Hosea 4

Ika 2018 Bible

← Chapter 3 Jump to: Chapter 5 →

1Gọn ni ntịn, ndị Izrẹlụ, gọn ni ntịn oku Osolobuẹ; nị Osolobuẹ rị e du ndị alịnị e kpe: ọ sị: ezioku arịzị alịnị onwọnzini onyẹ w'e gi dọn ẹnya; w'a ra gizi nke Osolobuẹ dọn alịnị.

2Ihiẹn jun alịnị wụ ịkpọ-iyi lẹ ntụ lẹ igbu-ọchụn lẹ Izun-ohin lẹ ughẹrẹ; onwọnzini ihiẹn e kwọndọnni wẹ, ogbugbu-ogbugbu.

3Ya haịn alị gilẹni e mẹ ihiẹn, ndị ile rịn'a hụ a la iwi, kẹ ịhịan kẹ anụ rị ọfịa kẹ nnụnụ; azụn hụ a nwụn imẹ mirin.

4Osolobuẹ sị, “Kanị, onwọnni onyẹ m sị kpemẹ ibe mọbụ mama wẹ ikpe, makẹni ụnụ ndị nchụn-ẹjan kẹ m rị e du e kpe.

5Ọhanfie ọhanfie kẹ ụnụ a hanfiesọnmẹ ụkụ kẹ efinaị kẹ uhinhin; ndị-amụma hụzị e sọn ụnụ a hanfie; m sikọ nwan d'e tikpọ nnẹ ụnụ wụ alị Izrẹlụ.

6Amarịn rị e gbu ndị nke m. Ebe ụnụ sị ụnụ amarịnkọ ihiẹn wẹ sị ụnụ marịn, mmẹ nwẹn a chụgụọzị ụnụ ndị nchụn-ẹjan m! Ebe ụnụ gbakitọ Iwu Chuku ụnụ azụụn, mmẹ nwẹn k'a gbakitọ ụmụ ụnụ azụụn!

7Kẹ ndị nchụn-ẹjan dọn rị a bawaye kẹ wẹ dọn rị e mẹwaye ihiẹn rịlẹni mma ẹnya m; e gigụọ wẹ ihiẹn-ifẹnrẹn nọkin ẹnya ọghọ wẹ.

8Wẹ rị e gi njọ ndịnị e rijun ẹfọ, ọ sụọ wẹ nị ndịnị rị e mẹ njọ.

9Ihiẹn m k'e mẹ ndịnị kẹ m k'e mẹ ndị nchụn-ẹjan wẹ! M k'e ye wẹ ile afụnfụn eje-obibi ụnụ, kụ wẹ ụgwọ eje-ihiẹn wẹ mẹ.

10“Wẹ k'e ri, kanị, ẹfọ ejunkọ wẹ; wẹ k'a gba ịgbaraja, kanị egikọ w'a ban ihiẹn. Ihiẹn ndịnị k'e mẹ ụnụ makẹni ụnụ a latọgụọ Osolobuẹ, bu enwẹn ụnụ kwanị mmọn.

11“Manya lẹ ịgbaraja ife-mmọn rị a napụ ndị nke m uche wẹ!

12Wẹ rị a jụ ibe-osisi uche ẹ! Mkp'osisi rị nwan a ghọsị wẹ ụzọ! Makẹni mmọn hụn e nu ịgbaraja e dufiegụọ wẹ, a latọgụọ wẹ Chuku wẹ.

13Wẹ hụ a kwa ese elu ugu, a chụnyeni mmọn ẹjan wẹ kpọ ọkụn elu òke, ukun osisi okuu lẹ pọpla lẹ terẹbinti makẹni igungun wẹ a rịka mma! Ufiri ẹ kẹ ụmụ ụnụ ikpoho gi rị a gba ịgbaraja; inyẹnmẹ ụmụ ụnụ hụ a zọ ụkụ e ye ọfịa.

14Eyekọ m ụmụ ụnụ ikpoho afụnfụn nị wẹ rị a gba ịgbaraja; eyekọ m inyẹnmẹ ụmụ ụnụ afụnfụn nị wẹ zọ ụkụ ye ọfịa, makẹni ụnụ ndị ikẹnnyẹ hụ e bu ịgbaraja ụlọ-mmọn, e sọn ịgbaraja a ghọ ihiẹn ahụn wẹ rị a ghọ. “Ebọn nwọnlẹni uche iwi kẹ w'a la.

15“Ọsụọn'a ndị Izrẹlụ Ẹbamịn-ugu rị a gbasọn mmọn, Juda emẹkwọlẹ ni njọ hụ! Esọnjẹnkwọlẹ ni wẹ Gil'galụ; esọnjẹnkwọlẹ ni wẹ eje-ofufe imẹ ‘Bẹt-Avẹni ’. Esọnkwọlẹ ni wẹ kun ẹfan m hụn wẹ rị e kun okunkun nwọnlẹni isi.

16“Ndị Izrẹlụ ẹbamịn-ugu wụ isi-akwanran rịkẹ onyẹnnyẹ-efin ghalẹni a nụ ihiẹn! Nanị Osolobuẹ e dọn nwan du wẹ kẹ atụnrụn d'e ri ẹfịfịa-oyiyi rijun ẹfọ?

17Ifrem wụ Izrẹlụ Ẹbamịn-ugu, e wegụọ enwẹn wẹ kwanị mmọn-lẹ-iyi, lakwọ nị wẹ tọ.

18“Wẹ ragụ manya ahụn w'a ra, e shi wẹ d'e bumẹ ịgbaraja; ihiẹn ifẹnrẹn wẹ rị e mẹ hụ a sụọgbu wẹ;

19okẹn ufere k'e bu wẹ tuhu e kunrungụọlẹ wẹ; ifẹnrẹn mmọn ndị ahụn wẹ rị a rụa k'e mẹgbu wẹ.

← Chapter 3 Jump to: Chapter 5 →