Hosea 7

Ilokano (Ti Biblia (1973))

← Chapter 6 Jump to: Chapter 8 →

1Idi nga agasac coma ti Israel, nalucaisan ti kinadakes ti Efraim; ken ti kinadakes ti Samaria; ta agaramidda iti ulbod, ket ti mannanacaw sumrec, ken ti pangen dagiti tulisan agsamsamda iti ruar.

2Ket saanda nga ibilang cadagiti puspusoda a malagipco ti amin a kinadakesda: ita dagiti amin nga aramidda licmutenda ida; addada iti sangoanac.

3Pagragsakenda ti ari cadagiti kinadakesda; ken dagiti panguloenda cadagiti ulbodda.

4Isuda amin mannakicamalalada; isuda ti cas horno a paspasgedan ti agtintinapay; isu isardengna ti panagrubrubna manipud iti pannacagamay ti masa inggana iti malevaduraan.

5Idi caaldawan ti aritayo dagiti panguloen pinagsakitda dagiti bagida met laeng iti pudot ti arac; inyunnatna ti imana a naicanunong cadagiti managparparato.

6Ta pinasaganada ti pusoda a cas horno, bayat ti panagsanebda: ti agtintinapay agpatnag a maturog; iti agsapa ti horno sumged cas dumardarang nga apuy.

7Isuda amin napudotda a cas horno, ket alun-unenda dagiti ocomda; amin dagiti ar-ari matnagda: awan ti uray maysa cadacuada nga umawag caniac.

8Ti Efraim lumaoc cadagiti il-ili; ti Efraim isu ti maysa a bibingca a di nabalikid.

9Linamut dagiti sangsangaili ti pigsana, ket isu dina ammo; wen, ub-uban iti toctocna, addada ditoy ken idiay, ket isu dina ammo.

10Ket ti kinatangsit ti Israel panecnecana iti rupana: nupay casta saanda a nagsubli ken ni Jehova a Diosda, ket dida met sinapul gapu amin iti daytoy.

11Ket ti Efraim isu cas maysa a nanengneng a calapati, nga awan pannacaawatna: umawagda idiay Egipto, mapanda idiay Asiria.

12Intono mapanda, iwayatconto cadacuada ti batengco; ipababacto ida a cas cadagiti tumatayab ti langit; dusaecto ida cas nangngegan ti gimongda.

13Asida pay! agsipud ta simmiasida caniac; pannacadadael cadacuada! ta naglabsingda iti maibusor caniac; nupay subbotec coma ida, nupay casta nagsaoda cadagiti ul-ulbod a maicaniwas caniac.

14Ket saanda a nagasug caniac iti pusoda, no di ket agasugda cadagiti iddada: agtitiponda a maipoon laeng iti taraon ken baro nga arac; sumupringda iti maibusor caniac.

15Nupay insuroc ken pinakiredco dagiti tackiagda, nupay casta sicatenda ti dakes a maibusor caniac.

16Agsublida, ngem saan a daydiay adda iti ngato; caslada maysa a manangallilaw a ba-i; dagiti panguloenda matuangdanto iti campilan gapu iti pungtot ti dilada: daytoy ti pacaumsiandanto idiay daga ti Egipto.

← Chapter 6 Jump to: Chapter 8 →