Hebrews 5

Ilonggo (Ang Biblia (1982))

← Chapter 4 Jump to: Chapter 6 →

1Kay ang tagsa ka pinakamataas nga sacerdote nga ginpili sa mga tawo gintangdo tungud sa mga tawo sa kaangtanan sa Dios, agud nga maghalad sia sing mga dolot kag mga halad tungud sa mga sala.

2Sia makapaumud sa mga dimaalam kag nagtalang, bangud nga sia man ginalikupan sang kaluyahon.

3Bangud sini dapat sia maghalad tungud sa iya kaugalingon nga mga sala subong man sa ila sang katawohan.

4Kag walay tawo nga nagakuha nga sa iya kaugalingon sang dungug, kondi nga gintawag sia sang Dios, subong kay Aaron.

5Subong man si Cristo wala magbayaw sang iya kaugalingon nga paghimoon nga pinakamataas nga sacerdote, kondi gintangdoan sang nagpamolong sa iya, “Ikaw ang Anak ko, karon nga adlaw nangin-anak ko ikaw”;

6subong nga nagasiling man sia sa iban nga bahin, “Ikaw sacerdote sa gihapon, sa paagi ni Melquisedec.”

7Sa mga adlaw sang iya pagkaunud, si Jesus nagpangamuyo kag nag-ampo, nga may mabaskug nga pagsinggit kag mga luha, sa iya nga makaluwas sa iya sa kamatayon kag ginpamatian sia tungud sang iya kahadluk nga diosnon.

8Bisan sia Anak, nakatoon sia sang pagkamasinolondon paagi sa iya gin-antus;

9kag sang nahimpit sia nanginginhalinan sang kaluwasan nga dayon sa tanan nga nagatuman sa iya,

10nga gintangdoan sang Dios nga pinakamataas nga sacerdote sono sa paagi ni Melquisedec.

11Nahanungud sini may madamu kita nga isiling nga maiwat isaysay, sanglit makuli kamo sa pagpamati.

12Kay dapat na kamo kuntani magmanunudlo sa sining tion, apang nagakinahanglan kamo sing isa nga magtudlo sa inyo liwat sang nahauna nga mga pagtolon-an sang polong sang Dios. Nagakinahanglan kamo sang gatas, indi sang mabaskug nga pagkaon;

13kay ang tagsatagsa nga nagakabuhi sa gatas disampaton sa polong sang pagkamatarung, kay bata sia.

14Apang ang pagkaon nga mabaskug naigo sa mga hamtong, sa mga nahanas sa ila painoino sa pagpain sang maayo gikan sa malaut.

← Chapter 4 Jump to: Chapter 6 →