John 19

Ilonggo (Ang Biblia (1982))

← Chapter 18 Jump to: Chapter 20 →

1Niyan ginpakuha ni Pilato si Jesus kag ginpabunal sia.

2Kag ang mga soldado nagsalapid sing purungpurung nga tunukon, kag ginsuklub ini sa iya olo, kag ginpanaptan nila sia sing kunup nga purpura;

3nagpalapit sila sa iya, kag nagsiling, “Mabuhi, Hari sang mga Judio!” kag ginhampak nila sia.

4Si Pilato naggowa liwat, kag nagsiling sa ila, “Yari karon, ginapagowa ko sia sa inyo, agud nga makilala ninyo nga wala ako sing nakita nga kasal-anan sa iya.”

5Gani naggowa si Jesus, nga nasukluban sang purungpurung nga tunukon kag sang kunup nga purpura. Si Pilato nagsiling sa ila, “Yari ang tawo!”

6Sang nakita sia sang puno nga mga sacerdote kag sang mga manugdumala, nagsinggit sila, “Ilansang sia sa cruz, ilansang sia sa cruz!” Si Pilato nagsiling sa ila, “Dalha ninyo sia kag ilansang sia sa cruz, kay wala ako sing nakita nga kasal-anan sa iya.”

7Ang mga Judio nagsabat sa iya, “Kami may kasogoan, kag sa sinang kasogoan dapat sia mapatay, bangud nga sia nagpaka-Anak sang Dios.”

8Sang pagkabati ni Pilato sining mga polong, ginhadlukan pa gid sia;

9nagsulud sia liwat sa palacio kag nagsiling kay Jesus, “Diin ka bala maghalin?” Apang si Jesus wala magsabat sa iya.

10Busa si Pilato nagsiling sa iya, “Indi ka bala maghambal sa akon? Wala ka bala makahibalo nga ako may gahum sa pagbuhi sa imo, kag may gahum sa paglansang sa imo sa cruz?”

11Si Jesus nagsabat sa iya, “Ikaw wala kuntani sing gahum sa akon kon wala mahatag ini sa imo gikan sa ibabaw; busa ang nagtugyan sa akon sa imo may daku pa nga sala.”

12Sa sini si Pilato nagtinguha sa pagbuhi sa iya, apang ang mga Judio nagsinggit, “Kon buhian mo ining tawo, indi ka abyan ni Cesar; ang tagsatagsa nga nagapakahari sa iya kaugalingon nagasumpung kay Cesar.”

13Sang nakabati si Pilato sining mga polong, ginpagowa niya si Jesus kag naglingkod sa hukmanan sa duug nga ginatawag Ang Nabatohan, kag sa Hebreo, Gabbata.

14Karon adlaw yadto sang Pag-aman sang Pascua; mga ikan-um nga takna sadto. Nagsiling sia sa mga Judio, “Yari ang inyo Hari!”

15Nagsinggit sila, “Patya sia, patya sia, ilansang sia sa cruz!” Si Pilato nagsiling sa ila, “Ilansang ko bala sa cruz ang inyo Hari?” Ang puno nga mga sacerdote nagsabat, “Wala kami sing hari kondi si Cesar.”

16Niyan gintugyan niya sia sa ila nga ilansang sa cruz.

17Gani gindala nila si Jesus, kag naggowa sia, nga nagapas-an sang iya cruz, pakadto sa duug nga gintawag ang duug sang bagol, nga ginatawag sa Hebreo Golgota.

18Didto ginlansang nila sia sa cruz, kag duha pa dungan sa iya, sa magtimbang isa, kag si Jesus sa tunga.

19Si Pilato nagsulat sing titulo man kag ginbutang ini sa cruz; may nasulat, “Jesus nga Nazaretnon, ang Hari sang mga Judio.”

20Madamu sang mga Judio ang nakabasa sining titulo, kay ang duug nga ginlansangan kay Jesus sa cruz malapit sa banwa; kag nasulat ini sa Hebreo, sa Latin, kag sa Griego.

21Niyan ang puno nga mga sacerdote sang mga Judio nagsiling kay Pilato, “Dili mo pag-isulat, ‘Ang Hari sang mga Judio,’ kondi, ‘Ining tawo nagsiling, ako Hari sang mga Judio.’”

