2 Corinthians 10

Ilonggo (Ang Biblia (1982))

← Chapter 9 Jump to: Chapter 11 →

1Ako, si Pablo, nagalaygay sa inyo, bangud sa pagkamapinaubuson kag pagkalolo ni Cristo—ako nga mapainubuson sa atubangan ninyo, apang maisug sa inyo kon malayo!—

2nagapakilooy ako sa inyo nga kon yara ako indi ako magpakita sing kaisug nga may pagsalig nga ginahunahuna ko sa pagkasidla batok sa iban nga nagahunahuna sa amon subong nga daw nagagawi kami sono sa unud.

3Kay bisan nagakabuhi kami sa kalibutan wala kami nagapakig-away sing kalibutanon nga pag-away,

4kay ang mga hinganiban sang amon pagpakig-away indi kalibutanon, kondi may diosnon nga gahum sa paglumpag sang mga pamakud.

5Kami nagalumpag sang mga pagbais kag sang tagsa ka bugalon nga kaulangan batok sa pagkilala nahanungud sa Dios, kag nagabihag sang tagsa ka hunahuna sa pagtuman kay Cristo,

6nga handa sa pagsilot sang tanan nga pagkadimatinumanon, kon ang inyo pagkamatinumanon mahimpit.

7Toloka ang sa atubang sang inyo mga mata. Kon ang bisan sin-o nagasalig nga sia iya ni Cristo, magpatugsiling sia sini liwat sa iya kaugalingon nga subong nga sia iya ni Cristo, amo man kami.

8Kay bisan magpabugal ako sing daw labi nahanungud sang amon pagbulut-an, nga ginhatag sang Ginoo sa pagpalig-on sa inyo kag indi sa paglumpag sa inyo, indi ako mahuy-an.

9Indi ako nga daw nagapahog sa inyo paagi sa akon mga sulat.

10Kay nagasiling sila, “Ang iya mga sulat maunud kag gamhanan, apang ang iya tindug maluya, kag ang iya pagpamolong walay pulus.”

11Ang amo nga katawohan maghangup nga ang amon ginasiling paagi sa sulat kon sa luwas, amon ginabuhat kon nagaatubang.

12Indi nga kami nagapangahas sa pag-isip ukon sa pagpaangay sang amon kaugalingon upud sa iban sa ila nga nagapakamaayo sang ila kaugalingon. Apang kon sila nagatakus sang ila kaugalingon sing silahanon, kag nagapaangay sang ila kaugalingon sing silahanon, mga walay paghangup sila.

13Apang kami indi magpabugal labaw sa latid, kondi kami indi maglabaw sa mga latid nga ginbahin sang Dios sa amon, sa paglambut bisan sa inyo.

14Kay wala kami nagapanglakbang, subong nga daw wala kami makalambut sa inyo; kami una mag-abut sa inyo nga may maayong balita ni Cristo.

15Kami wala nagapabugal labaw sa latid, sa pinangabudlayan sang iban nga mga tawo; apang nagalaum kami nga sa nagatubo ang inyo pagtoo, padakuon gid ang amon palangabudlayan sa tunga ninyo,

16agud nga makawali kami sang maayong balita sa mga duta sa unhan ninyo, nga walay bugal nahanungud sa buhat nga nahimo sa iban nga palangabudlayan.

17“Ang nagapabugal, magpabugal nahanungud sa Ginoo.”

18Kay indi ang tawo nga nagapakamaayo sang iya kaugalingon amo ang ginabaton, kondi ang tawo nga ginapakamaayo sang Ginoo.

← Chapter 9 Jump to: Chapter 11 →