Hebrews 7

Ilonggo (Ang Biblia (1982))

← Chapter 6 Jump to: Chapter 8 →

1Kay ining Melquisedec, hari sang Salem, sacerdote sang Dios nga labing mataas, nagsugata kay Abraham nga nagapauli gikan sa pagpamatay sang mga hari kag nagpakamaayo sa iya;

2kag sa iya si Abraham naghatag sing ikapulo nga bahin sang tanan nga butang. Sia amo ang nahauna, kon sayoron ang iya ngalan, hari sang pagkamatarung, kag niyan sia hari man sang Salem, kon sayoron, hari sang paghidait.

3Sia walay amay ukon iloy ukon kaliwatan, kag walay pamuno sang mga adlaw ukon katapusan sang kabuhi, kondi kaangay sa Anak sang Dios nagapadayon sia nga sacerdote sa gihapon.

4Tan-awa kon daw ano kadaku sia! Si Abraham nga patriarca naghatag sa iya sing ikapulo sang mga inagaw.

5Kag yadtong mga kaliwatan ni Levi nga nagabaton sang pagkasacerdote may sogo sa pagkuha sang mga ikapulo sa katawohan sono sa kasogoan, kon sayoron, sa ila mga kauturan, bisan ini sila naggikan man sa kay Abraham.

6Apang ining tawo nga wala sa ila kaliwatan nagbaton sing mga ikapulo kay Abraham kag nagpakamaayo sa iya nga nakabaton sang mga saad.

7Indi masuay nga ang kubus ginapakamaayo sang mataas pa.

8Diri ang mga tawo nga mamalatyon nagabaton sing mga ikapulo; didto, paagi sa isa nga ginasaksihan nga nagakabuhi sia.

9Sarang masiling nga si Levi iya nga nagabaton sing ikapulo, nagbayad sing mga ikapulo paagi kay Abraham,

10kay wala pa sia matawo sa iya ulang sang ginsugata sia ni Melquisedec.

11Karon kon ang kahimpitan sarang madangat paagi sa pagkasacerdote nga Levinhon (kay sa idalum sini nakabaton ang katawohan sang kasogoan), ano pa bala ang kinahanglan nga magtindug ang isa ka sacerdote sa paagi ni Melquisedec, sa baylo nga sa paagi ni Aaron?

12Kay kon may pagbaylo sa pagkasacerdote, may kinahanglan ang pagbaylo man sa kasogoan.

13Kay sia nga nahanungud sa iya ginasiling ining mga butang nagikan sa isa ka kabikahan, nga gikan sini wala gid sing nakaalagad sa halaran.

14Kay maathag nga ang aton Ginoo nagikan sa Juda, kag nahanungud sinang kabikahan walay ginpamolong si Moises nahanungud sa mga sacerdote.

15Ini maathag pa gid kon sa kaangay ni Melquisedec may nagabangon nga isa pa ka sacerdote,

16nga nanginsacerdote, indi sono sa kinahanglanon sang kasogoan nahanungud sa lawasnon nga kaliwatan kondi sa gahum sang kabuhi nga dimalaglag.

17Kay ginasaksi nahanungud sa iya, “Ikaw ang sacerdote sa gihapon, sono sa paagi ni Melquisedec.”

18Sa isa ka bagay, may pagwala sang una nga sogo bangud sang pagkaluya kag pagkawalay kapuslanan sini

19(kay walay bisan ano nga ginhimpit sang kasogoan); sa isa ka bagay, ang maayo pa nga paglaum ginapasulud, nga paagi sini nagapalapit kita sa Dios.

20Kag ini wala makulangi sing pagsumpa.

21Ang mga nanginsacerdote anay nagkuha sang ila palangakoan sa walay sumpa, apang ini sia ginsilingan nga may sumpa, “Nagsumpa ang Ginoo kag indi sia magbalhin sang iya painoino, ‘Ikaw sacerdote sa gihapon.’”

22Ini nagahimo kay Jesus nga kalig-onan sang maayo pa nga katipan.

23Ang nahaunang mga sacerdote madamu, bangud nasablagan sila sang kamatayon sa pagpadayon sa palangakoan;

24apang sia nagapadayon sa iya pagkasacerdote bangud nga nagakabuhi sia sing dayon.

25Gani sarang sia sa tanan nga tion sa pagluwas sa ila nga nagapalapit sa Dios paagi sa iya, sanglit nagakabuhi sia gihapon sa pagpatunga nga nagatabang sa ila.

26Kay nagakaigo nga may amo kita nga pinakamataas nga sacerdote, balaan, walay kasawayan, walay dagta, nagapahain sa mga makasasala, ginbayaw nga mataas pa sa mga langit.

27Wala sia sing kinahanglan, subong sadtong pinakamataas nga mga sacerdote, sa paghalad adlawadlaw, sa nahauna tungud sa iya kaugalingon nga mga sala kag ugaling tungud sa mga sala sang katawohan; ini ginhimo niya sing makaisa gid lang sang paghalad niya sang iya kaugalingon.

28Sa pagkamatuud, ang kasogoan nagatangdo sang mga tawo sa ila kaluyahon subong nga mga sacerdote, apang ang polong sang sumpa, nga nag-abut sing olihi pa sa kasogoan, nagatangdo sang Anak nga nahimpit sing dayon.

← Chapter 6 Jump to: Chapter 8 →