Numbers 5

Ika 2018 Bible

← Chapter 4 Jump to: Chapter 6 →

1Osolobuẹ sị Mozizi,

2“Gwa ndị Izrẹlụ wepụ ndịnị ebe ụnụ bi: onyẹ ọwụlẹ bu emu akpụkpọ-ẹhụ e feni mọbụ onyẹ ọwụlẹ ihiẹn ọwụlẹ rị e hupụha ẹhụ mọbụ onyẹ ọwụlẹ hụatụ ozun mẹrụ enwẹn ẹ.

3Wepụ nị wẹ, kẹ ikẹnnyẹ kẹ ikpoho; wẹ wepụ wẹ ebe ịhịan ile bi amamgbe w'e mẹrụ ebe wẹ bi, hụn o mẹ ni m bi imẹ igunrun wẹ.”

4Ndị Izrẹlụ nọ mẹ ẹrịra — wepụ ndị hụ ebẹhụ wẹ ile ziẹntọ. Ihiẹn Osolobuẹ gwa Mozizi kẹ wẹ mẹhụ.

5Osolobuẹ sị Mozizi,

6“Sị ndị Izrẹlụ: okẹnnyẹ mọbụ okpoho mẹ ibe ẹ eje-ihiẹn, gi ẹ mẹ Osolobuẹ njọ, ikpe a magụọ a;

7hụnyẹ k'a kụrịrị ụgwọ eje-ihiẹn o mẹ ibe ẹ. O k'a kụzurịrị ụgwọ ihiẹn o mẹ ibe ẹ, gi ụzọ ohu imẹ ụzọ isẹn dụ a, we wẹ ile ye hụn o mẹ eje-ihiẹn.

8Kanị omẹni onyẹ hụ o mẹ eje-ihiẹn a nwụnhụngụọ n'o nwọnni onyẹ ẹhụ a rịn'a wẹ k'a kụye ụgwọ ahụn, Osolobuẹ kẹ wẹ sikọ d'a kụ ụgwọ hụ; wẹ k'a kụ a ye onyẹ nchụn-ẹjan, we ebulu o k'e gi chụnn'a ẹjan o gi gbarị isi ẹ chen'ẹ.

9Oyiye ile rị nsọ ẹnịna hụn ndị Izrẹlụ e wẹhẹni onyẹ nchụn-ẹjan wụ nke onyẹ nchụn-ẹjan hụ.

10Oyiye nsọ onyẹ-onyẹ wụ nke ẹ, kanị hụn wẹ ye onyẹ nchụn-ẹjan wụ nke onyẹ nchụn-ẹjan hụ.”

11Osolobuẹ sị Mozizi,

12“Gwa ndị Izrẹlụ oku, sị wẹ: Omẹni nwunyẹ ịhịan zọ ụkụ ye ọfịa, n'o dọnmẹnini di ẹ ẹhụ a,

13kama o sọn okẹnnyẹ ọzọ ranhịn, bụ di ẹ amarịn ihiẹn rị e mẹni, amarịn wẹ n'ọ rụgụọ makẹni ọshẹri arịa lẹni anwụnnị w'a,

14kanị ẹnya a fụmagụọ di ẹ, ọ hụ e gi ẹnya ahụn e lee nwunyẹ ẹ, bụ ọ rụgụọ nke-esi, mọbụ nị ẹnya rịhụ a fụ hụn okẹnnyẹ, ọ hụ e gi ẹnya hụ e lee ẹ bụ okpoho hụ arụnị.

15Hụn okẹnnyẹ sikọ d'e we nwunyẹ ẹ jẹnni onyẹ nchụn-ẹjan. O jẹnkọnị, o weri ọka-bali wẹ gweriẹn hụn k'e jun mkpu kọstadị nta ẹbụọ hụn o k'e gi chụnnị nwunyẹ ẹ hụ ẹjan-ọka. O huyekọkwọ a ofigbọn-olivu; o buchekọ nsẹnsi elu ẹ, makẹni ẹjan-ọka onyẹ ẹnya rị a fụ rọ, ẹjan wẹ gi a nyanhan njọ ịhịan.

16“Onyẹ nchụn-ẹjan sikọ d'e wezụhan okpoho hụ, mẹ ẹ wuzo ihun Osolobuẹ.

17Onyẹ nchụn-ẹjan a bịa d'e mẹrin mirin-nsọ rị imẹ ẹgbo wẹ gi ụrụa mẹmẹ, han ẹjan rị alị imẹ Ọdụ-nsọ ye imẹ mirin hụ.

