Hebrews 8

Ilonggo (Ang Biblia (1982))

← Chapter 7 Jump to: Chapter 9 →

1Karon ang alibutud sang ginasiling naton amo ini: may amo kita nga pinakamataas nga sacerdote, nga nagalingkod sa too sang trono sang Pagkahalangdon sa langit,

2alagad sa santuario kag sa matuud nga kayangkayang nga ginpatindug indi sang tawo kondi sang Ginoo.

3Kay ang tagsa ka pinakamataas nga sacerdote ginatangdoan sa paghalad sing mga dolot kag mga halad; gani kinahanglan nga ining sacerdote man may iya nga inughalad.

4Karon kon sia yari sa duta, indi sia manginsacerdote nga mas-a, kay may mga sacerdote nga nagahalad sang mga dolot sono sa kasogoan.

5Sila nagaalagad sang hinuwad kag landong sang langitnon nga santuario; kay sang si Moises manugpatindug sang kayangkayang, sia gintudloan sang Dios, nga nagasiling, “Tatapa nga himoon mo ang tanan nga butang sono sa huwaran nga ginpakita sa imo sa bukid.”

6Apang karon, nakaagum si Cristo sing isa ka pag-alagdan nga labing maayo pa sang sa daan subong nga ang katipan nga sia amo ang manugpatunga maayo pa, sanglit ini ginhimo sa maayo pa nga mga saad.

7Kay kon yadtong nahaunang katipan walay sayup, wala na kuntani sing kinahanglan sang ikaduha.

8Kay nakakita sia sing sayup sa ila sang nagasiling sia: “Ang mga adlaw magaabut, nagasiling ang Ginoo, nga magahimo ako sing bag-ong katipan kaupud sa panimalay sang Israel kag kaupud sa panimalay sang Juda;

9indi kaangay sa katipan nga ginhimo ko sa ila mga ginikanan sang adlaw nga ginkaptan ko sila sa kamut sa pagpagowa sa ila gikan sa duta sang Egipto; kay wala sila magpadayon sa akon katipan, kag gani wala ako magsapak sa ila, nagasiling ang Ginoo.

10Ini amo ang katipan nga akon himoon kaupud sa panimalay sang Israel sa tapus sadtong mga adlaw, nagasiling ang Ginoo: Ibutang ko ang akon mga kasogoan sa ila mga hunahuna, kag sa ila mga tagiposoon isulat ko sila, kag mangin-Dios ako nila, kag sila manginkatawohan nakon.

11Kag indi na sila ang tagsatagsa magtudlo sa iya kasimanwa ukon ang tagsatagsa sa iya utud, nga nagasiling, ‘Kilalaha ang Ginoo,’ kay ang tanan magakilala sa akon, kutub sa labing kubus tubtub sa labing daku sa ila.

12Kay magamaloloy-on ako sa ila mga kalautan kag ang ila mga sala indi ko na pag dumdumon.”

13Sa iya pagbungat sang bag-ong katipan ginpakadaan niya ang nahauna. Apang ang nagadaan kag nagakatigulang malapit sa pagkawala.

← Chapter 7 Jump to: Chapter 9 →