John 21

Ilonggo (Ang Biblia (1982))

← Chapter 20 Jump to:

1Sa tapus sini nagpahayag si Jesus sang iya kaugalingon liwat sa mga gintoton-an sa obay sang Dagat sang Tiberias; kag nagpahayag sia sa sining bagay.

2Nag-upud si Simon Pedro, si Tomas nga gintawag Didimo, si Natanael nga taga-Cana sa Galilea, ang mga anak ni Zebedeo, kag duha pa sang iya mga gintoton-an.

3Si Simon Pedro nagsiling sa ila, “Mangisda ako.” Nagsiling sila sa iya, “Kami man maupud sa imo.” Naglakat sila kag nagsakay sa sakayan; apang sa sadtong gab-i wala gid sila sing nakuha.

4Sang nagpamanagbanag na, si Jesus nagtindug sa baybayon; bisan pa ang mga gintoton-an wala makakilala nga si Jesus yadto.

5Si Jesus nagsiling sa ila, “Mga anak, may isda bala kamo?” Nagsabat sila sa iya, “Wala.”

6Nagsiling sia sa ila, “Iladlad ninyo ang pukut sa too sang sakayan, kag makakita kamo.” Gani ginladlad ini nila, kag karon indi na sila makasarang sa pagbatak sini, bangud sang kadamuon sang isda.

7Yadtong gintoton-an nga ginhigugma ni Jesus nagsiling kay Pedro, “Ang Ginoo ini!” Sang pagkabati ni Simon Pedro nga ang Ginoo yadto, nagsuklub sia sang iya panapton, kay hubo sia, kag nagsugbo sa dagat.

8Apang ang iban nga mga gintoton-an nagdungka sa sakayan, nga nagaguyud sang pukot nga puno sang isda, kay indi sila malayo sa duta, kondi mga isa ka gatus ka yarda.

9Gani sang nakatakas sila sa duta, nakita nila ang baga didto, kag isda nga natungtung sa sini, kag tinapay.

10Si Jesus nagsiling sa ila, “Dala kamo diri sang mga isda nga nakuha na ninyo.”

11Gani si Simon Pedro nagsakay kag nagbutong patakas sang pukot, nga puno sang dalagkung mga isda, isa ka gatus kag kalim-an kag tatlo; kag bisan tama kadamu, ang pukut wala magisi.

12Si Jesus nagsiling sa ila, “Kari kamo kag magpamahaw.” Karon wala gid sang mga gintoton-an nga nangahas sa pagpamangkot sa iya, “Sin-o bala ikaw?” Nakilala nila nga yadto amo ang Ginoo.

13Si Jesus nagpalapit kag nagkuha sang tinapay kag ginhatag ini sa ila, kag subong man ang isda.

14Ini ikatlong tion na nga si Jesus nagpahayag sa iya mga gintoton-an sang nabanhaw na sia.

15Sang nakapamahaw na sila, si Jesus nagsiling kay Simon Pedro, “Simon, anak ni Juan, ginahigugma mo bala ako sing labi sini sa ila?” Nagsiling sia sa iya, “Hoo, Ginoo; ikaw nakahibalo nga ako nagahigugma sa imo.” Nagsiling sia sa iya, “Pahalba ang akon mga cordero.”

16Nagsiling sia sa iya sa ikaduha, “Simon, anak ni Juan, ginahigugma mo bala ako?” Nagsiling sia sa iya, “Hoo, Ginoo; ikaw nakahibalo nga ako nagahigugma sa imo.” Nagsiling sia sa iya, “Tatapa ang akon mga carnero.”

17Nagsiling sia sa iya sa ikatlo, “Simon, anak ni Juan, ginahigugma mo bala ako?” Si Pedro nagkasubu bangud nga nagsiling sia sa iya sa ikatlo, “Ginahigugma mo bala ako?” Kag nagsiling sia sa iya, “Ginoo, ikaw nakahibalo sang tanan nga butang; ikaw nakahibalo nga ako nagahigugma sa imo.” Si Jesus nagsiling sa iya, “Pahalba ang akon mga carnero.

18Sa pagkamatuud, sa pagkamatuud, nagasiling ako sa imo, sang ikaw bataon, nagwagkus ka sang imo kaugalingon kag nagkadto sa bisan diin ang buut mo; apang kon magtigulang ka na, untayon mo ang imo mga kamut, kag iban ang magawagkus sa imo kag magadala sa imo diin indi mo buut.”

19(Ginpamolong niya ini sa pagpakita kon sa ano nga kamatayon himayaon ni Pedro ang Dios.) Kag sang nakapamolong sia sini nagsiling sia sa iya, “Sonod ka sa akon.”

20Si Pedro nagliso kag nakakita nga nagasonod sa ila ang gintoton-an nga ginhigugma ni Jesus, nga nag-idag man sa iya dughan sa panihapon kag nagsiling, “Ginoo, sin-o bala ang magatugyan sa imo?”

21Sang nakita ni Pedro sia, nagsiling sia kay Jesus, “Ginoo, magaano bala ining tawo?”

22Si Jesus nagsabat sa iya, “Kon buut ko nga magpabilin sia tubtub nga ako magkari, ano bala ina sa imo? Sonod ka sa akon!”

23Ining polong naglapnag sa mga kauturan nga yadtong gintoton-an indi mapatay; apang si Jesus wala magsiling sa iya nga indi sia mapatay, kondi, “Kon buut ko nga magpabilin sia tubtub nga ako magkari, ano bala ina sa imo?”

24Ini amo ang gintoton-an nga nagasaksi sining mga butang, kag nga nagsulat sining mga butang; kag kami nakahibalo nga ang iya panaksi matuud.

25Apang may madamu pa man nga iban nga mga butang nga ginhimo ni Jesus; kon isulat ang tagsatagsa sa ila, ginabanta ko nga bisan sa kalibutan indi makaigo ang mga tolon-an nga sulaton.

← Chapter 20 Jump to: