2 Corinthians 2

Ilonggo (Ang Biblia (1982))

← Chapter 1 Jump to: Chapter 3 →

1Kay gintapat ko sa akon painoino nga indi ako magduaw sa inyo liwat nga may kasubo.

2Kay kon ginapasubo ko kamo, sin-o bala ang nagalipay sa akon kondi ang ginpasubo ko?

3Kag ginsulat ko ini gid nga butang, agud sa akon pag-abut indi ako pagpasuboon nila nga amo kuntani ang maglipay sa akon, kay may pagsalig ako sa inyo tanan, nga ang akon kalipay amo ang kalipay ninyo tanan.

4Kay gikan sa madamu nga kapipit-an kag kasakitan sang tagiposoon nagsulat ako sa inyo nga may madamu nga luha, indi nga kamo pagpasuboon kondi nga mahibaloan ninyo ang akon bugana nga gugma sa inyo.

5Apang kon ang bisan sin-o nakapasubo, nakapasubo sia indi sa akon, kondi sa pila ka bahin—indi sa pagpatama—sa inyo tanan.

6Tuman na sa iya ini nga silot nga ginhatag sang kalabanan;

7gani sa baylo pagpatawaron ninyo sia kag paglipayon, basi kon malumus sia sa iya lakas nga kasubo.

8Gani ginapakilooy ko sa inyo nga lig-onon ninyo liwat ang inyo gugma sa iya.

9Kay sa sining katuyoan man nagsulat ako, agud nga mahibaloan ko ang kamatooran sa inyo kon masinolondon kamo sa tanan nga butang.

10Sa iya nga nagapatawad kamo sing bisan ano, ako nagapatawad man. Ang napatawad ko man, kon nakapatawad ako sang bisan ano, napatawad ko tungud sa inyo sa atubangan ni Cristo,

11agud nga indi kita madaug ni Satanas; kay nahibaloan ta ang iya mga pahito.

12Sang pag-abut ko sa Troas sa pagwali sang maayong balita ni Cristo, nabuksan sa akon ang ganhaan sa Ginoo;

13apang walay katawhayan ang akon painoino bangud nga wala ko makita didto si Tito nga akon utud. Gani nagpaalam ako sa ila kag naglakat pa Macedonia.

14Apang salamat sa Dios, nga nagapangolo sa aton gihapon sa pagdaug nga kay Cristo, kag nagapahayag paagi sa aton sang kaamyon sang pagkilala sa iya sa tagsa ka duug.

15Kay kahumut kita ni Cristo nga sa Dios sa mga nagakaluwas kag sa mga nagakawala,

16sa isa kaamyon gikan sa kamatayon pa kamatayon, sa iban kaamyon gikan sa kabuhi pa kabuhi. Sin-o ang tuman bala tungud sining mga butang?

17Kay indi kita, subong sang madamu, nga nagasimbog sang polong sang Dios; kondi nga subong nga maminatud-on, kag subong nga iya sang Dios, sa atubangan sang Dios nagahambal kita kaupud kay Cristo.

← Chapter 1 Jump to: Chapter 3 →