Luke 10

Ilokano (Ti Biblia (1973))

← Chapter 9 Jump to: Chapter 11 →

1Ket iti calpasan dagitoy a naaramid, nangilasin ti Apo ti sabali a pito pulo, ket imbaonna ida a sagdudua, iti masangoananna, iti isu-amin nga Il-ili ken disso a dandani a papananna.

2Ket cuncunana cadacuada: Tianien kinapudnoanna nga adu; ngem dagiti agani, bassitda: gapuna, dawatenyo iti Apo ti paganian ta mangibaon cadagiti agani iti paganianna.

3Magnacayo, adtoy, ibaoncayo a cas la cadagiti carnero iti nagtengngaan dagiti lobo.

4Dicayo mangicuyog ti supot ti cuarta, uray pagbalonan, uray zapatos; ket awan met ti cablaawanyo iti dalan.

5Ket iti uray ania a balay a sercanyonto cunayo nga umuna: Talna coma iti daytoy a balay.

6Ket no addanto idiay ti maysa nga anac ni talna, ti talnayo agnaedto kencuana, ngem no awan, agsublinto met laeng cadacayo.

7Ket agtaengcayto iti daydiay met laeng a balay a mangan ken uminum iti iteddanto; ta ti mangmangged maicari iti tangdanna. Dicay mamalaybalay.

8Ket iti uray ania nga Ili a sercanyonto ken pangawatanda cadacayo, canenyonto ti uray ania nga isangoda cadacayo:

9Ket agasanyo dagiti masacsakit nga adda idiay a disso ket cunayo cadacuada: Immasideg cadacayo ti pagarian ti Dios.

10Ngem iti uray ania nga Ili a sercanyonto ken dida pangawatan cadacayo, rumuarcayo cadagiti daldalanna ket cunayo:

11Uray pay ti tapoc ti Iliyo a kimpet cadagiti sacsacami, pampagenmi a maibusor cadacayo: nupay casta ammoenyo, a ti pagarian ti langit immasideg cadacayo.

12Cunac cadacayo nga iti dayta nga aldaw nalaglag-anto ti inget a maipaay iti Sodoma ngem iti dayta nga Ili.

13Asica pay, Corazin Asica pay Betsaida! ta no idiay Tiro ken Sidon naaramid coma dagiti datdatlag a naaramid cadacayo, nabayag coman a nagbabawida, a nagcawes ti nakersang a lupot ken nagtugaw iti dapo.

14Ngem naparparbengto ti maikeddeng iti Tiro ken Sidon iti pannacaocom ngem cadacayo.

15Ket sica, Capernaum, a naitan-occa agingga iti langit? maipababacanto nga agingga iti tucoc ti infierno.

16Ti dumngeg cadacayo, denggennac; ket ti mamagtalaw cadacayo, pagtalawennac, ket ti mamagtalaw caniac, pagtalawenna ti nangibaon caniac.

17Ket nagsublida dagidi pito pulo a siraragsac, a cuncunada: Apo, uray pay dagiti sairo pinaiturayanda cadacami iti naganmo.

18Ket kinunana cadacuada: nakitac ni Satanas a natnag nanipud langit a cas la sal-it.

19Adtoy iniccancayo ti pannacabalin a pumayat cadagiti ul-uleg ken manggagama ken iti amin a pannacabalin ti cabusor; ket awanto ti manganano cadacayo.

20Ngem dicay agayayat iti daytoy, a dagiti espiritu paiturayanda cadacayo; agayayatcay ketdi ta dagiti nagnaganyo naisuratdan idiay langit.

21Idi met la nga horas ni Jesus nagragsac iti Espirituna ket kinunana: Agyamanac kenca, Ama, Apo ti langit ken daga, ta inlimedmo dagitoy a banag cadagiti mamasirib ken mannacaaw-at ket imparangarangmo ida cadagiti babassit; wen, Ama, ta casta ti nacaayayo iti imatangmo.

22Amin dagiti banag inyawat caniac ni Amac; ket awan ti macaammo no asino ti Anac no di ni Ama; ken no asino ni Ama no di ti Anac ken dayta cayat a pangipacdaaran ti Anac.

23Ket idi a sinangona dagiti adalanna, kinunana cadacuada nga isisuda: Nagasat dagiti mata a macakita cadagiti makitayo;

24Ta cunac cadacayo nga adu dagiti mammadto ken arari a tinarigagayanda a kitaen dagiti makitayo, ket dida nakita ida; ken denggen dagiti mangngegyo, ngem dida nangngeg ida.

25Ket adtoy, ti maysa a masirib iti linteg a timmacder ket sinuutna a kinuna: Mannursuro, anianto ti aramidec, tapno matawidco ti biag nga agnanayon?

26Ket isu kinunana kencuana: Ania ti adda a naisurat iti linteg? Casano ti panangbasam?

27Ket isu simmungbat a kinunana: Ayatem ti Apo a Diosmo iti isu-amin a pusom, ken iti isu-amin a cararuam, ken cadagiti amin a pigsam, ken iti amin nga isipmo; ken ti caarrobam a cas iti bagim.

28Ket kinunana kencuana: Nalinteg ti isusungbatmo: aramidem daytoy ket agbiagcanto.

29Ngem isu, idinto a cayatna ti agparang a nalinteg, kinunana ken Jesus: Ket asino ti caarrobac?

30Ket ni Jesus simmungbat ken kinunana: Maysa a tao simmalog a naggapu iti Jerusalem a napan idiay Jerico, ket natulisan ket sinamsamda ti amin nga adda kencuana ken ginagarada ti sugat ket pinanawanda a nganngani matay.

31Ket nairana a simmalog ti maysa a padi idiay a dalan, ket idi a makitana, limmabas a liniclicanna.

32Ket casta met a maysa a Levita idi dimteng iti asideg idiay a disso ket nakitana, liniclicanna.

33Ngem ti maysa a Samaritano idinto a magmagna, napan iti yanna ket idi nakitana, natignay ti asina,

34Ket immasideg kencuana ket binedbedanna dagiti sugsugatna, sinapsapoanna iti lana ken arac; ket inpasacayna idi nagsacayanna, ket impanna iti pagdagusan, ket tinarakenna.

35Ket iti sumaruno nga aldaw nangala ti dua a denario, ket intedna idi bumalay, ket kinunana kencuana: Taracnem: ket isu-amin dagiti magastom pay; inton sumubliac bayadacto kenca.

36Asino ngarud cadagitoy tal-lo ti pagarupem a caarroba daydi natulisan?

37Ket isu kinunana: Daydi nangaramat kencuana iti asi. Idin kinuna ni Jesus kencuana: Incan ket aramidem met ti casta.

38Ket idi a magmagnada, isu simrec iti maysa a puroc: ket ti maysa a babai a managan Marta, pinadagusna iti balayna.

39Ket daytoy adda maysa a cabsatna, a managan Maria, isu a timmugaw met iti sacaanan ni Jesus ket nagdengngeg ti saona.

40Ngem ni Marta maringgoran cadagiti adu a panagsagana; ket napan kencuana ket kinunana: Apo, dica ricnaen aya a ni cabsatco baybayannac nga agservi a maymaysa? Ibagam ngarud kencuana ta tulungannac.

41Ngem ti Apo simmungbat ket kinunana kencuana: Marta, Marta, napalaloca unay ket adu ti pacaringgoram:

42Ngem maysa a banag ti masapul. Ni Maria pinilina ti nasayaat a bagi, isu a dinto maiccat kencuana.

← Chapter 9 Jump to: Chapter 11 →