Hosea 5

Ilokano (Ti Biblia (1973))

← Chapter 4 Jump to: Chapter 6 →

1O dacayo a papadi, denggenyo daytoy, ket ipangagyo, O balay ti Israel, tumimudca, O balay ti ari; ta ti pannacaocom agpaay cadacayo; ta dacayo idi ti silo idiay Mizpa, ken maysa a bateng a naipacat idiay Tabor.

2Ket dagiti immalsa limmaloda iti panagpapatay; ngem, siac ti mangtubngar cadacuada amin.

3Siac ammoc ti Efraim, ket ti Israel saan a mailemmeng caniac; ta ita, O Efraim, nagbalangcantisca, ti Israel marugitan.

4Dagiti aramidda saandanto nga ipalubos ti panagsublida iti Diosda; gapu ta ti Espiritu ti pannakicamalala adda cadacuada, ket saanda a bigbigen ni Jehova.

5Ket ti kinatangsit ti Israel ibatadna iti rupana: gapuna a ti Israel ken Efraim maitibcoldanto iti kinadakesda; ket ti Juda met maitibcolto a maicanunong cadacuada.

6Isuda mapandanto agraman cadagiti carcarnero ken vacvacada a mangbiruc ken ni Jehova, ngem isu saandanto a masaracan; isu immadayu cadacuada.

7Nagaramidda a sigugulib iti maicaniwas ken ni Jehova, ta nagputotda cadagiti annac a gangannaet: ita ti lutuad alun-unennanto ida agraman cadagiti taltalonda.

8Pagtimkenyo ti turorot idiay Gabaa, ken ti tangguyob idiay Rama: pagunienyo ti panagbuac idiay Beth-aven; iti licudam, O Benjamin.

9Ti Efraim agbalinto a langalang iti caaldawan ti panangtubngar: cadagiti caputotan ti Israel impacaammoc ti addanto a di-bumurong.

10Dagiti panguloen ti Juda mayarigda cadagiti nangyalis ti dulon; ibucbocconto cadacuada a cas danum ti pungtotco.

11Ti Efraim mailupit, maburac iti pannacaocom; ta isu napnec a simmurot cadagiti bilbilin ti tao.

12Gapuna siac iti Efraim ti cas maysa a sanga, ken iti balay ti Juda cas pannacalungtot.

13Idi nakita ti Efraim ti sakitna, ket ti Juda ti sugatna, iti casta ti Efraim napan idiay Asiria, ket ibaonnanto ken ari Jareb; ngem isu saannacayo a mabalin a paimbagen, ken saannanto met a maagasan ti sugatyo.

14Iti Efraim, caslaacto iti maysa a leon ken cas la urbon ti leon iti balay ti Juda: siac, siac met laeng, pigisecto ken pumanawacto; rabsutecto, ket awanto ti uray siasinoman a macaluc-at.

15Mapanacto ken agsubliacto iti dissoc, agingga iti mabigbigda ti basolda, ken sapulenda ti rupac: iti pannacaparigatda sapulendacto a sigaganetget.

← Chapter 4 Jump to: Chapter 6 →