2 Corinthians 9

Ilonggo (Ang Biblia (1982))

← Chapter 8 Jump to: Chapter 10 →

1Karon nahanungud sa dolot tungud sa mga balaan walay kinahanglan nga magsulat ako sa inyo,

2kay nakilala ko ang inyo pagkahanda, nga nahanungud sa inyo ginapabugal ko ini sa mga taga-Macedonia, nga ang Acaya nakahanda na sang tuig nga nagligad; kag ang inyo kakugi nakapukaw sang kalabanan sa ila.

3Apang napadala ko ang mga kauturan agud nga ang amon pagpabugal nahanungud sa inyo indi manginwalay pulus sa sining bagay, agud nga mahanda kamo, subong sang ginsiling ko;

4basi kon may mag-upud sa akon sang taga-Macedonia kag masapwan kamo nga indi handa, kami—sa walay pagmitlang sa inyo— mahuy-an tungud sang daku nga pagsalig.

5Gani ginhunahuna ko nga kinahanglan ang pagpangabay sa mga kauturan nga mag-una sila dira sa inyo, kag ihanda nga daan ang inyo ginsaad anay nga amut, agud nga ang amo mahanda subong nga bunayag nga hatag kag indi subong nga linugus.

6Nagasiling ako sini: ang nagasab-ug sing halushalus magaani man sing halus-halus, kag ang nagasab-ug sing bugana magaani man sing bugana.

7Maghimo ang tagsa ka tawo sono sa gintuyo niya sa iya tagiposoon, indi nga nagaduhaduha ukon sa pagpilit, kay ang Dios nagahigugma sa manughatag nga malipayon.

8Kag ang Dios sarang sa pagpabugana sang tanan nga bugay sa inyo, agud nga kamo sa gihapon may tuman sang tagsa ka butang kag magtigana sing bugana sa tagsa ka maayo nga buhat.

9Subong sang nasulat na, “Nagapanagtag sia, nagapanghatag sia sa mga imol; ang iya pagkamatarung nagapadayon sa gihapon.”

10Ang nagahatag sing binhi sa manugsab-ug kag tinapay nga kalan-on magahatag kag magapaukad sang inyo binhi nga inugsab-ug kag magadugang sang mga bunga sang inyo pagkamatarung.

11Kamo pamanggaron sa tagsa ka butang sa bug-os nga pagkaalwan, nga nagahimo paagi sa amon sing pagpasalamat sa Dios;

12kay ang pagpanghikot sining pag-alagdan indi lamang nagapuno sang mga kakulangan sang mga balaan kondi nagabunga man sa madamu nga pagpasalamat sa Dios.

13Paagi sa pagtilaw sining pag-alagdan, himayaon ninyo ang Dios paagi sa pagkamatinumanon ninyo sa pagkilala sang maayong balita ni Cristo, kag paagi sa pagkaalwan sang inyo amut sa ila kag sa tanan nga iban;

14samtang nagahandum sila kag nagapangamuyo tungud sa inyo, bangud sang lakas nga bugay sang Dios sa inyo.

15Salamat sa Dios tungud sang iya dimamitlang nga dolot!

← Chapter 8 Jump to: Chapter 10 →