Hebrews 11

Ilonggo (Ang Biblia (1982))

← Chapter 10 Jump to: Chapter 12 →

1Karon ang pagtoo amo ang kasigurohan sang mga butang nga ginalauman, ang pagpamatuud sang mga butang nga indi makita.

2Kay sa sini ang mga tigulang nakaagum sing diosnon nga pagkahamuut.

3Bangud sa pagtoo nahangup ta nga nahimo ang kalibutan paagi sa polong sang Dios, sa bagay nga ang makita nahimo gikan sa mga butang nga dimakita.

4Bangud sa pagtoo si Abel nagdolot sa Dios sing maayo pa nga halad sang kay Cain, nga paagi sini nakaagum sia sing pagkahamuut subong nga matarung, ang Dios nagasaksi sa pagbaton sang iya mga dolot; sia napatay, apang paagi sa iya pagtoo sia nagahambal pa.

5Bangud sa pagtoo si Enoc ginliton agud nga indi sia mapatay; kag wala sia makita, bangud nga ginliton sia sang Dios. Karon sa wala pa sia maliton napamatud-an sia nga nakapahamuut sa Dios.

6Kag sa walay pagtoo indi mahimo ang pagpahamuut sa iya. Kay ang nagapalapit sa Dios kinahanglan magtoo nga amo sia kag nga sia manugbalus sa mga nagapangita sa iya.

7Bangud sa pagtoo si Noe, sang ginpaandaman sang Dios nahanungud sa mga butang nga wala pa makita, nagtuman kag nagtukud sing arca sa pagluwas sang iya panimalay; paagi sini gintagudilian niya ang kalibutan kag nanginmanunubli sang pagkamatarung nga nagaabut paagi sa pagtoo.

8Bangud sa pagtoo si Abraham nagtuman sang gintawag sia sa pagkadto sa duug nga iya batonon nga panublion; kag naglakat sia, nga wala makahibalo kon diin sia makadto.

9Bangud sa pagtoo nanginmanlulugayaw sia sa duta sang saad, subong sa duta nga indi iya, nga nagapuyo sa mga layanglayang upud kay Isaac kag kay Jacob, ang mga masigkamanunubli niya sang amo nga saad.

10Kay ginpangita niya ang banwa nga may mga sadsaran, nga ang manunukud kag manugbuhat sini amo ang Dios.

11Bangud sa pagtoo bisan si Sara gid nakabaton sing gahum sa pagpanamkon, bisan sang nagtaliwan na sia sa panuigon, sanglit gin-isip niya nga matutum ang nagsaad.

12Busa gikan sa isa, kag sia nga daw patay na, natawo ang mga kaliwatan nga subong kadamu sang mga bitoon sang langit kag subong sang mga balas nga dimaisip sa baybayon.

13Ini sila tanan napatay sa pagtoo, nga wala makabaton sang ginsaad, kondi nga nakakita sini kag nakaabiabi sini gikan sa malayo, kag nakatu-ad nga mga dumoloong kag mga umalagi sila sa duta.

14Kay ang mga nagasiling sang amo nagapahayag nga nagapangita sila sing duta nga ila kaugalingon.

15Kon matuud nga ginpanumdum nila yadtong duta nga ila ginhalinan, may kahigayonan sila kuntani sa pagbalik.

16Apang karon, nagahandum sila sang duta nga maayo pa, nga amo, ang langitnon. Busa ang Dios wala mahuya nga pagtawgon nga ila Dios, kay nakaaman sia sa ila sing banwa.

17Bangud sa pagtoo si Abraham, sang gintilawan, naghalad kay Isaac, kag sia nga nakabaton sang mga saad handa sa paghalad sang iya bugtong nga anak,

18nga nahanungud sa iya ginsiling, “Sa kay Isaac paghingalanan ang imo mga kaliwatan.”

19Sia nagkabig nga ang Dios makasarang sa pagbanhaw sang mga tawo bisan gikan sa mga patay; gani, sa halimbawa, ginbaton niya sia liwat.

