Hosea 10

Ika 2018 Bible

← Chapter 9 Jump to: Chapter 11 →

1Izrẹlụ Ẹbamịn-ugu wụ osisi vaịnị duni rị a mị mkpụrụ a. Kanị, wẹ gha a mịwaye mkpụrụ, wẹ hụ a tụnwaye ukpo mmọn! Alị wẹ gha a ghawaye ihun, wẹ hụ e zuyewaye ihiẹn-mmọn ka mma.

2Obi wẹ arị mma; wẹ jẹnkọ nwan d'a ta afụnfụn njọ wẹ! Osolobuẹ k'e tikpọchanrịn ukpo-mmọn wẹ, tikpọchanrịn ihiẹn wẹ zumẹni mmọn!

3O biekọ, a kwanma wẹ, “Ẹnyi enwọnzi eze, makẹni ẹnyi ara gbaye Osolobuẹ! O te mẹdẹ nị ẹnyi e nwọnghọ eze, k'o k'e mẹdẹni ẹnyi?”

4Oku wẹ wụ oku ọnụnụ-ire, wẹ hụ e kwetarị nkwa wẹ jẹnkọlẹni d'e mẹzu, hụn ihiẹn wẹ gi a shịagbu wẹ ẹri gi e jun ụzọ ile, nọkẹ eje-ẹfịfịa rujun imẹ ugbo.

5Egun k'a tụgbu ndị bi Sameria, yeni ihiẹn mẹ nwa-efin goru “Bẹt-Avẹni.” Ndị e fen'ẹ lẹ ihẹnrẹn-mmọn a hụ a kwann'a ẹkwan; ndị te gi ẹ a ghọghọ, a nyan isi; wẹ rị a kwan nị ọghọ wẹ a la.

6Wẹ k'e bujẹn mmọn ahụn Asiria d'e gi kele eze-uku Asiria ifẹnrẹn e mẹgbu ndị Ifrem, wẹ ile rị Izrẹlụ Ẹbamịn-ugu e gi mmọn hụ fa.

7Wẹ k'e gbu eze Sameria la iwi, ọ la nọkẹ irinrin nkụn rị elu mirin.

8Wẹ k'e tikpọ ụlọ mmọn ile rị Avẹni — njọ ndị Izrẹlụ. Ogun-lẹ-ọkịnkan k'e rukpumẹ ukpo ile wẹ nọ a kwa ese! A hịma wẹ ugu, “Dodo, zuemẹ ẹnyi!” A rịọma wẹ elu-òke, “Dodo, dankwasị ẹnyi!”

9Osolobuẹ sị, “Imẹ Gibia kẹ ụnụ mẹmẹ njọnị, ụnụ eke mẹbehikwọ a; Agha o buhẹni ndị mẹ eje-ihiẹn imẹ Gibia o buhẹkọnị ụnụ ya?

10Ogẹn sụọ nị m kẹ m'e gi ye ndị-njọnị afụnfụn, alị ndị ọzọ a kịgbama d'e mẹshi wẹ ikẹn, a kpọma wẹ wẹ ẹgan makẹ okẹn njọ wẹ.

11Ifrem wụ Izrẹlụ wụ okẹn-efin w'e yejun ẹfọ, ọka sụọ k'ọ zọ, ọ hụ a sụọ a; mmẹ nwẹn e yezighọ a efe. Kanị, m jẹnkọ nwan d'e yimẹ Ifrem agbụn-ọrụn olu, Juda k'a rụnrịrị ugbo. Ụmụ Jekọpụ k'e girịrị ẹka wẹ dụkpọ alị ugbo.

12“Kụnnị nị enwẹn ụnụ ezi-omumẹ, nị ụnụ ghọrị ihiẹn-ọsụsụọ m; rụn nị nwan alị ụnụ kelẹni rụn; ogẹn w'e gi rogharị d'e kunrun Osolobuẹ e rugụọ, kẹni o mẹni ụnụ ihiẹn furuni, mẹ ẹ zue kẹ mirin.

13Kanị eje-obibi kẹ ụnụ kụn, ụnụ nọ nwan ghọrị mmẹgbu, ụnụ nọ nwan ghọrị ntụ ri. Makẹni nke ụnụ kẹ ụnụ gi dọn ẹnya ya lẹ ndị-agha ụnụ bugbu enwẹn wẹ ọda.

14Agha jẹnkọ nwan d'a kpọ imẹ ndị rị alịnị, e tikpọsọnmẹ wẹ ebe ile ụnụ gi dọn ẹnya, ẹrịra Shamanị lụ alị Bẹt-Arụbẹlụ agha tikpọ a gidẹ ikpoho lẹ ụmụ wẹ fịan alị, fịangbu wẹ.

15Ẹrịra kẹ wẹ k'e mẹ i, alị Bẹtẹlụ, yeni okẹn njọ ị. O ruhụ ogẹn ahụn, e gbupụ wẹ eze Izrẹlụ Ẹbamịn-ugu.

← Chapter 9 Jump to: Chapter 11 →