2 Corinthians 5

Ilonggo (Ang Biblia (1982))

← Chapter 4 Jump to: Chapter 6 →

1Kay nahibaloan ta nga kon ang aton napuy-an nga dutan-on nga layanglayang mabungkag, may aton kita nga tinukud gikan sa Dios, isa ka balay nga wala paghimoa sang mga kamut, nga nagapadayon sa mga langit.

2Sa pagkamatuud sa sini nagaugayong kita, nga nagahandum nga pagsukluban sang aton puluy-an nga gikan sa langit,

3agud sa pagsuklub sini indi kita masapwan nga hublas.

4Kay matuud kita nga yari sining layanglayang nagaugayong, nga nabug-atan; indi nga buut kita mahublasan, kondi nga buut kita masukluban, agud nga ang mamalatyon malamon sang kabuhi.

5Ang nag-aman sa aton sa sini gid nga butang amo ang Dios, nga naghatag sa aton sang Espiritu subong nga kalig-onan.

6Gani nagasalig kita gihapon; nakahibalo kita nga sa nagapuyo kita sa lawas wala kita sa Ginoo,

7kay nagalakat kita sa pagtoo, indi sa panolok.

8Nagasalig kita, kag hinonoo buut kita mawala sa lawas kag magpuyo upud sa Ginoo.

9Gani man ginahimo ta nga aton tuyo, nga bisan nagapuyo kita sa lawas ukon wala, nga manginkalahamut-an sa iya.

10Kay kinahanglan kita tanan ipahayag sa atubangan sang lingkoran nga hukmanan ni Cristo, agud nga ang tagsatagsa magbaton sing maayo ukon malain, sono sa iya nahimo sa lawas.

11Busa, sa nakahibalo sang kahadluk sa Ginoo, ginabuyok namon ang mga tawo; apang nahayag kami sa Dios, kag nagalaum ako nga nahayag man kami sa inyo mga kaisipan.

12Wala kami liwat nagapakamaayo sang amon kaugalingon sa inyo kondi nagahatag sa inyo sing kahigayonan sa pagpabugal tungud sa amon, agud nga may isabat kamo sa mga nagapabugal sa kahimtangan sang tawo kag indi sa iya tagiposoon.

13Kay kon kami buangbuang, ina ayon sa Dios; kon mga but-anan kami, ina ayon sa inyo.

14Kay ang gugma ni Cristo nagagahum sa amon, kay ginakilala namon nga ang isa napatay tungud sa tanan; busa ang tanan napatay.

15Kag napatay sia tungud sa tanan, agud nga ang mga nagakabuhi indi na magkabuhi nga sa ila kaugalingon kondi nga sa iya nga tungud sa ila napatay kag nabanhaw.

16Busa kutub karon wala kami nagakilala sa tawo sono sa unud; bisan si Cristo nakilala namon sono sa unud, walay sapayan karon wala na kami nagakilala sa iya sing subong.

17Busa, kon ang bisan sin-o nga tawo yara kay Cristo, bag-o sia nga tinuga; ang daan nagtaliwan, yari karon, ang tanan nanginbag-o.

18Ini tanan gikan sa Dios, nga nagpasag-uli sa aton sa iya kaugalingon paagi kay Cristo kag naghatag sa aton sang pagpanghikot sang pagpasag-uli;

19nga amo, nga ang Dios yara kay Cristo nga nagapasag-uli sang kalibutan sa iya kaugalingon, nga wala nagaisip sa ila sang ila mga paglapas, kag nakatugyan sa amon sang polong sang pagpasag-uli.

20Gani mga embajador kami tungud kay Cristo, subong nga ang Dios nagapakilooy paagi sa amon. Nagapakilooy kami sa inyo tungud kay Cristo, magpasag-uli kamo sa Dios.

21Sia nga wala makakilala sing sala ginhimo niya nga nanginsala tungud sa aton, agud nga kita manginpagkamatarung sang Dios sa iya.

← Chapter 4 Jump to: Chapter 6 →