20Bangud sa pagtoo ginpakamaayo ni Isaac si Jacob kag si Esau nahanungud sa mga kabulahanan nga palaabuton.

21Bangud sa pagtoo si Jacob, sang tagumatayon sia, nagpakamaayo sang tagsa sang mga anak ni Jose, nga nagasimba nga nagadunguk sa puno sang iya sungkud.

22Bangud sa pagtoo si Jose, sang malapit na ang katapusan sang iya kabuhi, naghinambit sang pagtaliwan sang mga anak ni Israel kag naghatag sing mga sogo nahanungud sang iya mga tul-an.

23Bangud sa pagtoo si Moises, sang natawo, gintago sang iya mga ginikanan sing tatlo ka bulan, kay nakita nila nga maayoayo sia nga bata; kag wala sila mahadluk sa sogo sang hari.

24Bangud sa pagtoo si Moises, sang daku na sia, nagdumili nga pagtawgon nga anak sang babaying anak ni Faraon,

25nga nagapasulabi sa pag-ambit sang pagpintas kaupud sa katawohan sang Dios sang sa pag-agum sang umalagi nga mga pagpangalipay sang sala.

26Ginkabig niya ang pagtamay nga gin-antus tungud sa Cristo nga daku pa nga manggad sang sa mga bahandi sa Egipto kay nagtan-aw sia sa balus.

27Bangud sa pagtoo ginbayaan niya ang Egipto, nga wala nagakahadluk sa kaakig sang hari; kay nagbatas sia subong nga nagatan-aw sa iya nga dimakita.

28Bangud sa pagtoo ginhiwat niya ang Pascua kag ginwisik ang dugo, agud nga ang Manuglaglag sang mga panganay indi magtandug sa ila.

29Bangud sa pagtoo nagtabok ang katawohan sa Dagat nga Mapula subong sang sa mamala nga duta; apang ang mga Egiptohanon, sang nagpangahas sila sa paghimo sing amo, nagkalumus.

30Bangud sa pagtoo nagkapukan ang mga kuta sang Jerico sa tapus nga nalibut ini sing pito ka adlaw.

31Bangud sa pagtoo si Rahab nga makihilawason wala mawala upud sa mga dimasinolondon, kay ginbaton niya nga may paghidait ang mga lampitaw.

32Kag ano pa bala ang isiling ko? Kay kulangon ako sing tion kon magsugid ako nahanungud kay Gideon, kay Barac, kay Samson, kay Jefte, kay David kag kay Samuel kag sang mga manalagna—

33nga paagi sa pagtoo nakadaug sing mga ginharian, nakahimo sing pagkamatarung, nakaagum sing mga saad, nakapakium sang mga baba sang mga leon,

34nakapalong sang gahum sang kalayo, nakalikaw sa sulab sang espada, gikan sa kaluyahon nagbakud, naggamhanan sa inaway, nakapapalagyo sang mga hangaway sang mga dumoloong.

35Ang mga babayi nakabaton sang ila mga patay paagi sa pagkabanhaw. Ang iban ginsakit, nga wala magbaton sang paghilway, agud nga mabanhaw sila sa maayo pa nga kabuhi.

36Ang iban nag-antus sang pag-uligyat kag paghampak, kag bisan pa sang mga gapus kag pagbilanggo.

37Ginbato sila, ginpang-utud sa lagari, ginpamatay sa espada; nagdalangdalang sila nga napanaptan sang mga panit sang mga carnero kag mga kanding, nga nawad-an, ginpapiotan, ginpintasan—

38nga sa ila indi takus ang kalibutan—nagadalangdalang sa mga kamingawan kag kabukiran, kag sa mga lungib kag mga gikab sang duta.

39Kag ini tanan, bisan napamatud-an sing maayo bangud sa ila pagtoo, wala makabaton sang ginsaad,

40sanglit ang Dios may natigana nga maayo pa tungud sa aton, nga sa wala kita indi sila maghimpit.

← Chapter 10 Jump to: Chapter 12 →

Recommended Reading

Commentary Hebrews Commentaries → Devotional Hebrews Devotional Guide → Get This Bible 1982 Study Bible →