Hosea 1

Ika 2018 Bible

Jump to: Chapter 2 →

1Ọnwan wụ ozi Osolobuẹ zi Hosia nwa Biẹri. Ozi ndịnị bịa ogẹn ndị-nze ẹnọnị gisọnmẹ kị Juda: Uzịa, Jọtam, Ahazị lẹ Hezikaya. Ogẹn ahụn, Jerobụam nwa Jehụashị wụ eze azụụn hụn-ẹbọ wụ Izrẹlụ Ẹbamịn-ugu.

2Isi ibuzọ Osolobuẹ gi kumẹ oku ghahanị Hosia, ọ sị Hosia, “Jẹn d'a lụrụ ịgbaraja; o k'a gha ogbe mụhann'ị ụmụ. M k'e gi ẹ ghọsị nị ẹrịra kẹ ndị alịnị dọn wụrụ ịgbaraja ebe wẹ nọ latọ mmẹ wụ Osolobuẹ d'e femẹ mmọn.”

3Ya kẹ Hosia nọ lụrụ Goma nwa Diblaim. O ru, ọ nọ mụn'a okẹnnyẹ.

4Osolobuẹ nọ sị Hosia, “Gụn nwata hụ ‘Jezriẹlụ.’ Makẹni, o biekọ e ye m ẹbozo eze hụn wụ ụmụ Jehu afụnfụn makẹ ndị ahụn ile o gbu Ọdanmgbugbu Jezriẹlụ, a napụ m ikpụlọ a alị-eze Izrẹlụ Ẹbamịn-ugu.

5O ru ogẹn ahụn, m k'a nọ Ọdanmgbugbu Jezriẹlụ tikpọpụ ụta Izrẹlụ, ndị-agha wẹ ahụn wẹ gi a kpa ikẹn.”

6Omẹgụ, Goma nọ tụrụzị imẹ, mụ okpoho. Osolobuẹ nọ sị Hosia, “Gụn a ‘Lo-Ruhama’ hụn wụ ‘Omikẹn-arịa,’ makẹni ẹlẹ m k'e mẹzi omikẹn ndị Izrẹlụ Ẹbamịn-ugu gbagharị wẹ.

7Kanị, m k'e mẹni ndị hụn rị Juda omikẹn; m k'e gi ikẹn ahụn m gi wụ Osolobuẹ, Chuku wẹ, zụọpụha wẹ. Egikọ m ụta mọbụ ọpịa-agha mẹ ẹ, egikọ m agha mọbụ ẹshin mọbụ ndị gi ẹshin-agha a lụ mẹ ẹ.”

8Mgbe Goma gi hagụ hụn okpoho wụ Lo-Ruhama ẹran, o nọ tụrụzị imẹ, mụzị okẹnnyẹ.

9Osolobuẹ nọ sị Hosia, “Gụn a ‘Lo-Ami’ hụn wụ ‘Ẹlẹ wẹ ndị nke m.’ Makẹni, ndị Izrẹlụ ẹlẹ nke m, mmẹ nwẹn ẹlẹ nke wẹ.

10“K'osilẹrị, o ru ihun, ndị Izrẹlụ k'a barahị kẹ ẹjan rị ohimin, hụn wẹ ghalẹni a s'ẹka a gụnmarịn mọbụ a ma. Ezioku-ezioku, uwẹ kẹ Osolobuẹ rị nwan a sị, ‘ụnụ ẹlẹ ndị nke m.’ Kanị o ru ogẹn ahụn, uwẹ k'o k'a sịzị, ‘Ụmụ Osolobuẹ, Chuku hụn rị ndụn, kẹ ụnụ wụ!’

11Ndị Juda lẹ ndị Izrẹlụ Ẹbamịn-ugu k'a kịgbama, a họrị wẹ onyẹ-isi ohu jẹnkọ d'a kịnị wẹ, a palizi wẹ, ghamazị ihun imẹ alịnị. Eziẹ, ụhụọhịn Jezriẹlụ k'a wụ okẹn ụhụọhịn!

Jump to: Chapter 2 →