2 Corinthians 8

Ilonggo (Ang Biblia (1982))

← Chapter 7 Jump to: Chapter 9 →

1Buut kami nga mahibal-an ninyo, mga kauturan, ang nahanungud sa bugay sang Dios nga nahatag sa mga iglesia sa Macedonia,

2kay sa dakung pagtilaw sa kapipit-an, ang kabugana sang ila kalipay kag ila madalum nga kaimolon nagbugana nga sa kamanggaran sang ila kaalwan.

3Kay sono sa ila ikasarang, nagasaksi ako, kag labaw pa sa ila ikasarang, naghatag sila sing kinabubut-on,

4nga nagapangabay sa amon nga may dakung pakilooy nahanungud sining bugay sa pagpakig-ambit sa pag-alagad sa mga balaan —

5kag ini, indi subong sang napaabut namon, kondi sa nahauna ginhatag nila ang ila kaugalingon sa Ginoo kag sa amon bangud sa kabubut-on sang Dios.

6Sa bagay nga ginlaygayan namon si Tito nga subong nga nakapamuno na sia sa amo, tapuson niya sa inyo ining bugay man.

7Karon subong nga nagabugana kamo sa tagsa ka butang—sa pagtoo, sa pagpamolong, sa pagkilala, sa bug-os nga pagkahanuut, kag sa inyo gugma sa amon—tatapa nga magbugana kamo sa sining bugay man.

8Nagapamolong ako indi subong nga sogo, kondi subong nga nagatilaw sang kabunayag man sang inyo gugma paagi sa pagkahanuut sang iban.

9Kay nahibaloan ninyo ang bugay sang aton Ginoong Jesu-Cristo, nga bisan manggaranon sia, nangin-imol sia tungud sa inyo, agud nga paagi sa iya pagkaimol manginmanggaranon kamo.

10Kag sa sini nagahatag ako sang akon panghunahuna: labing maayo sa inyo karon nga tapuson ang napamunoan ninyo sang tuig nga nagligad indi lamang sa paghimo kondi sa pagbuut,

11agud nga ang inyo pagkahanda sa pagbuut sini matupohan sang inyo pagtapus sini sono sa inyo ikasarang.

12Kay kon ang pagkahanda yara, ginakahamut-an ini sono sa yara sa tawo, indi sono sa wala sa iya.

13Kay ginasiling ko ini indi agud nga ang iban mahapusan kag kamo mapiotan,

14kondi sa pag-alangay sa karon nga tion ang inyo kabugana bulig sa kinawad-on nila, agud nga ang ila kabugana man manginbulig sa inyo kinawad-on, agud nga may pag-alangay.

15Subong sang nasulat na, “Ang nagtipon sing madamu wala maglabi, kag ang nagtipon sing diotay wala makulangi.”

16Apang salamat sa Dios nga nagabutang sa tagiposoon ni Tito sing amo man nga pagkabalaka tungud sa inyo.

17Kay matuud ginbaton niya ang amon laygay, apang sanglit nga sia tama kaukud nagkadto sia sa inyo sing kinaugalingon.

18Kag ginpadala namon upud sa iya ang utud nga ang pagdayaw sa iya tungud sang pagwali sang maayong balita nagalapnag sa tanan nga iglesia;

19kag indi lamang amo ina, kondi sia man ginpili sang mga iglesia sa pagpanlakatan upud sa amon sa sining bugay nga ginapanghikot namon tungud sa himaya sang Ginoo kag sa pagpakita sang amon maayong kabubut-on.

20Ginatuyo namon nga walay bisan sin-o magbasol sa amon sa sining kabuganaan nga ginapanagtag namon,

21kay nagahunahuna kami sang mga butang nga dungganon indi lamang sa atubangan sang Ginoo kondi man sa atubangan sang mga tawo.

22Kag ginpadala namon upud sa ila ang aton utud nga sa makadamu natilawan namon nga maukud sa madamu nga mga butang, apang karon labi pa gid kaukud bangud sang daku niya nga pagsalig sa inyo.

23Kon nahanungud kay Tito, kaupud ko sia kag masigkamanugpangabudlay ayon sa inyo; kag nahanungud sa aton mga kauturan, mga pinadala sila sang mga iglesia, himaya sila ni Cristo.

24Gani ipakita ninyo sa ila, sa atubangan sang mga iglesia, ang kamatooran sang inyo gugma kag ang pagpabugal namon nahanungud sa inyo.

← Chapter 7 Jump to: Chapter 9 →