18O mẹgụ okpoho hụ e wuzo ihun Osolobuẹ, ọ tọpụ a ihiẹn o gi fụma isi, bu oyiye hụ w'e gi a nyanhan njọ ịhịan, oyiye-ọka ẹnya-ụfụ hụ, che ẹ ẹka, ya nwẹn wụ onyẹ nchụn-ẹjan e kwọndọn mirin hụ hụn e buhẹ ọnụ-ẹsọn.

19Ọ bịa d'a ghọyen'ẹ, sị a, ‘Omẹni ịyụ lẹ okẹnnyẹ ọzọ aranhịntuni, y'a zọtuni ụkụ ye ọfịa, rụ, kete ịyụ lẹ di i a lụmalẹ, mirinni e buhẹ ọnụ-ẹsọn y'e mẹlẹ i ihiẹn ọwụlẹ;

20kanị, omẹni y'a zọgụọ ụkụ ye ọfịa kete yụ lẹ di i a lụmalẹ, nị y'e mẹrụgụọ enwẹn i ghahanị isọn okẹnnyẹ ọzọ ranhịn wezụka di i,

21Osolobuẹ ya gi i họnrin ihiẹn wẹ bụ ọnụ hụn w'e kuja oku ẹ imẹ igunrun ndị nke i, ogẹn o gi mẹ ọgbọdọgbọ ị sekpọ, ẹfọ ị e fun.

22Mirinni hụn e buhẹ ọnụ-ẹsọn ya banye i ẹhụ, mẹ ẹfọ ị fun, mẹ ọgbọdọgbọ ị sekpọ.’ “O kugụ, hụn okpoho hụ a sị, ‘Isẹẹ. Isẹẹ!’

23“Onyẹ nchụn-ẹjan hụ k'e de ọnụ-ẹsọn ndịnị ye imẹ ẹkụkwọ, chan wẹ ye imẹ mirin hụ e lu ilu.

24O mẹ okpoho hụ ra mirin hụ e lụ ilu hụn e buhẹ ọnụ-ẹsọn. Mirin hụ jẹnkọ d'a banye ẹ imẹ ẹhụ, buhẹn'ẹ eje-afụnfụn.

25“Onyẹ nchụn-ẹjan hụ a bịa d'a narịn a oyiye-ọka ẹnya-ụfụ hụ rị a ẹka, finfin ẹ ghọsị Osolobuẹ, wẹhẹ ẹ elu ukpo nchụn-ẹjan.

26Onyẹ nchụn-ẹjan hụ k'a bụọrị ubẹka ohu imẹ oyiye-ọka hụ wẹ gi chụn ẹjan, gi ẹ nọkin ẹnya oyiye-ọka hụ ile, nọ elu ukpo nchụn-ẹjan ahụn dụn hụn ahụn o kpọnrin ọkụn; ọ dụngụ a ọkụn, o mẹ okpoho hụ ra mirin hụ.

27Omẹni ọ zọgụọ ụkụ ye ọfịa gi ẹ rụ enwẹn ẹ, wẹ yegụ a mirin ọnụ-ẹsọn hụ ra, o sikọ d'a ban a ẹhụ, buhẹn'ẹ eje-afụnfụn; ẹfọ a e fun, ọgbọdọgbọ a e sekpọ, ọ wụrụ onyẹ wẹ bụ ọnụ ebe ndị nke ẹ rị.

28Kanị, omẹkwọnị okpoho ahụn emẹrụnị enwẹn ẹ, nị o dọnmẹ enwẹn ẹ, onwọnni ihiẹn k'e mẹn'ẹ; o k'a s'ẹka mụ ụmụ.

29“Ịya wụ iwu w'e gi sọn ẹnya-ụfụ, ebe okpoho nọ zọ ụkụ ye ọfịa, mẹrụ enwẹn ẹ ebe ọ lụgụ di,

30mọbụ nị ẹnya rị a fụ okẹnnyẹ makẹni ọ rị e ro nị nwunyẹ ẹ rị a zọ ụkụ e ye ọfịa. Onyẹ nchụn-ẹjan k'e mẹrịrị okpoho hụ turu ihun Osolobuẹ, gi iwuni ile sọn ẹ.

31Onwọnni iwu gi di ẹ imẹ okuni, nwunyẹ ẹ nwọn gi isi ẹ buru njọ o mẹ.”

← Chapter 4 Jump to: Chapter 6 →