Hosea 9

Ika 2018 Bible

← Chapter 8 Jump to: Chapter 10 →

1Aghọghọzịlẹ ni, ndị rị Izrẹlụ! Eweshizilẹ ni isi elu kẹ alị ndị ọzọ! Ụnụ a latọgụọ Chuku ụnụ rịkẹ ebe okpoho nọ zọ ụkụ ye ọfịa! egho ụnụ rị a kpa ebe ụnụ rị a kpa ogbe hụ a sụọ ụnụ!

2Ụnụ ahụnkọ nwan ọka lẹ manya k'e jun ụnụ ẹfọ; manya ụnụ k'a pịnpụha ejẹnkọ ejẹn.

3Ebikọzị wẹ alịnị wụ alị Osolobuẹ, Ifrem wụ Izrẹlụ k'e kinrịrị alị Ijiptu; wẹ k'e jẹnrịrị alị Asiria d'e gi ọnụ wẹ ri ihiẹn w'a sọ.

4Eyekọ wẹ Osolobuẹ oyiye manya; onwọnni ẹjan wẹ k'a sụọn'a. Wẹ chụn ẹjan, ọ nọ kẹ ihiẹn-oriri wẹ ri ebe wẹ nọ e mẹ izu; onyẹ ri ẹ, ọ rụ — wẹ k'e gi ọnụ ripụ ihiẹn-oriri wẹ; o rukọ ụlọ Osolobuẹ.

5Kị ụnụ k'e mẹ nwan ebẹhụ ụhụọhịn mmẹmmẹ; ụhụọhịn ụnụ gi e mẹni Osolobuẹ mmẹmmẹ?

6Ọnwụn kẹ wẹ gbakọnị kanị ndị Ijiptu k'e kpọnrin wẹ gbu; ndị Mẹmfisi alị Ijiptu k'e li wẹ! Ogun k'e rukpumẹ siliva ile wẹ kpọntọ, ọkịnkan e rukpumẹ ụlọ ndị wẹ k'a latọ.

7Ogẹn afụnfụn e rugụọ! Ogẹn wẹ gi a kụ ụgwọ-ọrụn a bịagụọ!! Ndị Izrẹlụ, marịnkwọ nị! Onyẹ-amụma wụ onyẹ-nzuzu, ẹnya ụnụ, Onyẹ Mmọn nsọ rị a kị wụ onyẹ-ẹra ẹnya ụnụ, makẹni njọ ụnụ e hikẹ, makẹni okẹn iwe rị ụnụ ẹfọ.

8Onyẹ-amụma wụ onyẹ-nche wẹ tumẹni Izrẹlụ wụ Ifrem. Kanị ọnyan-ọnyan kẹ w'a kpọn'a ebe-lẹ-ebe o jẹn, ukpokpo-ukpokpo kẹ w'e kpokpodẹ ẹ mmụlọ Chuku ẹ.

9E mẹrụchanrịngụọ wẹ enwẹn wẹ kẹ wẹ dọn mẹ imẹ Gibia ogẹn mbụ! Osolobuẹ k'a nyanhan njọ wẹ; o k'e yerịrị wẹ afụnfụn njọ wẹ.

10Osolobuẹ sị, “Kẹ m bu ụzọ hụn Izrẹlụ, ọ nọ kẹ ogbe vaịnị ịhịan hụn alị mirin rịlẹni; kẹ m bu ụzọ hụn ndị nẹdi ụnụ, ọ sụọghọ m kẹ mkpụrụ-osisi figi ibuzọ channị. Kanị e femẹ wẹ Baalụ-Pioru, we enwẹn wẹ kwanị ihiẹn ifẹnrẹn hụ, wẹ lẹ enwẹn wẹ nọ họnrin ihiẹn rụnị nọkẹ ihiẹn ahụn sụọnị wẹ!

11Ọghọ Ifrem k'e fepụ kẹ nnụnụ, amụkọ wẹ; ebukọ wẹ ẹfọ imẹ, atụkọ wẹ imẹ.

12Ọsụọkwọn'a wẹ zụn ụmụ, m k'e gbuchanrịn ụmụ wẹ. Nke wẹ k'a jọgbu enwẹn ẹ, ogẹn m'e gi la wẹ tọ!

13Kẹ m hụn Ifrem, m te wepụha a nị m kụn a ye alị rị mma kanị Ifrem jẹnkọ nwan d'e wepụharịrị ụmụ a ye wẹ gbu.

14Euu Osolobuẹ, mẹ wẹ ihiẹn! Kẹ m'a sị ị nwan mẹ wẹ? Mẹ imẹ kwọnsọnmẹ wẹ! Mẹ ẹran wẹ kọrọhị!

15“Osolobuẹ sị: Imẹ Gil'galụ kẹ njọ ile wẹ rị e mẹ bidọn; ebẹhụ kẹ ize wẹ gha zemẹ m. M k'e ufiri eje-ihiẹn wẹ rị e mẹ chụpụ wẹ Iwe m. Enwọnkọzị m ihiẹn-ọsụsụọ wẹ; ndị nnupụ-isi kẹ ndị-isi wẹ ile wụ.

16Ndị Ifrem a laọlẹ! Mkpọgụn wẹ a kpọpụgụọ nkụn, amịkọ wẹ mkpụrụ. Wẹ mụdẹ ụmụ, e gbupụ m ụmụ hụn a sụọnị wẹ.”

17Chuku m sikọ d'a jụ wẹ tọ makẹni egọnni w'ẹ ntịn. Wẹ k'a gha a wahunmẹ imẹ alị ndị ọzọ.

← Chapter 8 Jump to: Chapter 10 →