John 18

Ilonggo (Ang Biblia (1982))

← Chapter 17 Jump to: Chapter 19 →

1Sang si Jesus nakapamolong sini, naggowa sia kaupud sang iya mga gintoton-an sa tabok sang nalupyakan sang Cedron, sa may katamnan, nga didto nagsulud sia kag ang iya mga gintoton-an.

2Karon si Judas man, nga nagtugyan sa iya, nakatultul sang duug; kay si Jesus sa masunsun nagkadto didto kaupud sang iya mga gintoton-an.

3Gani si Judas, sang nakabaton sang guban sang mga soldado kag mga tulugyanan halin sa puno nga mga sacerdote kag sa mga Fariseo, nag-abut didto nga may mga parol kag mga sulo kag mga hinganiban.

4Niyan si Jesus, nga nakahibalo sang tanan nga mahanabu sa iya, nagpalapit kag nagsiling sa ila, “Sin-o bala ang ginapangita ninyo?”

5Nagsabat sila sa iya, “Si Jesus nga Nazaretnon.” Si Jesus nagsiling sa ila, “Ako amo sia.” Si Judas man, nga nagtugyan sa iya, nagatindug kaupud nila.

6Sang nagsiling sia sa ila, “Ako amo sia,” nag-isul sila kag napukan sa duta.

7Sa liwat ginpamangkot niya sila, “Sin-o bala ang ginapangita ninyo?” Kag nagsiling sila, “Si Jesus nga Nazaretnon.”

8Si Jesus nagsabat, “Nagsugid ako sa inyo nga ako amo sia; gani, kon ginapangita ninyo ako, palakta ninyo ini sila.”

9Ini amo sa pagtuman sang polong nga ginpamolong niya, “Sa mga nahatag mo sa akon wala ako sing isa nga nadula.”

10Niyan si Simon Pedro, nga may espada, naggabut sini kag ginlabo ang ulipon sang pinakamataas nga sacerdote kag ginilangan ang iya dulunggan nga too. Ang ngalan sang ulipon si Malco.

11Si Jesus nagsiling kay Pedro, “Itagub ang imo espada; ang tagayan nga ginhatag sa akon sang Amay indi ko bala pag-imnon?”

12Gani ang guban sang mga soldado kag ang ila capitan kag ang mga tulugyanan sang mga Judio nagdakup kay Jesus kag naggapus sa iya.

13Gindala sia nila sing una kay Annas; kay sia ugangan ni Caifas, nga pinakamataas nga sacerdote sadtong tuig.

14Si Caifas amo ang naglaygay sa mga Judio nga kaayohan nga mapatay ang isa ka tawo tungud sa katawohan.

15Si Simon Pedro nagsonod kay Jesus, kag amo man ang isa ka gintoton-an. Sanglit ining gintoton-an nakilala sang pinakamataas nga sacerdote, nagsulud sia upud kay Jesus sa luwang sang pinakamataas nga sacerdote,

16samtang si Pedro nagtindug sa gowa sang ganhaan. Gani ang isa ka gintoton-an, nga nakilala sang pinakamataas nga sacerdote, naggowa kag naghambal sa babaying manugbantay sang ganhaan, kag ginpasulud si Pedro.

17Ang babaying manugbantay sang ganhaan nagsiling kay Pedro, “Ikaw man bala isa sang mga gintoton-an sining tawo?” Nagsabat sia, “Indi ako.”

18Karon ang mga ulipon kag ang mga tulugyanan nagdabok sing kalayo sa mga uling, kay matugnaw sadto, kag nagatindug kag nagapaganggang sila; si Pedro man kaupud nila, nga nagatindug kag nagapaganggang.

19Niyan ang pinakamataas nga sacerdote nagpamangkot kay Jesus nahanungud sa iya mga gintoton-an kag sa iya pagtolon-an.

20Si Jesus nagsabat sa iya, “Nakapamolong ako sing dayag sa kalibutan; nakapanudlo ako gihapon sa mga sinagoga kag sa templo, diin ang tanan nga Judio nagatipon; wala ako sing napamolong sa tago.

