Luke 9 — Ilokano (Ti Biblia (1973))

1Ket idi nga inurnongna dagiti sangapulo ket dua, iniccana ida ti pannacabalin ken kinaturay cadagiti isu-amin a sairo, ken panangagas cadagiti sacsakit.

5Ket isu-amin dagiti saan a mangawat cadacayo, intono rumuarcayo iti daydiay nga Ili, pampagenyo iti tapoc dagiti sacsacayo a pangpanecnec iti maibusor cadacuada.

6Ket napanda, iti inilin-ili nga icascasabada ti evangelio, ket nangagagasda cadagiti isu-amin a purpuroc,

7Ket ni Herodes nga agturay nadamagna dagiti isu-amin a maararamid; ket agpangpangadua, ta cuna dagiti dadduma a ni Juan nagungar cadagiti natay;

8Ket dagiti dadduma cunada, a ni Elias nagparang, ket dagiti sabsabali cunada, a maysa cadagiti cadaanan a mammadto nagungar.

9Ket kinuna ni Herodes: Ni Juan pinutulac; ngem, asino daytoy pacangngeggac cadagitoy a banag a maipapan kencuana? Ket tartarigagayanna a kitaen.

10Ket idi nagsubli dagiti apostol, sinaritada kencuana dagiti isu-amin nga inararamidda, Ket innalana ida napanda a nalimed iti maysa a disso a putputong a masacupan ti Betsaida,

11Ngem idi maammoan daytoy dagiti adu a tao, simmurotda kencuana; ket inawatna ken kinasaona ida ti maipapan iti pagarian ti Dios, ket inagasanna dagiti macasapul ti pannacaagas.

12Ket idi a mumalemen immasideg dagiti sangapulo ket dua ket kinunada kencuana: Pagawidemon dagiti adu a tao, tapno mapanda cadagiti purpuroc ken awaway iti arubayan, nga agdagus ken agsapul ti pagtaraonda; ta addatayo ditoy disso nga awan matatao.

13Ngem cunana cadacuada: Iccanyo ida ti canen, Ket kinunada: Awan cadacami no di laeng lima a tinapay ken dua nga ican, no dicam mapan gumatang ti pagtaraon a maipaay cadagitoy amin a tattao.

14Ta aglimariboda a tao. Ket kinunana cadagiti adalanna: Pagtugawenyo ida a paglalanglangen ti tunggal saglilima pulo.

15Ket casta ti inaramidda ket pinagtugawda ida amin.

16Ket innalana dagidi lima a tinapay ken dagidi dua nga ican, ket idi a timmangad sadi langit binendicionanna ida; ket pinispisina ket intedna cadagidi adalanna tapno isangoda cadagiti adu a tao.

17Ket nanganda amin, ket nabsogda; ket iti natda cadagiti pispisi, nacargaanda ti sangapulo ket dua nga alat.

18Ket naaramid nga idi agcarcararag a maymaysa, addada dagiti adalanna; ket inintuudna cadacuada a kinuna: Asinoac iti panagcuna dagiti adu a tao?

19Ket simmungbatda ket kinunada: Ni Juan a Bautista; ket dagiti dadduma cunada, ni Elias; ket dagiti sabali cunada a nagungar ti maysa cadagiti cadaanan a mammadto.

20Ket kinunana cadacuada: Ngem dacayo asinoac iti panagcunayo? Ket simmungbat ni Pedro ket kinunana: Sica ti Cristo ti Dios.

21Ngem isu imbilinna iti nairut cadacuada a dida saoen daytoy iti uray siasino;

22A cunana: Masapul a ti Anac ti tao aglac-am ti adu a banag, ken lacsiden dagiti lallacay ken turayen dagiti papadi ken dagiti escriba, ket mapapatay ken agungar iti maicatlo nga aldaw.

23Ket cuncunana cadacuada amin: No asinoman a tao ti mayat nga sumurot caniac, paglicudanna ti bagina, ket alaenna ti cruzna iti inaldaw ket surutennac.

24Ta uray siasino a mayat coma a mangisalacan iti biagna, mapucawnanto; ngem uray siasino a macapucaw iti biagna gapu caniac, maisalacannanto.

25Ta ania ti magongona ti tao no maalana amin a lubong, ngem mapucawna ken dadaelenna ti bagina?

26Ta uray siasino a mangibain caniac ken cadagiti saoc, ibainto met ti Anac ti tao, inton umay a sidadayag ken ni Ama ken dagiti nasantoan nga anangel.

27Ngem cunac cadacayo iti napudno: Adda sumagmamano ditoy a didanto matay agingga iti makitada ti pagarian ti Dios.

28Ket iti agwalo nga aldaw iti calpasan dagitoy a sasao incuyogna ni Pedro ken ni Juan ken ni Santiago, ket ummuli iti bantay a nagcararag.

29Ket idi madama nga agcarcararag, ti langa ti rupana nagbaliw ket ti pagananayna nagpudaw ken nagraniag.

30Ket adtoy dagiti dua a lallaki a makisasaoda kencuana, nga isuda Moises ken Elias;

31A nagparangda a sidadayag, ket sinasaoda ti panagwayawayna, a nganngani matungpal idiay Jerusalem.

32Ngem ni Pedro ken dagidi caduana, macaturogda unay ket idinto a nagriingda, nakitada ti dayagna ken dagidi dua a lallaki nga caduana.