22Si Pilato nagsabat, “Ang nasulat ko nasulat ko.”

23Ang mga soldado sang nalansang nila si Jesus sa cruz nagkuha sang iya mga panapton kag ginbahinbahin nila sa apat, sa tagsa ka soldado isa ka bahin. Apang ang bayo niya walay tinahian, kay hinabol sing bug-os kutub sa ibabaw tubtub sa idalum;

24gani nagsinilingay sila, “Dili ta paggision ini, kondi papalaran kon sin-o ang makatag-iya.” Ini amo ang pagtuman sang kasulatan. “Ang akon mga panapton ginbahinbahin nila sa ila, kag ginpapalaran nila ang akon mga naog.”

25Gani ginhimo ini sang mga soldado; apang sa tupad sang cruz ni Jesus nagatindug ang iya iloy, kag ang utud nga babayi sang iya iloy nga si Maria nga asawa ni Cleofas, kag si Maria Magdalena.

26Sang nakita ni Jesus ang iya iloy, kag ang gintoton-an nga hinigugma niya nga nagatindug sa luyo, nagsiling sia sa iya iloy, “Babayi, yara karon ang imo anak!”

27Niyan nagsiling sia sa gintoton-an, “Yara karon ang imo iloy!” Kag kutub sadtong tion ginbaton sia sang gintoton-an sa iya kaugalingon nga balay.

28Sa tapus sini si Jesus, nga nakahibalo nga ang tanan nga butang tapus na, (agud nga matuman ang kasulatan) nagsiling, “Ginauhaw ako.”

29May nabutang didto nga suludlan nga napuno sang langgaw; gani gintakud nila sa hisopo ang esponja nga nahupug sang langgaw kag ginduhol ini sa iya baba.

30Sang si Jesus nakabaton sang langgaw, nagsiling sia, “Himpit na”; kag ginduko niya ang iya olo kag gintugyan ang iya espiritu.

31Bangud nga adlaw sang Pag-aman sadto, agud ang mga lawas indi mabilin sa cruz sa adlaw nga inugpahuway (kay yadto daku nga adlaw nga inugpahuway), ang mga Judio nagpangayo kay Pilato nga balbagon ang ila mga tiil, kag kuhaon sila.

32Gani ang mga soldado nag-abut kag ginbalbag ang mga tiil sang nahauna, kag sang isa nga ginlansang dungan sa iya;

33apang sang pag-abut nila kay Jesus kag nakita nila nga patay na sia, wala nila pagbalbaga ang iya mga tiil.

34Apang ang isa sang mga soldado nagbuno sang iya kilid sang bangkaw, kag sa gilayon naggowa ang dugo kag tubig.

35Ang nakakita sini nagsaksi—ang iya panaksi matuud, kag nakahibalo sia nga nagasiling sia sing matuud—agud nga kamo man magtoo.

36Kay ining mga butang nahanabu agud nga matuman ang kasulatan, “Walay tul-an niya nga pagbalbagon,”

37Kag isa man ka kasulatan nagasiling, “Magatolok sila sa iya nga ila ginbuno.”

38Sa tapus sini si Jose nga taga-Arimatea, nga gintoton-an ni Jesus, apang sa tago, tungud sa kahadluk sa mga Judio, nagpangayo kay Pilato nga kuhaon niya ang lawas ni Jesus, kag gintugutan sia ni Pilato. Gani nagkadto sia kag ginkuha ang iya lawas.

39Nag-abut man si Nicodemo, nga nagkadto anay sing gab-i kay Jesus, nga nagadala sing sinimbog nga mirra kag aloe, nga mga isa ka gatus ka libra.

40Ginkuha nila ang lawas ni Jesus, kag ginputus sa mga panapton nga lino nga may mga pahumut, sono sa kinabatasan sang mga Judio sa paglubung.

41Karon sa duug nga ginlansangan sa iya sa cruz may katamnan, kag sa katamnan isa ka lulubngan nga bag-o nga wala pa gid malubngi sing tawo.

42Gani bangud sang adlaw sang Pag-aman sang mga Judio, ginlubung nila si Jesus didto, kay malapit ang lulubngan.

← Chapter 18 Jump to: Chapter 20 →