Hosea 11

Ilokano (Ti Biblia (1973))

← Chapter 10 Jump to: Chapter 12 →

1Idi ubing pay ti Israel, isu inayatco, ket nanipud idiay Egipto inayabac ti anacco.

2No casano caadu ti panangayab dagiti mammadto cadacuada, adadu pay ti yaadayuda cadacuada, nagidatdatonda cadagiti Baales, ket nagpuurda iti incienso cadagiti kinitikitan a ladladawan.

3Nupay casta insuroc ti Efraim a magna; inaracupco ida cadagiti tackiagco; ngem saanda a naammoan a siac ti nangagas cadacuada.

4Inyasidegco ida babaen cadagiti tali a natao-an babaen cadagiti singalut ti ayat; ket siac idi cadacuada ti cas cadagiti mangiccat iti bosal cadagiti sangida; ket incabilco ti canen ti sangoananda.

5Saandanto nga agsubli idiay daga ti Egipto; no di ket ti Asirio isunto ti arida, gapu ta madida nga agsubli caniac.

6Ket agtinnagto ti campilan cadagiti il-ilida, ket ibusennanto dagiti balunetda, ket alun-unennanto ida, a gapu cadagiti bucodda a patigmaan.

7Ket ti ilic ipamaysana ti aglicud caniac: uray pa awaganda ida nga agturong iti ngato, awan a pulos ti agpangato.

8Casano ti panang bay-bay-acto kenca Efraim? Ipurruaccanto, aya Israel? Casano ti panangaramidconto kenca a cas iti Adma? Icabilcanto aya a cas iti Zeboim? Ti pusoc mariribuc iti unegco, dagiti panangngaasic mapasgedda a padapada.

9Diacto aramiden ti rungsot ti pungtotco, diacto sublianan a dadaelen iti Efraim: ta siac Diosac, a saan a tao; ti Santo nga adda iti catengaam; ket diacto umay a sipupungtot.

10Magnadanto a sumurot ken ni Jehova, isu nga agungorto a cas leon; ta isu agungorto, ket dagiti annac umaydanto a sipipigerger manipud iti laud.

11Umaydanto a sipipigerger cas tumatayab manipud idiay Egipto, ken cas calapati manipud iti daga ti Asiria; ket pagnaedecto ida cadagiti balbalayda, cuna ni Jehova.

12Linawlawnac ti Efraim iti ulbod, ket ti balay ti Israel iti allilaw; ket ti Juda agallaalla pay laeng iti Dios, ken iti Santo a mapagtalcan.

← Chapter 10 Jump to: Chapter 12 →