33Ket naaramid, nga idi pimmanawdan kencuana, ni Pedro kinunana ken Jesus: Mannursuro, naimbag nga agiantayo coma ditoy ket agaramidcami ti tal-lo nga abong: maysa ti maipaay kenca, ket maysa ken Moises, ket sabali ken Elias, a dina ammo ti sasaoenna.

34Ket idi madama a sasaoenna daytoy, immay ti maysa nga ulep a nangabongot cadacuada; ket nagbutengda idi maulepanda.

35Ket nagtaud ti maysa a timec idi ulep a nagcuna: Daytoy ti Anacco a dongdongoec, denggenyo.

36Ket idi immay daydi a timec maymaysan ni Jesus: ket nagulimecda; ket cadagidi nga aldaw awan ti nangisaonda cadagiti nakitada.

37Ket napasamac iti sumaruno nga aldaw, idi sumalogda idi bantay, adu a tattao ti simmabet kencuana.

38Ket adtoy ti maysa a tao cadacuada a nagpuccaw a nagcuna: Mannursuro, dawatec kenca nga taliawem cadi toy anacco, ta cacaisuna:

39Ket adtoy nga maysa nga espiritu alaenna ket maigiddato nga agickis; ket riribukenna agingga iti aglablabutab ket agrigat a pumanaw kencuana ket cacaasi a pamayanna.

40Ket dinawatco cadagiti adalam a paruarenda coma, ket dida nabalin.

41Ket simmungbat ni Jesus ket kinunana: O caputotan nga awan pammatina ken managdacdakes! aginga iti caano ti panagtaengco cadacayo ken iturturedcayo? Iyegmo ditoy ti anacmo.

42Ket idi umasidegen, di sairo intublacna ket pinarigatna; ngem ni Jesus inungtanna daydi espiritu a narugit, ket inagasanna daydi baro, ket insublina ken amana.

43Ket nasnasdaawda amin iti dackel a pannacabalin ti Dios. Ngem idi a nasnasdaawda amin cadagitoy amin nga inararamidna, kinunana cadagiti adalanna:

44Tandaananyo a naimbag dagitoy a sao: ta toy Anac ti tao mayawatto cadagiti ima dagiti tao.

45Ngem saanda a naawat idi daytoy a sao, ket nacudrep cadacuada, iti casta dida maawatan, ket mabutengda met a mangintuud kencuana maipapan iti daytoy.

46Ket nabangon ti supiatda no asinonto cadacuada ti cangatoan.

47Ngem ni Jesus, idi nakitana ti supiat cadagiti pusposoda, nangala ti maysa nga ubing, ket incabilna iti sikiganna.

48Ket cunana cadacuada: Uray siasino nga umawatto itoy ubing iti naganco, awatennacto; ket uray siasino nga umawat caniac, awatenna ti nangibaon caniac; ta ti canumoan cadacay amin, isu met laeng ti cangatoan.

49Ket simmungbat ni Juan ket kinunana: Mannursuro, nacakitacami ti maysa a mamaruar cadagiti sairo iti nagamo; ket imparitmi kencuana, ta saan a sumurot cadatayo.

50Ngem ni Jesus kinunana kencuana: Dicay iparit, ta ti saan a sumalungasing cadacayo, adda cadacayo.

51Ket naaramid, nga idi ta dimtengen dagiti aldaw a pannacaitanocna nagturong a mapan a sitatalged sadi Jerusalem:

52Ket nangibaon cadagiti immuna ngem isu ket napanda ket simrecda iti maysa a puroc dagiti Samaritano, tapno isaganaanda ti pagdagusan.

53Ket isu dida inawat gapu ta agturong a mapan sadi Jerusalem.

54Ket idi naammoan dagidi adalanna a Santiago ken Juan, kinunada: Apo, cayatmo nga ibilinmi a bumaba ti apuy ti langit, tapno ibusenna ida, (a cas met ti inaramid ni Elias?)

55Ngem isu simmango ket inungtanna ida (a kinuna: Dicay ammo no aniacayo nga espiritu).

56(Ta ti Anac ti tao saan nga immay tapno agdadael cadagiti biag dagiti tao, no di ket tapno insalacanna ida). Ket napanda iti sabali a puroc.

57Ket idi magmagnada iti dalan, kinuna ti maysa a tao kencuana: Surutencanto uray adino ti papanam.

58Ket kinuna kencuana ni Jesus: Dagiti musang adda rukibda, ket dagiti tumatayab ti tangatang adda umocda; ngem ti Anac ti tao awan ti pangisadaganna iti olona.

59Ket kinunana iti sabali: Surutennac: Ngem kinunana: Apo, palubosannac pay a mapan ken mangiponpon ken amac.

60Ngem ni Jesus kinunana kencuana: Bay-am dagiti natay a mangiponpon cadagiti minatayda; ngem sica mapanca ket ipacaammom ti pagarian ti Dios.

61Ket kinuna met ti sabali: Surutencanto, Apo; ngem palubosannac, ta innac pay agpacada cadagiti cabbalayco.

62Ngem ni Jesus kinunana kencuana: Awan ti tao nga idinto nga immiggem iti arado ken tumaliaw pay iti licudan, a maicari iti pagarian ti Dios.