson niya ang Templo. Kon mahanabo ini, ang akon mga tawo magakilala nga ginpadala ko ikaw sa ila.

10Ang anghel nagsiling sa akon, “Ang pito ka mga lampara amo ang pito ka mga mata sang Ginoo nga makakita sang bug-os nga kalibutan.” Ginluyahan sila kay diutay lang ang nahimo. Pero makita nila si Zorobabel nga nagapadayon sa pagpatindog sang Templo, kag magakalipay sila.”

11Dayon nagpamangkot ako sa iya, “Ano ang kahulogan sang duha ka mga kahoy nga olivo sa duha ka kilid sang kandelirohan?

12Kag ano ang kahulogan sang duha ka mga sanga sang olivo sa tupad sang duha ka tubo nga bulawan nga ginaagyan sang lana sang olivo?”

13Ginpamangkot niya ako, “Wala ka bala makahibalo?” Nagsabat ako, “Wala ako makahibalo.”

14Dayon nagsiling sia, “Amo ini ang duha ka mga tawo nga ginpili kag ginhaplas sang Dios sa pag-alagad sa iya, ang Ginoo sang bug-os nga duta.”

← Chapter 3 Jump to: Chapter 5 →