Hosea 12

Ilokano (Ti Biblia (1973))

← Chapter 11 Jump to: Chapter 13 →

1Ti Efraim agtaraon iti angin, ken sumurot iti angin iti daya: ulbod ken kinawalangwalang cancanayon a paaduenna; ken aramidenda ti maysa a tulag iti Asiria, ket ti lana maipan idiay Egipto.

2Ni Jehova adda met susicna iti Juda, ket dusaennanto ni Jacob cas mayanatup cadagiti dalanna; cas mainugot cadagiti aramidna supapacannanto.

3Iti aanacan iniggamanna ti mucod ni cabsatna; ket idi nataenganen a tao naaddaan pannacabalinna iti Dios:

4Wen, naaddaan pannacabalinna iti angel, ket nangabac; nagsangit, ken nagpacpacaasi kencuana: isu nasaracanna idiay Bet-el, ket sadiay ti nakisaoanna cadatayo,

5Ni met laeng Jehova, ti Dios dagiti buybuyot: Jehova, ti pacalaglagipanna.

6Gapuna sica agsublica iti Diosmo: icutam ti kinaimbag ken kinajusticia, ket agpannurayca iti Diosmo iti cancanayon.

7Ni Efraim maysa nga agbanbanniaga, adda iti imana dagiti pagcatian a mangalilaw; isu ayatenna ti mangilupit.

8Ket kinunana, Kinapudnona siac bimmacnangac, nasaracac ti kinabacnang; cadagiti amin a trabjoc awanto ti masaracda caniac a kinadakesco nga isu ti basol.

9Ngem siac ni Jehova a Diosmo nanipud idiay daga ti Egipto; Pagtaengencanto pay laeng manen cadagiti toltolda a cas cadagidi al-aldaw ti fiesta a nangayed.

10Castamet a sinaoc cadagiti mammadto, ket pinaaduc dagiti sirmata; ket babaen ti panagannong dagiti mammadto inaramatco ti panagdidilig.

11Nadangkes aya ti Galaad? pasigda nga ulbod; idiay Gilgal idatdatonda dagiti vaca; wen, dagiti altarda casda la penpen cadagiti gulgulis ti talon.

12Ket ni Jacob nagtalaw a napan iti daga ti Aram, ket nagservi ni Israel maipuon iti asawa, ket maipuon iti nagpaspastor.

13Ket iti pannacaaramat ti maysa a mammadto ni Jehova inaonna ti Israel iti Egipto, ket babaen iti maysa a mammadto isu naaywanan.

14Ti Efraim ginargarina nga agpungtot a napait unay: gapuna ti darana matdanto kencuana, ket ti babalawna isublinto ti Apona kencuana.

← Chapter 11 Jump to: Chapter 13 →