2 Corinthians 6

Ilonggo (Ang Biblia (1982))

← Chapter 5 Jump to: Chapter 7 →

1Sa nagapangabudlay kaupud niya, niyan, nagapakilooy kami nga dili ninyo pagbatonon sa walay pulus ang bugay sang Dios.

2Kay nagasiling sia, “Sa tion nga nahamut-an ginpamatian ko ikaw, kag sa adlaw sang kaluwasan gintabangan ko ikaw.” Yari karon, karon amo ang tion nga nahamut-an; yari karon, karon amo ang adlaw sang kaluwasan.

3Wala kami nagahatag sing kahigayonan sa kasandad sa bisan kay sin-o dalanon, agud nga ang amon pagpanghikot indi pagsawayon,

4apang sa tagsa ka butang nagapakilala kami sang amon kaugalingon subong nga mga manug-alagad sang Dios: paagi sa dakung pagbatas, sa mga kapipit-an, sa mga kabudlayan, sa mga kasakitan,

5sa mga lapdus, sa mga pagbilanggo, sa mga kagubut, sa mga pagpangabudlay, sa mga pagpulaw, sa mga kagutum;

6sa pagkaputli, sa pagkilala, sa pagpailub, sa kalolo, sa Espiritu Santo, sa gugma nga walay kabutigan,

7sa polong sang kamatooran, sa gahum sang Dios; sa hinganib sang pagkamatarung sa too kag sa wala;

8sa himaya kag kahuluy-an, sa malaut kag maayo nga kabantugan. Ginakabig kami subong nga mga malimbongon, apang mga maminatud-on;

9subong nga wala makilal-i, apang nakilala sing maayo; subong nga nagakapatay, kag yari karon nagakabuhi kami; subong nga ginsilotan, kag wala mapatay;

10subong nga masinulub-on, apang nagakalipay sa gihapon, subong nga imol, apang nagapamanggad sa madamu; subong nga walay bisan ano, apang nagaangkon sang tanan nga butang.

11Ang amon baba nagabuka nga sa inyo, O mga taga-Corinto; nagadaku ang amon tagiposoon.

12Wala kamo ginapioti sa amon, kondi ginapiotan kamo sa inyo kaugalingon nga gugma.

13Karon subong nga balus—nagapamolong ako subong nga sa mga anak—magdaku man ang inyo mga tagiposoon.

14Dili kamo magpagota sing linibagon upud sa mga dimatinoohon. Kay ano bala ang pag-updanay sang pagkamatarung kag kalautan? Ukon ano bala ang paghiambit sang kapawa sa kadudulman?

15Ano bala ang pag-ugyon ni Cristo kay Belial? Ukon ano bala ang kalabtanan sang matinoohon sa dimatinoohon?

16Ano bala ang pagsinanto sang templo sang Dios sa mga diosdios? Kay kita amo ang templo sang Dios nga buhi; sono sa ginsiling sang Dios, “Magapuyo ako sa ila kag magalakat ako sa tunga nila, kag ako mangin-ila Dios, kag sila mangin-akon katawohan.

17Busa gowa kamo sa tunga nila, kag magpain kamo gikan sa ila, nagasiling ang Ginoo, kag dili kamo magtandug sang dimatinlo nga butang; niyan batonon ko kamo,

18kag mangin-inyo Amay ako, kag kamo mangin-akon mga anak nga lalaki kag mga anak nga babayi, nagasiling ang Ginoong Makaako.”

← Chapter 5 Jump to: Chapter 7 →