Hosea 8

Ilokano (Ti Biblia (1973))

← Chapter 7 Jump to: Chapter 9 →

1Isaadmo ita ngiwatmo ti tangguyob. Umayto a cas aguila a bumusor iti balay ni Jehova, agsipud ta naglabsingda iti tulagco, ken simmalungasingda iti lintegco.

2Umawagdanto caniac Diosco, dacami Israel, bigbigendaca.

3Ti Israel imbellengna ti imbag: ti cabusor camatennanto.

4Isuda namangonda cadagiti ar-ari ngem saan a gapu caniac: inaramidda dagiti panguloen, ket diac naammoan: cadagiti piracda ken balitocda nagaramidda cadagiti didiosenda, tapno pacapucawanda.

5Imbellengna ti urbonmo a vaca; O Samaria, ti pungtotco mapasged a maibusor cadacuada; casano ti cabayagnanto ti pananggon-udda iti kinadalus?

6Ta naggapu iti Israel met laeng daytoy, isu inaramid ti managaramid, ket saan a ti Dios; wen, maburburacto ti urbon a vaca ti Samaria.

7Gapu ta nagmulada iti angin, ken agapitdanto iti alipugpug: awanandanto cadagiti dawa, ti bulong dinto mangted ti bellaay; no cas mangtedto, isu alun-unento dagiti gangannaet.

8Maalun-un ti Israel; ita addada cadagiti nasnacion a cas maysa nga alicamen a saan a macaay-ayo iti siasinoman.

9Ta isuda simmang-atda idiay Asiria, cas la asno nga atap nga awan ti caduana ti Efraim tinangdananna dagiti caayan-ayat.

10Wen, nupay manangdanda cadagiti nasnacion, ngem urnongecto ida; ket mangrugida a mapabassit gapu iti awit ti ari dagiti piprincipe.

11Agsipud ta pinaadu ti Efraim dagiti al-altar a pagbasolan, adda kencuana al-altar idi tapno pagbasolan.

12Insuratco kencuana dagiti sangalacsa a banbanag ti lintegco; ngem maibilangda a cas banag a gangannaet.

13No maipapan cadagiti pannacaidatag dagiti daton caniac, agidatdatonda iti lasag ket canenda met laeng; ngem saan nga awaten ida ni Jehova: ngem malagipnanto ti kinadakesda, ket sucnalannanto dagiti basbasolda; isuda agsublidanto idiay Egipto.

14Ta ti Israel nalipatanna ti Namarsua kencuana, ket nangbangon cadagiti palacio; ket ti Juda pinaaduna dagiti ili a nasarikedkedan: ngem siac ipawitconto ti apuy cadagiti il-ilina, ket isu lamutennanto dagiti palacioda.

← Chapter 7 Jump to: Chapter 9 →