21Ngaa bala nagapamangkot ka sa akon? Pamangkota ang mga nakabati sa akon, kon ano ang ginpamolong ko sa ila; sila nakahibalo sang akon ginsiling.”

22Sang nakasiling sia sini, isa sang mga tulugyanan nga nagatindug didto naghampak kay Jesus, nga nagasiling, “Amo bala ina ang pagsabat mo sa pinakamataas nga sacerdote?”

23Si Jesus nagsabat sa iya, “Kon nakapamolong ako sing malaut, magsaksi ka sang malaut; apang kon nagapamolong ako sing maayo, ngaa bala ginhampak mo ako?”

24Niyan si Annas nagpadala sa iya nga nagapus kay Caifas nga pinakamataas nga sacerdote.

25Karon si Simon Pedro nagatindug kag nagapaganggang. Nagsiling sila sa iya, “Ikaw man bala isa sang iya mga gintoton-an?” Sia nagpanghiwala sini kag nagsiling, “Indi ako.”

26Ang isa sang mga ulipon sang pinakamataas nga sacerdote, nga himata sang gingilangan ni Pedro, nagpamangkot, “Wala ko bala ikaw makita sa katamnan kaupud niya?”

27Si Pedro nagpanghiwala sini liwat; kag gilayon nagpamalo ang manuk.

28Niyan gindala nila si Jesus halin kay Caifas pakadto sa palacio. Kaagahon sadto. Sila ila wala magsulud sa palacio, agud nga indi sila madagtaan, kondi nga makakaon sang pascua.

29Gani si Pilato naggowa sa ila kag nagsiling, “Ano bala nga sumbung ang ginadala ninyo batok sining tawo?”

30Nagsabat sila sa iya, “Kon ining tawo indi manugbuhat sang kalautan, wala namon sia kuntani pagitugyan sa imo.”

31Si Pilato nagsiling sa ila, “Dalha ninyo sia kag hukmi sia sono sa inyo kasogoan.” Ang mga Judio nagsiling sa iya, “Indi tugut sa amon ang pagpatay bisan kay sin-ong tawo.”

32Ini amo sa pagtuman sang polong ni Jesus nga iya ginhambal nga nagapahayag kon sa anong kamatayon mapatay sia.

33Si Pilato nagsulud liwat sa palacio kag nagtawag kay Jesus, kag nagsiling sa iya, “Ikaw bala ang Hari sang mga Judio?”

34Si Jesus nagsabat, “Nagasiling ka bala sini sing kinaugalingon, ukon ginsugiran ka sini sang iban nahanungud sa akon?”

35Si Pilato nagsabat, “Judio bala ako? Ikaw gintugyan sa akon sang imo kaugalingon nga pungsud kag sang puno nga mga sacerdote; ano bala ang nahimo mo?”

36Si Jesus nagsabat, “Ang akon ginharian indi iya sining kalibutan; kon ang akon ginharian iya sining kalibutan, ang akon mga alagad makig-away kuntani, agud nga indi ako ikatugyan sa mga Judio; apang ang akon ginharian indi gikan sa kalibutan.”

37Si Pilato nagsiling sa iya, “Gali hari ikaw?” Si Jesus nagsabat, “Ginasiling mo nga ako hari. Tungud sini natawo ako, kag tungud sini nagkari ako sa kalibutan, agud nga magsaksi ako sa kamatooran. Ang tagsatagsa nga yara sa kamatooran nagapamati sang akon tingug.”

38Si Pilato nagsiling sa iya, “Ano bala ang kamatooran?” Kag sang nakasiling sia sini, naggowa sia liwat sa mga Judio, kag nagsiling sa ila, “Wala ako sing nakita nga kasalanan sa iya.

39Apang kamo may kinabatasan nga ako magbuhi sa inyo sing isa ka tawo sa Pascua; luyag bala ninyo nga buhian ko sa inyo ang Hari sang mga Judio?”

40Nagsinggit sila liwat, “Indi ining tawo, kondi si Barrabas!” Karon si Barrabas buyong.

← Chapter 17 Jump to: Chapter 19 →