Hosea 11

Ika 2018 Bible

← Chapter 10 Jump to: Chapter 12 →

1“Osolobuẹ sị: Ogẹn Izrẹlụ gi rị nwa-ndu, ihiẹn ẹ sụọ m, a gha m alị Ijiptu kpọpụha nwa m.

2Kẹ m dọn rị a kpọ wẹ, kẹ wẹ dọn rị a gbanị m ọsọ; a tọ wẹ a chụnyeni Baalụ ndị ahụn ẹjan, a mụnị mmọn ichẹn-ichẹn nsẹnsi.

3Kanị, mmẹ kuzi Ifrem kẹ wẹ dọn e jẹn ijẹn; mmẹ pa wẹ, zụn wẹ. Kanị, amarịn wẹ nị mmẹ lepụ wẹ ẹnya.

4Mmẹ gi eriri ẹfọma lẹ ihiẹn-ọsụsụọ du wẹ, a tọpụ m wẹ agbụn te rị wẹ olu, e hulụa m alị ye wẹ ihiẹn-oriri.

5Wẹ lakin alị Ijiptu; ndị Asiria k'a kị wẹ hụnnị wẹ jụ n'e hutọkọ wẹ kweyeni m.

6Agha k'a bịa obodo wẹ rị ichẹn-ichẹn, tikpọsọnmẹ ọnụ-mgbọn obodo ndị ahụn. Agha k'e bu wẹ ri makẹ eje-iroro wẹ rị a tụ.

7Ndị nke m sị wẹ k'a larịrị m tọ. Wẹ kpọku onyẹ wẹ sị ya kẹ wẹ rị e fe n'o d'e yeni wẹ ẹka, kanị onwọnni onyẹ k'e yeni wẹ ẹka, onwọnni onyẹ k'e welini wẹ.

8Euu Ifrem, nanị m'e dọn la ị tọnị wẹ tikpọ? Izrẹlụ, nanị m'e dọn we i ye wẹ tikpọ? Nị obi nị m mẹ ụnụ kẹ Adima? N'ọ nị m mẹ ụnụ kẹ Zẹbo? Obi anịnị m! Omikẹn anịkọ m!

9Ẹlẹ m k'e mẹchanrịn kẹ olulu rị m obi han. Etikpọchanrịnkọ m Ifrem — makẹni, Osolobuẹ kẹ m wụ, ẹlẹ m ịhịan. Mmẹ wụ Onyẹ Ahụn Rị Nsọ hụn rị imẹ igunrun ụnụ — egichanrịnkọ m olulu rị m obi sọn ụnụ.

10Omẹgụ, wẹ k'e kinhẹn: wẹ k'a gbasọn Osolobuẹ, ogẹn m'e gi dẹn kẹ ẹwọrọ. M dẹnhụ kẹ ẹwọrọ, ụmụ m rị ẹbamịn ọdịdan-ẹnyanwụn e gi ẹhụ ọmụma-nni buruhẹ m.

11Wẹ k'a ghazịkwọ Ijiptu mahan kpa-kpa-kpa kẹ nnụnụ, ghazịkwọ Asiria mahan piripiri kẹ nduru; e wekinzi m wẹ che iwe wẹ rị ichẹn-ichẹn.” Mmẹ wụ Osolobuẹ ku.

12Osolobuẹ sị, “Ndị Ifrem e gigụọ ntụ wẹ gbọndọn ijẹn mmẹ lẹ wẹ, ikpụlọ Izrẹlụ e gigụọ ndufie wẹ gbọndọnsọnmẹ ẹ; kanị ndị Juda hụkwọ e sọn Chuku e jẹnhunmẹ — wẹ hụkwọ e gi obi wẹ ile e sọn Onyẹ Ahụn Rị Nsọ.

← Chapter 10 Jump to: Chapter 12 →