Hebrews 3

Ilonggo (Ang Biblia (1982))

← Chapter 2 Jump to: Chapter 4 →

1Busa, balaan nga mga kauturan, mga umalambit sang langitnon nga pagtawag, talupangda ninyo ang pinadala kag pinakamataas nga sacerdote sang aton pagtu-ad, si Jesus.

2Matutum sia sa Dios nga nagtangdo sa iya, subong nga si Moises man matutum sa panimalay sang Dios.

3Walay sapayan ginpakatakus si Jesus nga labaw pa sing himaya kay Moises subong nga ang nagtukud sang balay dungganon pa sa balay.

4(Kay ang tagsa ka balay ginatukud sang isa, apang ang nagtukud sang tanan nga butang amo ang Dios.)

5Karon si Moises matutum sa bug-os nga panimalay sang Dios subong nga manug-alagad, sa pagpamatuud sang mga butang nga ibantala sa olihi,

6apang si Cristo matutum sa panimalay sang Dios subong nga anak. Kag ang amo nga panimalay kita kon ginalig-on ta ang aton pagsalig kag paghimaya sa aton paglaum.

7Busa, subong sang ginasiling sang Espiritu Santo, “Karon nga adlaw, kon mabatian ninyo ang iya tingug,

8dili pagpatig-aha ang inyo mga tagiposoon subong sang sa pagpaakig sa akon, sa adlaw sang pagtilaw sa kamingawan,

9diin ang inyo mga ginikanan nagtilaw sa akon kag nakita nila ang akon mga binuhatan sing kap-atan ka tuig.

10Busa naakig ako sa sinang kaliwatan, kag nagsiling, ‘Nagatalang sila sa gihapon sa ila mga tagiposoon; wala nila makilala ang akon mga dalanon.’

11Subong nga nagsumpa ako sa akon kasingkal, ‘Indi gid sila makasulud sa akon kapahuwayan.’”

12Andam kamo, mga kauturan, basi kon may isa sa inyo nga may malaut nga tagiposoon sang pagkadimatinoohon, nga nagapahilayo sa inyo sa buhi nga Dios.

13Apang maglinaygayay kamo adlawadlaw, samtang nga ginatawag pa “karon nga adlaw,” agud nga wala sa inyo nga magtig-a bangud sang pagkadaya sang sala.

14Kay umalambit kita kay Cristo, kon ginahuptan ta sing malig-on ang pamuno sang aton pagsalig tubtub sa katapusan,

15samtang ginasiling ini, “Karon nga adlaw, kon mabatian ninyo ang iya tingug dili pagpatig-aha ang inyo mga tagiposoon subong sang sa pagpaakig sa akon.”

16Sin-o bala ang nakabati kag walay sapayan nagpaakig sa akon? Indi bala ang tanan nga nagbiya sang Egipto sa pangolohan ni Moises?

17Kag kay sin-o bala naakig sia sing kap-atan ka tuig? Indi bala sa mga nagpakasala, nga ang ila mga lawas napukan sa kamingawan?

18Kag kay sin-o bala nagpanumpa sia nga indi gid sila makasulud sa iya kapahuwayan, apang sa ila nga mga dimasinolondon?

19Gani nakita naton nga wala sila makasulud bangud sang pagkadimatinoohon.

← Chapter 2 Jump to: Chapter 4 →