Hebrews 6

Ilonggo (Ang Biblia (1982))

← Chapter 5 Jump to: Chapter 7 →

1Busa bayaan ta ang nahauna nga mga pagtolon-an ni Cristo kag magpadayon kita sa pagkahamtong, nga indi magpahamtang liwat sing sadsaran sang paghinulsul gikan sa patay nga mga buhat kag sa pagtoo ayon sa Dios,

2nga may pagpanudlo sang mga pagpanghugas, sang pagtakdung sang mga kamut, sang pagkabanhaw, kag sang paghukom nga dayon.

3Kag ini himoon ta kon itugut sang Dios.

4Kay indi mahimo ang pagbag-o liwat sa paghinulsul sa ila nga naiwagan anay, nga nakatilaw sang hiyas nga langitnon, kag nangin-umalambit sang Espiritu Santo,

5kag nakatilaw sang pagkaayo sang polong sang Dios kag sang mga gahum sang katuigan nga palaabuton,

6kon sila niyan magbiya, sanglit ginalansang nila sa cruz sa ila kaugalingon ang Anak sang Dios kag ginapakahuy-an sia sing dayag.

7Kay ang duta nga nagasuyup sang ulan nga sa masunsun nagakaholog sa iya, kag nagapatubas sing mga hilamon nga kapuslanan sa ila nga tungud sa ila ginpanguma man ini, nagaagum sing pagpakamaayo sa Dios.

8Apang kon nagapatubo ini sing mga talongon kag mga ragiwriw, ginasikway ini kag malapit sa pagkamalaut; ang katapusan sini amo nga sonogon.

9Bisan nagahambal kami sing subong, apang nahanungud sa inyo, mga hinigugma, ginpatalupangud kami sing maayo pa nga mga butang nga iya sang kaluwasan.

10Kay ang Dios indi dimatarung nga malimot sang inyo binuhatan kag sang gugma nga ginpakita ninyo tungud sa iya ngalan nga nag-alagad kamo sa mga balaan, kag nagaalagad pa.

11Kag ginahandum namon nga ang tagsa sa inyo magpakita sang amo man nga kaukud sa pagtigayon sang kabug-osan sang paglaum tubtub sa katapusan,

12agud nga indi kamo magmahinay, kondi mga manug-ilog sa ila nga paagi sa pagtoo kag pagbatas nagapanubli sang mga saad.

13Kay ang Dios sang paghimo niya sing saad kay Abraham, sanglit nga wala sia sing bisan sin-o nga sumpaan nga daku pa, nagsumpa sia sa iya kaugalingon,

14nga nagasiling, “Matuud gid pakamaayohon ko ikaw kag pabuaron ko ikaw.”

15Kag sa amo si Abraham sang nakabatas sing mapailubon, nakaagum sang saad.

16Ang mga tawo sa pagkamatuud nagasumpa sa daku pa sa ila, kag sa tagsa ka kasuayon nila ang sumpa katapusan sa pagpalig-on.

17Gani sang buut ang Dios magpakita sing maathag pa sa mga manunubli sang saad sang pagkadimabalhinon sang iya katuyoan, nagpatunga sia nga may sumpa,

18agud nga paagi sa duha ka butang nga dimabalhinon, nga sa sini indi mahimo nga ang Dios magbutig, kita nga nagpalagyo sa pagdangup may mapag-on nga pagpabaskug sa pagdakup sang paglaum nga ginabutang sa aton atubang.

19Aton ini subong nga sinipit sang kalag nga malig-on kag dimationg, isa ka paglaum nga nagasulud tubtub sa sulud sang kumbung,

20diin si Jesus nag-una tungud sa aton, nga nanginpinakamataas nga sacerdote sa gihapon sa paagi ni Melquisedec.

← Chapter 5 Jump to: Chapter 7 →