2 Corinthians 12

Ilonggo (Ang Biblia (1982))

← Chapter 11 Jump to: Chapter 13 →

1Kinahanglan ako magpabugal; walay kapuslanan ini, apang magapadayon ako sa mga palanan-awon kag mga bugna sang Ginoo.

2Nakilala ko ang isa ka tawo kay Cristo, nga sang napulog apat na ka tuig nga nagligad ginsabnit tubtub sa ikatlong langit—kon sa lawas ukon sa gowa sang lawas wala ako makahibalo, ang Dios nakahibalo.

3Kag nakilala ko nga ang among tawo ginsabnit pakadto sa Paraiso—kon sa lawas ukon sa gowa sang lawas wala ako makahibalo, ang Dios nakahibalo—

4kag nakabati sia sing mga polong nga dimamitlang, nga indi tugut sa tawo ang pagmitlang.

5Tungud sa amo nga tawo magapabugal ako, apang tungud sa akon kaugalingon indi ako magpabugal, luwas sang akon mga kaluyahon.

6Kay kon buut ako magpabugal, indi ako manginbuangbuang, kay magapamolong ako sang kamatooran. Apang nagadumili ako, basi kon ang bisan sin-o nga tawo mag-isip sa akon sing labaw sa ginatan-aw niya sa akon ukon ginapamatian sa akon.

7Kag sa pagpugung sa akon sa pagpakataas sing labi bangud sang bugana nga mga bugna, ginhatagan ako sing ungon sa unud, isa ka manugbalita ni Satanas, sa pagpintas sa akon, sa pagpugung sa akon sa pagpakataas sing labi.

8Nahanungud sini ginpakilooy ko sing makatlo sa Ginoo, nga ini magbiya sa akon;

9apang nagsiling sia sa akon, “Ang akon bugay tuman sa imo, kay ang akon gahum ginahimpit sa kaluyahon.” Sa labing daku nga kalipay magapabugal ako sa akon mga kaluyahon, agud nga ang gahum ni Cristo magpabilin sa akon.

10Gani nagakalipay ako sa mga kaluyahon, sa mga pasipala, sa mga kaiwat, sa mga paghingabut, sa mga kasakitan, tungud kay Cristo; kay kon maluya ako, niyan gamhanan ako.

11Nanginbuangbuang ako! Ginpilit ninyo ako sini, kay dapat ako kuntani pagkilalahon ninyo. Kay bisan sa ano indi ako kubus sa lutaw gid nga mga pinadala, bisan ako indi ano man.

12Sa pagkamatuud ang mga tanda sang pinadala ginpanghikot sa tunga ninyo sa bug-os nga pagpailub, paagi sa mga tanda kag mga katingalahan kag gamhanan nga mga buhat.

13Kay sa ano bala nga bagay nga kubus kamo sa iban nga mga iglesia, luwas nga ako gid indi lulan sa inyo? Patawara ako ninyo sining sayup!

14Yari karon ikatlo na ini nga handa ako sa pagkara sa inyo. Kag indi ako manginlulan sa inyo, kay wala ko ginapangita ang inyo pilak kondi ang inyo mga kaugalingon; kay ang mga anak indi dapat magtipon tungud sa mga ginikanan, kondi ang mga ginikanan tungud sa mga anak.

15Magakalipay gid ako sa paghinguyang kag nga paghinguyangon tungud sa inyo mga kalag. Kon ginahigugma ko kamo sing labi pa, ginahigugma bala ako sing kubus?

16Apang batonon ta nga indi ako lulan sa inyo. Maabtik ako kag nadakpan ko kamo sa limbong, nagasiling kamo.

17Nakalakbang bala ako sa inyo paagi sa bisan kay sin-o sa ila nga napadala ko sa inyo?

18Ginlaygayan ko si Tito, kag ginpadala ko ang utud upud sa iya. Naglakbang bala si Tito sa inyo? Wala bala kami maggawi sa amo man nga espiritu? Wala bala kami maglakat sa amo nga mga tikang?

19Nagahunahuna kamo sa sining bug-os nga tion nga nagaapin kami sang amon kaugalingon sa inyo? Sa atubangan sang Dios nagapamolong kami kay Cristo, kag ang tanan amo sa pagpalig-on sa inyo, mga hinigugma.

20Kay nahadluk ako basi kon sa pag-abut ko masapwan kamo nga indi subong sang buut ko, kag masapwan ako ninyo nga indi subong sang buut ninyo; basi kon may pagpinuyas, kahisa, kasingkal, pagbinahinbahin, paglibak, pagbutangbutang, paghabok, kag kagamo.

21Nahadluk ako basi kon liwat sa pag-abut ko paubuson ako sang akon Dios sa atubangan ninyo, kag magkasubo ako tungud sa madamu nga nagpakasala tubtub karon kag wala maghinulsul sang kahigkoan, pagkamakihilawason, kag kaulag nga ginhimo nila.

← Chapter 11 Jump to: Chapter 13 →