John 7

Ilonggo (Ang Biblia (1982))

← Chapter 6 Jump to: Chapter 8 →

1Sa tapus sini si Jesus nagpanlakatan sa Galilea; indi sia buut maglibut sa Judea, bangud nga ang mga Judio nagtinguha sa pagpatay sa iya.

2Karon malapit na ang piesta sang mga Kayangkayang sang mga Judio.

3Gani ang iya mga utud nagsiling sa iya, “Taliwan ka diri kag magkadto sa Judea, agud nga ang imo mga gintoton-an makakita sang mga buhat nga ginahimo mo.

4Kay walay tawo nga nagapanghikut sa tago kon sia nagatinguha nga makilala sa dayag. Kon ginahimo mo ining mga butang, magpahayag ka sa kalibutan.”

5Kay bisan pa ang iya mga utud wala magtoo sa iya.

6Si Jesus nagsiling sa ila, “Ang akon tion wala pa mag-abut, apang ang inyo tion yara sa gihapon.

7Ang kalibutan indi makadumut sa inyo, apang nagadumut ini sa akon bangud nga nagapanaksi ako nahanungud sini nga ang iya mga buhat malaut.

8Taklad kamo inyo sa piesta; ako indi [pa] magtaklad sa sining piesta, bangud nga ang akon tion wala pa mag-abut.”

9Sang nakasiling sia sing amo, nagpabilin sia sa Galilea.

10Apang sang nakataklad ang iya mga utud sa piesta, niyan sia man nagtaklad, indi sa dayag kondi sa tago.

11Ang mga Judio nagpangita sa iya sa piesta, kag nagsiling, “Diin bala sia?”

12Kag may madamung hinuringhuring nahanungud sa iya sa tunga sang katawohan. Samtang ang iban nagsiling, “Maayo sia nga tawo,” ang iban nagsiling, “Indi, kondi nagapatalang sia sang katawohan.”

13Apang walay tawo nga nagpamolong nahanungud sa iya sa dayag tungud sa kahadluk sa mga Judio.

14Sang nagahinunga na ang piesta si Jesus nagtaklad pa templo kag nagpanudlo.

15Ang mga Judio natingala sini, nga nagasiling, “Paano bala nga nakahibalo ining tawo sang kaalam, nga wala gid sia makatoon?”

16Gani si Jesus nagsabat sa ila, “Ang akon pagtolon-an indi akon, kondi iya sang nagpadala sa akon;

17kon bisan sin-ong tawo buut maghimo sang iya kabubut-on, makahibalo sia kon ang pagtolon-an gikan sa Dios ukon nagpamolong ako sa akon kaugalingon.

18Ang nagapamolong sa iya kaugalingon nga pagbulut-an nagapangita sang iya kaugalingon nga himaya; apang ang nagapangita sang himaya sang nagpadala sa iya matuud, kag walay kabutigan sa iya.

19Wala bala si Moises maghatag sa inyo sang kasogoan? Apang wala sa inyo sing nagatuman sang kasogoan. Ngaa bala nagatinguha kamo sa pagpatay sa akon?”

20Ang katawohan nagsabat, “May yawa ikaw! Sin-o bala ang nagatinguha sa pagpatay sa imo?”

21Si Jesus nagsabat sa ila, “Ako naghimo sing isa ka buhat, kag kamo tanan natingala bangud sini.

22Si Moises naghatag sa inyo sang circuncision (indi nga gikan ini kay Moises, kondi gikan sa mga ginikanan), kag sa adlaw nga inugpahuway nagacircuncidar kamo sang tawo.

23Kon ang isa ka tawo nagabaton sang circuncision sa adlaw nga inugpahuway, agud nga indi malalis ang kasogoan ni Moises, naakig bala kamo sa akon bangud nga gin-ayo ko sing bug-os ang lawas sang tawo sa adlaw nga inugpahuway?

24Dili kamo maghukom sono sa dagway, kondi maghukom sing matarung nga paghukom.”

25Busa ang iban sang mga taga-Jerusalem nagsiling, “Indi bala amo ini ang ginatinguhaan nila sa pagpatay?

26Kag yari sia karon, nagapamolong sa dayag, kag wala sila nagasiling sing bisan ano sa iya! Nakahibalo gid ayhan ang mga manugdumala nga ini amo ang Cristo?

