John 15

Ilonggo (Ang Biblia (1982))

← Chapter 14 Jump to: Chapter 16 →

1“Ako ang matuud nga puno sang uvas, kag ang akon Amay amo ang mangunguma.

2Ang tagsa ka sanga sa akon nga wala nagapamunga, ginakuha niya, kag ang tagsa nga nagapamunga ginatinloan niya, agud nga magpamunga sing madamu pa.

3Kamo matinlo na bangud sang polong nga akon napamolong sa inyo.

4Magpabilin kamo sa akon, kag ako sa inyo. Subong nga ang sanga indi makapamunga sa iya kaugalingon, kon wala nagaangut sa puno, amo man kamo, kon indi kamo magpabilin sa akon.

5Ako amo ang puno sang uvas, kamo ang mga sanga. Ang nagapabilin sa akon, kag ako sa iya, sia amo ang nagapamunga sing madamu, kay luwas sa akon wala kamo sing mahimo.

6Kon ang tawo wala nagapabilin sa akon, ginapilak sia subong sang sanga kag nagakalaya; kag ang mga sanga ginatipon, ginadap-ong sa kalayo kag nagakasonog.

7Kon magpabilin kamo sa akon, kag ang akon mga polong magpabilin sa inyo, pangayo kamo sing bisan anong buut ninyo, kag himoon ini sa inyo.

8Paagi sini ginahimaya ang akon Amay, nga magpamunga kamo sing madamu, kag sa amo magpamatuud nga kamo mga gintoton-an ko.

9Subong nga ang Amay naghigugma sa akon, ako man naghigugma sa inyo; pabilin kamo sa akon gugma.

10Kon magbantay kamo sang akon mga sogo, magapabilin kamo sa akon gugma, subong nga ako nagbantay sang mga sogo sang akon Amay kag nagapabilin sa iya gugma.

11Ining mga butang napamolong ko sa inyo, agud nga ang akon kalipay manginyara sa inyo, kag ang inyo kalipay mabug-os.

12“Ini amo ang akon sogo, nga maghigugmaanay kamo subong nga ako naghigugma sa inyo.

13Walay tawo nga may gugma nga daku pa sini, nga ihatag sang isa ka tawo ang iya kabuhi tungud sa iya mga abyan.

14Kamo akon mga abyan kon nagahimo kamo sang ginsogo ko sa inyo.

15Indi na ako magtawag sa inyo nga mga ulipon, kay ang ulipon wala makahibalo sang ginahimo sang iya agalon; apang ako nagtawag sa inyo nga mga abyan, kay ang tanan nga akon nabatian sa akon Amay napakilala ko sa inyo.

16Kamo wala magpili sa akon, kondi ako nagpili sa inyo kag nagtangdo sa inyo agud nga maglakat kamo kag magpamunga kag ang inyo bunga magpadayon; agud nga bisan ano ang inyo pangayoon sa Amay sa akon ngalan, ihatag niya sa inyo.

17Ini ginasogo ko sa inyo, nga maghigugmaanay kamo.

18“Kon ang kalibutan nagadumut sa inyo, kilalaha ninyo nga ini nagdumut sa akon sing una sa inyo.

19Kon kamo iya sang kalibutan, ang kalibutan magahigugma sang iya kaugalingon; apang bangud nga kamo indi iya sang kalibutan, kondi ginpili ko kamo gikan sa kalibutan, busa ang kalibutan nagadumut sa inyo.

20Dumduma ang polong nga ginsiling ko sa inyo, ‘Ang ulipon indi daku pa sa iya agalon.’ Kon ginhingabut nila ako, hingabuton man nila kamo; kon ginbantayan nila ang akon polong, bantayan nila ang inyo man.

21Apang tanan ini himoon nila sa inyo bangud sa akon, kay wala sila makakilala sa nagpadala sa akon.

22Kon ako wala magkari kag magpamolong sa ila, wala sila kuntani sing sala; apang karon wala sila sing balibad sa ila sala.

23Ang nagadumut sa akon nagadumut sa akon Amay man.

24Kon wala ako makahimo sa tunga nila sang mga buhat nga walay iban nga nakahimo, wala sila kuntani sing sala; apang karon nakakita sila kag nagdumut sa akon kag sa akon Amay.

25Ini amo ang pagtuman sang polong nga nasulat sa ila kasogoan, ‘Gindumtan nila ako sa walay kabangdanan.’

26Apang kon magkari ang Mananabang, nga akon ipadala sa inyo gikan sa Amay, ang Espiritu sang kamatooran, nga nagagikan sa Amay, sia magasaksi sa akon;

27kag kamo man magasaksi, bangud nga nanginkaupud ko kamo kutub sa ginsuguran.

← Chapter 14 Jump to: Chapter 16 →