Luke 4

Ilokano (Ti Biblia (1973))

← Chapter 3 Jump to: Chapter 5 →

1Ket ni Jesus a sipupunno ti Espiritu Santo, pimmanaw idiay Jordan ket indalan ti Espiritu idiay let-ang,

2Iti bayat ti uppat a pulo nga aldaw idinto a sinulisug ti diablo. Ket cadagidi nga aldaw awan ti kinnanna ket idi naturposdan, nagbisin.

3Ket ti diablo kinunana kencuana: No sica ti Anac ti Dios, ibilinmo iti daytoy a bato nga agbalin a tinapay.

4Ket ni Jesus simmungbat kencuana a kinunana: Adda a naisurat: Saan laeng a ti tinapay ti pagbiagto ti tao, (no di ket ti isu-amin a sao ti Dios.)

5Ket ti diablo impanna iti maysa a natayag a bantay ket impakitana kencuana iti apagdaricmat amin dagiti pagpagarian ti lubong.

6Ket kinunana kencuana: Amin dagitoy a pannacabalin, ken ti dayag dagitoy a pagpagarian itedco kenca, ta naitedda caniac, ket itedco iti pagayatac.

7Ngarud no agrubabca nga agdayaw caniac cucuamto amin ida.

8Ket simmungbat ni Jesus ket kinunana kencuana: Adda a naisurat; Agdayawcanto iti Apo a Diosmo ket isisunto laeng ti pagserviam.

9Ket impanna idiay Jerusalem ket incabilna iti cangatoan a paset ti Templo ket kinunana kencuana: No sica ti Anac ti Dios tumappuacca manipud ditoy agingga iti baba;

10Ta adda a naisurat: Ibilinnanto cadagiti angelna ti maipapan kenca tapno aluadandaca;

11Ket sacruyendacanto cadagiti imimada, tapno saan a maisagid ta sacam iti maysa a bato.

12Ket simmungbat ni Jesus kencuana a kinunana: Adda a naisaon: Dicanto sairoen ti Apo a Diosmo.

13Ket idi nalpas ti amin a pannulisug, ti diablo pimmanaw kencuana iti sumagmamano a tiempo.

14Ket iti pannacabalin ti Espiritu, ni Jesus nagsubli sadi Galilea, ket nagdinamag cadagiti amin a disso a cabangibang.

15Ket isu nangisursuro cadagiti sinagogada ket dinaydayaw dagiti isu-amin.

16Ket immay sadi Nazaret, isu a dinackelanna; ket simrec cas ugalina iti aldaw a panaginana iti sinagoga, ket timmacder nga agbasa.

17Ket intedda kencuana ti libro ni mammadto nga Isaias: ket idi binistradna ti libro, natumpunganna ti disso a nacaisuratan daytoy.

18Ti Espiritu ti Apo adda caniac: ta pinulutannac a mangted cadagiti naimbag a damag cadagiti napanglaw; imbaonnac a mangipacaammo ti pannacaluc-at cadagiti nacayawan, ken ti pannacakita dagiti bulsec; tapno luc-atac dagiti maparparigat;

19Tapno maiwarnac ti tawen a pacaay-ayoan ti Apo.

20Ket idi a linucotna ti libro, intedna idi tumultulong, ket nagtugaw; ket dagiti matada amin idiay sinagoga sikikitada kencuana.

21Ket nangrugi a nagcuna cadacuada: Ita nga aldaw naidanon cadagiti lapayagyo daytoy a surat.

22Ket pinanecnecanda amin ket nasdaawda cadagiti sao a natalunggadingan a nagtaud iti ngiwatna, ket cuncunada: Saan nga isu daytoy ti anac ni Jose?

23Ket kinunana cadacuada: Awan duadua a cunaenyonto ngata caniac daytoy a cayarigan: Mangngagas, agasam man ta bagim met laeng; cadagiti adu a nangngegmi a naararamid idiay Capernaum, aramidem met ditoy ilim.

24Ket kinunana: Pudno cunac cadacayo nga awan ti mammadto a mapadayawan iti ilina,

25Ngem pudno a cunac cadacayo, nga adu idi ti balo a babbai idiay Israel cadagiti aldaw ni Elias idi napunitan ti langit iti bayat ti tal-lo a tawen ken innem a bulan idi adda dackel a bisin iti amin a daga;

26Ngem awan cadacuada ti nacaibaonan ni Elias, no di laeng iti maysa a babai a balo idiay Sarepta sadi Sidon.

27Ket adu idi ti agcucutel idiay Israel cadagiti aldaw ni mammadto nga Eliseo; ngem awan cadacuada ti naagasan, no di laeng ni Naaman, a taga Siria.

28Ket isuda amin idiay sinagoga napnoda ti gura idi mangngegda daytoy;

29Ket timmacderda ket pinagtalawda iti ruar ti Ilida ket impanda nga agingga iti tapaw ti bantay a nacabangonan ti Ilida, tapno itappuacda coma.

30Ngem isu nagna iti nagtengngaanda, ket pimmanaw.

31Ket simmalog a napan idiay Capernaum, maysa nga Ili ti Galilea, Ket sinursuroanna ida idi cadagiti aldaw a panaginana:

32Ket pagsidsiddaawanda ti isursurona, ta ti saona adda pannacabalinna.

33Ket adda iti sinagoga ti maysa a tao nga addaan ti espiritu a narugit, ket nagickis iti napigsa a timec:

34A cuncunana: Ala! ania ti pacaibianganmi kenca, Jesus a Nazareno? Immayca a mangdadael cadacami? Siac amammoca no asinoca, sica ti Santo ti Dios.

35Ket ni Jesus inungtanna a kinuna: Agulimecca, ket rumuarca kencuana. Ket ti sairo idi impadsona iti tengnga, pimmanaw kencuana ket saanna nga inanano.

36Ket nasdaawda amin, ket nagsasaoda ti maysa ken maysa a cuncunada: Ania a sao daytoy? ta iti pannacabalin ken talugadingna bilinenna dagiti espiritu a narugit, ket rumuarda.

37Ket ti damagna nagracurac iti isu-amin a disso iti cabangibang.

38Ket pimmanaw idi sinagoga, ket simrec iti balay ni Simon: ket ti babai a catugangan ni Simon adda napigsa a gorigorna: ket isu indawdawatanda kencuana.

39Ket immasideg kencuana, ket inungtanna daydi gorigor, ket pimmanaw di gorigor ket dagus a timmacder ket nagservi cadacuada.

40Ket idi lumlumnec ti init, isu-amin dagiti adda masakitda cadagiti nadumaduma a sacsakit, impanda kencuana: ket isu, iti panangipatayna cadagiti imana iti tunggal maysa cadacuada, pinaimbagna ida.

41Ket rimmuarda met cadagiti adu, dagiti sairo nga agic-ickis ket cuncunada: Sica ti Anac ti Dios; ngem inungtanna ida ket saanna ida a pinagsao; ta ammoda nga isu ni Cristo.

42Ket idi umaldawen, pimmanaw ket napan ti disso a let-ang: ket dagiti adu a tattao sinapsapulda ket napanda nga agingga iti yanna, ket ingawidda tapno saan nga umadayu cadacuada.

43Ngem isu kinunana cadacuada; Cadagiti sabsabali nga il-ili masapul met nga ipacaammoc ti evangelio ti pagarian ti Dios: ta daytoy ti panggep a nacaibaonac.

44Ket nangascasaba cadagiti sinagoga sadi Galilea.

← Chapter 3 Jump to: Chapter 5 →