John 20

Ilonggo (Ang Biblia (1982))

← Chapter 19 Jump to: Chapter 21 →

1Karon sa kaagahon sang nahaunang adlaw sang semana nag-abut si Maria Magdalena sa lulubngan, sang madulum pa, kag nakita ang bato nga nakuha na sa lulubngan.

2Gani nagdalagan sia, kag nag-abut kay Simon Pedro kag sa isa ka gintoton-an, nga ginhigugma ni Jesus, kag nagsiling sa ila, “Ginkuha nila ang Ginoo sa lulubngan, kag wala namon mahibaloi kon diin nila ginpahamtang sia.”

3Niyan si Pedro naglakat kag ang isa ka gintoton-an, kag nagpakadto sila sa lulubngan.

4Nagdalagan sila nga duha sing dungan, apang nalumbaan sang isa ka gintoton-an si Pedro kag nag-abut sing una sa lulubngan;

5kag sang nagakuub kag nagalingling sa sulud, nakita niya ang mga panapton nga lino nga napahamtang didto, apang wala sia magsulud.

6Niyan si Simon Pedro nag-abut, nga nagasonod sa iya, kag nagsulud sa lulubngan; nakita niya ang mga panapton nga lino nga napahamtang,

7kag ang panyo, nga sa olo niya anay, nga wala mapahamtang kaupud sang mga panapton nga lino kondi napiod sing pahain.

8Niyan nagsulud man ang isa ka gintoton-an nga nag-abut sing una sa lulubngan, kag nakakita sia kag nagtoo;

9kay wala pa sila makahangup sang kasulatan, nga sia kinahanglan mabanhaw.

10Niyan ang mga gintoton-an nagpauli sa ila mga puluy-an.

11Apang si Maria nagtindug nga nagahibi sa gowa sang lulubngan, kag sang naghibi sia nagkuub kag naglingling sa lulubngan;

12kag nakita niya ang duha ka manugtunda nga napanaptan sing maputi, nga nagalingkod, ang isa sa olohan kag ang isa sa tiilan, sa ginpahamtangan sang lawas ni Jesus.

13Nagsiling sila sa iya, “Babayi, ngaa bala nagahibi ka?” Nagsabat sia sa ila, “Bangud nga ginkuha nila ang akon Ginoo, kag wala ako makahibalo kon diin ginpahamtang sia nila.”

14Sang nakasiling sia sini, nagliso sia kag nakita niya si Jesus nga nagatindug, apang wala sia makakilala nga si Jesus yadto.

15Si Jesus nagsiling sa iya, “Babayi, ngaa bala nagahibi ka? Sin-o ang imo ginapangita?” Sia nagsabat sa iya, nga nagahunahuna nga si Jesus amo ang manugbantay sang katamnan, “Ginoo, kon ikaw ang nagkuha sa iya, sugiri ako kon diin mo sia ginbutang, kag kuhaon ko sia.”

16Si Jesus nagsiling sa iya, “Maria.” Nagliso sia kag nagsiling sa iya sa Hebreo, “Rabboni!” (nga kon sayoron Manunudlo).

17Si Jesus nagsiling sa iya, “Dili ka magkapyut sa akon, kay wala pa ako makakayab sa Amay; apang kadto ka sa akon mga kauturan kag isiling sa ila, makayab ako sa akon Amay kag inyo Amay, sa akon Dios kag inyo Dios.”

18Si Maria Magdalena nagkadto kag nagsugid sa mga gintoton-an, “Nakita ko ang Ginoo”; kag ginsugiran niya sila nga nasiling ni Jesus ining mga butang sa iya.

19Sang kahaponon na sa sadtong adlaw, ang nahaunang adlaw sang semana, sang natakup ang mga ganhaan sa ginatiponan sang mga gintoton-an, tungud sang kahadluk sa mga Judio, si Jesus nag-abut kag nagtindug sa tunga kag nagsiling sa ila, “Ang paghidait sa inyo.”

20Sang nakasiling sia sini, ginpakita niya sa ila ang iya mga kamut kag ang iya kilid. Niyan ang mga gintoton-an nagkasadya sang nakita nila ang Ginoo.

21Si Jesus nagsiling liwat sa ila, “Ang paghidait sa inyo. Subong nga ang Amay nagpadala sa akon, ako man nagapadala sa inyo.”

22Kag sang nakasiling sia sini, ginhuypan niya sila, kag nagsiling sa ila, “Batona ninyo ang Espiritu Santo.

23Ang bisan kay sin-o mga sala patawaron ninyo, patawaron ini sa ila; ang bisan kay sin-o mga sala ginapunggan ninyo, ginapunggan sila. ”

24Karon si Tomas, isa sang napulog duha, nga gintawag Didimo, indi kaupud nila sang pag-abut ni Jesus.

25Gani ang iban nga mga gintoton-an nagsiling sa iya, “Nakita namon ang Ginoo.” Apang nagsiling sia sa ila, “Kon indi ko makita sa iya mga kamut ang agi sang mga lansang, kag mabutang ang akon tudlo sa agi sang mga lansang, kag mabutang ang akon kamut sa iya kilid, indi ako magtoo.”

26Sa tapus sang walo ka adlaw, liwat ang iya mga gintoton-an didto sa sulud sang balay, kag si Tomas kaupud nila. Natakup ang mga ganhaan, apang si Jesus nag-abut kag nagtindug sa tunga nila, kag nagsiling, “Ang paghidait sa inyo.”

27Niyan nagsiling sia kay Tomas, “Idab-ot diri ang imo tudlo, kag tan-awa ang akon mga kamut; kag idab-ot ang imo kamut, kag ibutang sa akon kilid; dili ka magmadinuhaduhaon, kondi magmatinoohon.”

28Si Tomas nagsabat sa iya, “Ginoo ko kag Dios ko!”

29Si Jesus nagsiling sa iya, “Bangud nga nakakita ka sa akon, nagtoo ka? Bulahan ang wala makakita kag walay sapayan nagatoo.”

30Karon madamu pa nga iban nga tanda nga ginhimo ni Jesus sa atubangan sang mga gintoton-an, nga wala masulat sa sining tolon-an;

31apang ini sila nasulat agud nga magtoo kamo nga si Jesus amo ang Cristo, ang Anak sang Dios, kag sa pagtoo may kabuhi kamo sa iya ngalan.

← Chapter 19 Jump to: Chapter 21 →