27Apang kita nakahibalo sining tawo kon diin sia gikan; kag kon ang Cristo magkari, walay isa nga makahibalo kon diin sia gikan.”

28Gani si Jesus nagpahayag, sang nagpanudlo sia sa templo, “Kamo nakakilala bala sa akon, kag nakahibalo kon diin ako gikan? Apang ako wala magkari sa akon kaugalingon nga kabubut-on; ang nagpadala sa akon matuud, kag sia wala ninyo makilala.

29Kilala ko sia, bangud nga ako gikan sa iya, kag ginpadala niya ako.”

30Gani nagtinguha sila sa pagdakup sa iya; apang wala sing nagdakup sa iya, bangud nga wala pa mag-abut ang iya takna.

31Apang madamu sang katawohan ang nagtoo sa iya; nagsiling sila, “Kon ang Cristo magakari, magahimo bala sia sing madamu pa nga mga tanda sang sa nahimo sining tawo?”

32Ang mga Fariseo nakabati sa kadam-an nga nagahuringhuring sini nahanungud sa iya, kag ang puno nga mga sacerdote kag ang mga Fariseo nagpadala sing mga tulugyanan sa pagdakup sa iya.

33Niyan si Jesus nagsiling, “Sa diotay pa nga tion kaupud ako ninyo, kag niyan magakadto ako sa nagpadala sa akon;

34kamo magapangita sa akon kag indi makakita sa akon; kon diin ako indi kamo makakadto.”

35Ang mga Judio nagsinilingay, “Diin bala makadto ining tawo nga indi naton sia makita? Makadto bala sia sa mga Nag-aplaag sa tunga sang mga Griego kag magatudlo sa mga Griego?

36Ano bala ining polong nga ginsiling niya, ‘Kamo magapangita sa akon kag indi makakita sa akon,’ kag, ‘Kon diin ako indi kamo makakadto’?”

37Sa katapusan nga adlaw sang piesta, ang dakung adlaw, si Jesus nagtindug kag nagpahayag, “Kon ang bisan sin-o ginauhaw, magkari sia sa akon kag mag-inum.

38Ang nagatoo sa akon, subong sang nasiling sang kasulatan, ‘Gikan sa tagiposoon niya magailig ang mga suba sang tubig nga buhi.’ ”

39Karon ini ginpamolong niya nahanungud sa Espiritu, nga batonon sang mga nagtoo sa iya; kay ang Espiritu wala pa mahatag, bangud nga si Jesus wala pa mahimaya.

40Sang pagkabati nila sining mga polong, ang iban sang katawohan nagsiling, “Amo gid ini ang manalagna.”

41Ang iban nagsiling, “Ini amo ang Cristo.” Apang ang iban nagsiling, “Nagagikan bala ang Cristo sa Galilea?

42Wala bala magsiling ang kasulatan nga ang Cristo nagagikan sa kaliwatan ni David, kag gikan sa Betlehem, ang minoro nga didto anay si David?”

43Gani may pagbinahinbahin sa katawohan bangud sa iya.

44Ang iban sa ila buut magdakup sa iya, apang wala sing nagdakup sa iya.

45Niyan ang mga tulugyanan nagbalik sa puno nga mga sacerdote kag mga Fariseo, nga nagsiling sa ila, “Ngaa bala wala ninyo pagdalha sia?”

46Ang mga tulugyanan nagsabat, “Wala pa gid sing tawo nga nagpamolong subong sining tawo!”

47Ang mga Fariseo nagsabat sa ila, “Ginpatalang man bala kamo?

48May yara bala sang mga manugdumala ukon sang mga Fariseo nga nagtoo sa iya?

49Apang ining kadam-an, nga wala makahibalo sang kasogoan, pinakamalaut.”

50Si Nicodemo, nga nagkadto sa iya anay, nga isa sa ila, nagsiling,

51“Nagahukom bala sa tawo ang aton kasogoan kon indi sia anay pagpamatian kag mahibaloan ang iya ginahimo?”

52Nagsabat sila, “Ikaw man bala taga Galilea? Usisaa kag makita mo nga walay manalagna nga nagalutaw sa Galilea.” [

53Nagkadto ang tagsatagsa sa ila sa iya kaugalingon nga balay.

← Chapter 6 Jump to: Chapter 8 →