Hosea 8

Ika 2018 Bible

← Chapter 7 Jump to: Chapter 9 →

1“Osolobuẹ sị: Gbu opi agha! Onyẹ nọ kẹ udele rị e fehunmẹ elu ụlọ Osolobuẹ, makẹni e tikpọlẹ wẹ nkwerigbama m, dan Iwu m.

2Izrẹlụ Ẹbamịn-ugu hụ a hị m, a sị, ‘Osolobuẹ ẹnyi, ẹnyi wụ ndị nke i!’

3Kanị Izrẹlụ a jụgụọ ihiẹn rị mma. Eṅẹnrẹn jẹnkọ d'a chụ wẹ ọsọ.

4E tumẹsọnmẹ wẹ ndị-nze, ajụnị wẹ m ọnụ; e tumẹsọnmẹ wẹ ndị-isi, amarịndẹ m. E gi wẹ goru lẹ siliva wẹ kpụrụ mmọn kpụgbu enwẹn wẹ.

5Ẹka m arị nwa-efin goru ndị hụ ụnụ kpụ, ụnụ ndị obodo Sameria! Olulu ndị Sameria rị e bu m! Nanị wẹ k'e biehan d'e dọnmẹmẹ ẹka wẹ ọchan?

6Mmọn wẹ kpụ imẹ Izrẹlụ kẹ nwa-efin Sameria wụhụ ẹlẹ Chuku, kaka! Ọkpụ-ụzụn kpụ a! Wẹ k'a kụkpọchanrịn nwa-efin Sameria!

7“A kụngụọ wẹ ufere, ẹbi kẹ w'a ghọrị! Ọka wẹ kụn ebuni mban, o wepụhakọnị wẹ ihiẹn-oriri; o wepụhadẹ, itunmuye k'e ripụ a.

8E luepụgụọ wẹ Izrẹlụ; ọ rị nwan kẹ ugbẹgbẹ tikpọnị imẹ igunrun alị ndị ọzọ:

9A kpashigụọ wẹ alị Asiria d'a chọ eyemẹka nọkẹ jaki-ọfịa ya sụọ kpakọ; Ifrem wụ Izrẹlụ e regụọ enwẹn ẹ nị ya lẹ wẹ sụọ.

10K'o rehanlẹ enwẹn ẹ ebe ọ rị a rịọ alị ndị ọzọ ọrụn, m sikọ nwan d'e kpọngbama wẹ ile, mẹ wẹ ihiẹn. O biekọ eze lẹ ndị-isi a sụnma udẹn yeni okẹn ụtụ wẹ k'a na wẹ.

11Ndị Ifrem a tụnsọnmẹgụọ ukpo mmọn makẹ njọ, e gigụọ wẹ wẹ họnrin ukpo wẹ n'ọ e mẹ njọ!

12Ọ sụọn'a nị e degụọ m iwu m dejun, ọ nọhụ kẹ sị amarịn wẹ ebe ọ gha bịa.

13Wẹ hụ a chụnyeni m ẹjan, e ri anụ a, kanị Osolobuẹ anarịnkọ ẹjan wẹ. M jẹnkọ d'a nyanhandẹ njọ wẹ, ye wẹ afụnfụn a. Wẹ k'a lakin alị Ijiptu.

14Izrẹlụ Ẹbamịn-ugu a zọgụọ Onyẹ keni wẹ, rụnsọnmẹ okẹn ụlọ: Juda hụ a tụnhunmẹ obodo-obodo mgbọn. M jẹnkọ nwan d'e zi ọkụn ye obodo ndị ahụn, ọkụn a dụnpụ okẹn ụlọ ndị ahụn.”

← Chapter 7 Jump to: Chapter 9 →