Hosea 13

Ika 2018 Bible

← Chapter 12 Jump to: Chapter 14 →

1Ogẹn mbụ, ndị Ifrem kumẹ oku, ẹhụ a mama ndị ọzọ ile nni; wẹ te a gbaye wẹ ọda-ọda imẹ alị Izrẹlụ. Kanị wẹ nọ gi ife Baalụ mẹ njọ, wẹ nọ nwụnhụn.

2Njọ-njọ kẹ wẹ rị nwan e mẹ e mẹwaye: e gi siliva a kpụrụ mmọn rịgbu enwẹn ẹ mma, ẹka-ọrụn ndị a kpụ ụzụn. Wẹ hụ a sị wẹ, “Chụnye ni ni mmọn ndịnị ẹjan! Susu ni ụmụ-efin ndịnị wẹ kpụ a kpụ ọnụ!”

3Ufiri ihiẹnni, wẹ k'e fopụ kẹ igirigi ụtụntụn igirigi ụtụntụn hụn ghalẹni e bie; wẹ k'a nọ kẹ ẹfịfịa-ọka hụn ufere rị e bupụ ebe wẹ nọ a kụkpọ ọka, nọkẹ ẹnwụnrụn rị a gha windo a lọpụ.

4Osolobuẹ sị, “Kanị mmẹ wụ Osolobuẹ, Chuku ụnụ ghakwọrị ogẹn ụnụ rị alị Ijiptu; ụnụ enwọn Chuku ọzọ wezụka m; mmẹ sụọ wụ onyẹ-nzụọpụha ụnụ.

5Mmẹ lepụ ụnụ ẹnya imẹ atụ, imẹ alị ahụn kpọ nkụn mirin rịlẹni.

6E ye m wẹ ihiẹn-oriri, ẹfọ e jun wẹ; ẹfọ e jungụ wẹ, wẹ nọ pachemẹ, zọ m.

7M k'a maye wẹ kẹ ẹwọrọ! M k'a warị ụzọ, che wẹ kẹ eje-anụ wụ liopadị.

8M k'a maye wẹ kẹ eje-anụ wẹ napụ ụmụ a, e bu m wẹ ri kẹ ẹwọrọ; a dọkịka m wẹ kẹ eje-anụ.

9Otikpọ kẹ wẹ k'e tikpọ ụnụ, ndị Izrẹlụ! Onyẹ k'e yeni nwan ụnụ ẹka?

10Ebe eze ụnụ rị nwan n'ọ gbapụha ụnụ imẹ obodo ụnụ rị ichẹn-ichẹn? Elebe kẹ ndị-ọkịkị ụnụ rị nwan ndị nwẹn ụnụ sị m, ‘Ye ẹnyi eze lẹ ndị-isi hụn k'e duni ẹnyi’?

11Iwe kẹ m gi ye ụnụ eze; m nọzị gi olulu wepụ a.

12E detugụọ m njọ ndị Ifrem, e detugụọ m njọ wẹ, butọ.

13Imẹ w'e gi mụdọnzi wẹ e bidọngụọ, Kanị nwa nwọnlẹni uche rọ, ogẹn ẹ ru, ọ ma bịa ọnụ ẹkpa-nwa ẹgwa, nị wẹ mụpụha a.

14Nị m gbapụha wẹ nwan ẹka ọnwụn? Nị m gbapụha wẹ nwan ẹka ili! Ọnwụn! Wẹhẹchanrịn ihiẹn ile i gi e gbu! Alị-mmọn! Wẹhẹchanrịn ihiẹn ile i gi e tikpọ! Emẹkọzị m omikẹn ndịnị!

15Ọsụọn'a n'ọ masịgụọnị Izrẹlụ karị umunẹ ẹ, ufere ẹbamịn ọwụwa ẹnyanwụn lala alala, ufere Osolobuẹ k'e zihẹ, o k'a gha alị-ọkpọnkụn fehẹ, isi-mirin ẹ ile a tahị, mirin ẹ ile a la; o k'a zarị ihiẹn ile o butọ, ihiẹn ile rị mkpa.

16Ndị Sameria k'a tarịrị afụnfụn njọ a hụn wẹ gi nupụ isi okpuru Chuku wẹ; wẹ k'e gi ọpịa-agha gbu wẹ; wẹ k'e gi ụmụẹka wẹ fịan alị, bụọ ikpoho wẹ rị imẹ ẹfọ.”

← Chapter 12 Jump to: Chapter 14 →