Luke 18

Ilokano (Ti Biblia (1973))

← Chapter 17 Jump to: Chapter 19 →

1Ket insaona cadacuada ti maysa a pangngarig ti pannacasapul nga agnanayon ti panagcararag ken ti saan a panangpucaw ti inanama:

2A kinunana: Adda idi ti maysa nga ocom iti maysa nga Ili a dina cabuteng ti Dios, ket dina met padayawan ti uray asino a tao;

3Adda met idiay nga Ili ti maysa a babai a balo, a masansan a napan kencuana, nga agcuncuna: Ibalesannac iti cabusorco.

4Ket isu nagmadi iti sumagmamano nga aldaw; ngem calpasanna; kinunana iti unegna: Uray diac cabuteng ti Dios, ket awan ti panangpadayawco iti tao;

5Ngem gapu ta daytoy balo macaalimuteng caniac, aramidecto ti kinalinteg kencuana, tapno sumardeng nga umumay caniac.

6Ket kinuna ti Apo: Denggenyo ti sao ti ocom a nakil-lo.

7Ket ti Dios dinanto aramiden aya ti kinalinteg cadagiti pinilina, nga umawawag kencuana iti aldaw ken rabii, ket addanto anusna cadacuada?

8Cunac cadacayo nga aramidennanto ti calinteganda a dagus. Nupay casta, inton umay ti Anac ti tao masaracannanto aya ti pammati ditoy daga?

9Ket kinunana met daytoy a pangngarig cadagiti dadduma nga agtalgedda cadacuada met laeng a cas da la nalinteg, ket lalaisenda dagiti sabsabali:

10Dua a tao immulida iti Templo a nagcararag: ti maysa, Fariseo, ket ti maysa, agsingsingir ti buis.

11Ket ti Fariseo, nagtacder, ket nagcararag iti pakinakemna a castoy; Dios, agyamanac kenca, ta saanac a cas cadagiti sabali a tao, a mannanacawda, nakil-loda, mannakicamalalada, ket saanac a cas itoy agsingsingir ti buis.

12Agayunarac ti mamindua iti maysa a lawas; itedco ti pagcapul-lo ti amin a cupcupicupac.

13Ngem di agsingsingir ti buis idinto nga adda iti adayu, dina maitangad man la coma dagiti matana sadi langit, no di ket dandanugenna ti barucongna, a cuncunana: Dios, mangngaasica caniac, a managbasol.

14Cunac cadacayo a daytoy nagawid iti balayna a napacawan nga immun-una ngem daydi maysa; ta uray siasino nga agpasindayaw maipababanto; ket ti agpacumbaba, maitanocto.

15Ket inyegda met kencuana dagiti ubbing a babassit, tapno ipatayna ti imana cadacuada; ngem idi makita dagidi adalanna, inungtanda ida.

16Ngem ni Jesus inayabanna ida ket kinunana: Bayanyo dagiti ububbing nga umay caniac, ket dicay pawilan ida: ta isuda ti akincucua iti pagarian ti Dios.

17Pudno a cunac cadacayo, nga uray siasino a saan nga umawatto ti pagarian ti Dios a cas maysa nga ubing, saanto a sumrec kencuana.

18Ket inintuud ti maysa nga agturay a kinunana kencuana: Mannursuro a naimbag, ania ti rebbengco nga aramiden tapno matawidco ti biag nga agnanayon?

19Ket ni Jesus kinunana kencuana: Apayapay naganennac ti naimbag? Awan ti naimbag, no saan laeng a maymaysa, nga isu ti Dios.

20Ammom dagiti bilbilin: Dica makicamalala: Dica mamapatay: Dica agtacaw: Dica agsao ti natiri a pangpanecnec; Dayawem ni amam ken ni inam.

21Ket kinunana: Amin dagitoy a banag tinungpalco nanipud idi kinaubingco.

22Ket ni Jesus, idi mangngegna daytoy, kinunana kencuana: Agcurangca pay ti maysa a banag: ilacom ti isu-amin a cucuam ket itedmo cadagiti napanglaw, ket addanto gamengmo sadi langit, ket umayca, surutennac.

23Ngem, idi nangngegna dagitoy a banag, nagladingit a napalalo, ta nabacnang unay.

24Ket ni Jesus idi makitana ti ladingitna kinunana: Ania a nagrigaten ti iseserrecdanto iti pagarian ti Dios dagiti addaan kinabacnang!

25Ta nalaclaca a lumsot ti maysa a camello iti abut ti maysa a dagum, ngem ti maysa a bacnang a sumrec iti pagarian ti Dios.

26Ket dagiti nacangngeg itoy, kinunada: Asinonto ngarud ti mabalin a maisalacan?

27Ket isu kinunana: Ti saan a mabalin cadagiti tao, mabalin iti Dios.

28Ket ni Pedro kinunana: Adtoy, binaybay-anmi dagiti sanicuami, ket sinurotdaca.

29Ket kinunana cadacuada: Pudno a cunac cadacayo: Awan ti nangpanaw iti balay wenno asawa, wenno cacabsat, wenno dadackel, wenno annac, a maipoon iti pagarian ti Dios.

30A dinanto awaten ti adadu unay iti agdama a tiempo, ken iti mapasungad a tiempo, ti biag nga agnanayon.

31Ket ni Jesus, innalana dagiti sangapulo ket dua, ket kinunana cadacuada; Adtoy sumang-attayo sadi Jerusalem, ket matungpalto amin dagiti banag nga insurat dagiti mammadto a maipapan iti Anac ti tao.

32Ta maiyawatto cadagiti Gentil ket marabrabngisto, ket mauyuyawto, ken matupraan:

33Ket calpasan ti panangsaplitda, papatayendanto; ket iti maicatlo nga aldaw agungarto.

34Ket awan cadagitoy a banag ti naawatanda, ket daytoy a sao nailimed cadacuada ket dida naawatan dagitoy a naisao:

35Ket naaramid nga idi umasideg idiay Jerico, maysa a bulsec agtutugaw iti dinna ti dalan nga agpalpalama:

36Ket isu idi mangngegna ti dackel a bonggoy ti tao nga aglabas, inintuudna no ania daydi.

37Ket impacaammoda kencuana a lumablabas ni Jesus a Nazareno.

38Idin nagpuccaw a cuncunana: Jesus, nga Anac ni David, caasiannac.

39Ket dagiti magmagna iti sangoananna, inungtanda tapno agulimec coma; ngem isu nagpuccaw iti nalallalo pay: Anac ni David, mangngaasica caniac.

40Ket ni Jesus nagsardeng, ket imbilinna nga iyegda coma kencuana; ket idi immasideg, inintuudna kencuana:

41Ania ti cayatmo nga aramidec coma kenca? Ket kinunana: Apo, macakitaac coma.

42Ket ni Jesus kinunana kencuana: Cumitaca, ti pammatim insalacannaca.

43Ket naigiddato a nacakita, ket simmursurot kencuana ket nagdaydayaw iti Dios: ket amin dagiti umili idi nakitada daytoy, dinaydayawda ti Dios.

← Chapter 17 Jump to: Chapter 19 →