Hosea 2

Ilokano (Ti Biblia (1973))

← Chapter 1 Jump to: Chapter 3 →

1Cunayo cadagiti cacabsatyo a lallaki Ammi, ken cadagiti cacabsatyo a babbai, Ruhama.

2Makiringgorcayo ken inayo, makiringgorcayo; ta isu saanco nga asawa, ken uray siac saannac met nga asawa; iccatenna coma iti sangoananna dagiti pannakiabigna, ken dagiti pannakicamcamalalana iti nagbaetan dagiti susona:

3Di la ket ta no siac labusac a lamolamo, ket isaadco a cas iti casasaadna iti aldaw a pannacayanacna, a pagbalinec a casla maysa a langalang ket isaadco a casla maysa a daga a namaga, ket papatayec iti waw.

4Wen, awanton ti asic cadagiti annacna; ta annac ida ti pannakicamalala;

5Ta ni inada nagbalangcantis; isu a nangyanac cadacuada nagaramid a sibabain; ta isu kinunana, Innacto suroten dagiti caayanayatco, isuda a mangted caniac iti tinapay ken danumco, ti de lanac, ken linoc, ti lanac ken ti inumec.

6Gapuna, adtoy, siac aladecto ti dalanmo cadagiti siit, ket bangonecto ti maysa a bacud a maibusor kencuana, tapno dinanto masaracanen dagiti daldalanna.

7Ket surotennanto dagiti caayanayatna, ngem saannanto a macamacamen ida; sapulennanto ida, ngem saannanton ida a mabirucan: iti casta cunananto, Innac ket agsubliacto idi immuna nga asawac; ta naimimbagac idi ngem ita.

8Ta isu saanna a binigbig nga iniccac cadagiti bucbukel, ken iti baro nga arac, ken lana, ken pinaaduc kencuana ti pirac ken balitoc, isu nga inaramatda a maipaay ken Baal.

9Gapuna, alaecto manen dagiti bucbukelco iti pannawenna, ken ti baro nga aracco iti nakedngan a pannawenna, ket alaecto manen ti dutdot ti carnero ken ti linoc isuda a nangabbong coma iti kinalamolamona.

10Ket ita lucaisacto ti kinaderrepna iti imatang dagiti caayanayatna, ket awanto ti macaluc-at kencuana itoy imac.

11Pagsardengecto met amin ti ragsacna, dagiti rambacna, dagiti lutuadna, ken dagiti aldaw a panaginanana, ken amin dagiti gimgimongna a napanayag.

12Dadaelecto dagiti uvasna ken dagiti cayona nga higos, isuda a nangisaoanna, Dagitoy ti tangdanco nga impaay caniac dagiti caayanayatco; ket pagbalinecto ida a bakir, ket dagiti an-animal ti tay-ac lamutendanto ida.

13Ket sarungcaracto kencuana dagidi al-aldaw dagiti Baales, a cadacuada pinuuranna ti incienso, idi inarcosanna ti bagina met laeng cadagiti aritosna, ken cadagiti alajasna, ket sinurotna dagiti caayanayatna, ket linipatannac, cuna ni Jehova.

14Iti casta, adtoy, isu sulisogecto, ket yegconto iti let-ang, ket agsaoacto kencuana a sililiwliwa.

15Ket itdecto kencuana dagiti cauvasanna manipud sadiay, ken iti lobong nga Acor a maipaay a ruangan ti inanama; sadiay sumungbatto cas cadagiti al-aldaw ti kinaubingna, ken cas idi aldaw nga isasang-atna manipud idiay daga ti Egipto.

16Ket daydiayto nga aldaw, cuna ni Jehova naganennacto iti Ishi, ket ni caanoman dinacto nagananen a Baali.

17Ta iccatecto iti ngiwatna ti nagan dagiti Baales ket ni caanoman saandanton a masasao iti naganda.

18Ket iti dayta nga aldaw mangaramidacto iti maysa a tulag a maipaay cadacuada cadagiti an-animal ti tay-ac, ken cadagiti tumatayb ti tangatang ken cadagiti agcarayam ti daga; dadaelecto ti ba-i ken ti campilan ken ti panagbabacal iti daga, ket pagiddaecton ida a sitatalged.

19Ket yasawacanto caniac iti agnanayon; wen, makiasawaacto kenca iti kinalinteg, iti kinjusticia, ken iti kinamanagayat, ken cadagiti caasi.

20Ta makiasawacanto caniac iti kinamatalec: ket mabigbigmonto ni Jehova.

21Ket maaramidto iti dayta nga aldaw, sumungbatacto, cuna ni Jehova, sumungbatacto cadagiti langlangit, ket isuda sumungbatdanto iti daga.

22Ket iti daga sumungbatto dagiti bucbukel, ken ti baro nga arac, ken ti lana; ket dagitoy sumungbatdanto iti Jezrael.

23Ket isu imulacto a maipaay caniac iti daga, ket caasiacto daydiay saan a nacagun-od iti caasi; ket cunacto cadagidiay saanco nga ili idi, Sica ti ilic; ket isuda cunadanto, Sica ti Diosco.

← Chapter 1 Jump to: Chapter 3 →