1 Chronicles 14

Mien Bible (Thai Script) © Thailand Bible Society, 2007

← Chapter 13 Jump to: Chapter 15 →

1ไทละ เญย ฮู่ง, ฮีลาม, พ้าย เต๋ย โต่ว เฝียน เมี่ยน มี่ง ดาวิด วั้ว, หย่า ฝูง สีดา ฒ่ง เดี๋ยง เหธา หละเปย๊ย-หฒั่ง เหธา เดี๋ยง-หฒั่ง เหว่ย โหฒว ฮู่ง ติ่น ปุน ดาวิด.

2ดาวิด ฯฒฯ ฮิ้ว ตุ๊ เฒี้ยว เหลียบ นิ่น โหฒว ฮู่ง กุ๊น อิสะลาเอน เต่ย-ปูง. เหว่ย นิ่น เญย แปะ ฝีง อิสะลาเอน เมี่ยน, ทิน-ฮู่ง ปุน เมี่ยน หฒะเก้ง! ท่าย ดาวิด เญย กั๊วะ.

3เยียม เยลูซาเลม, ดาวิด แอ๋ง หล่ง เอ๊า ธั้ม เญย, แอ๋ง ตุ๊ ตอน ตุ๊ เซียะ.

4น้าย เซ ดาวิด เยียม เยลูซาเลม ตุ๊ ต้าย เญย ฝุเจว๊ย เญย บั๋ว. ม่าย ซัมมุวา, โซบับ, นาทัน, ซาโลมอน,

5อิบฮา, เอลีซูวา, เอนเพเล้ด,

6โนกา, เนเฟ้ก, ยาเฟีย,

7เอลีซามา, เบเอนยาดา เหธา เอลีเฟเล้ด.

8ฟีลิสะเตีย เมี่ยน หมวัง ไฮ์ เมี่ยน เหลียบ ดาวิด โหฒว ฮู่ง กุ๊น เหฑ่ง อิสะลาเอน เต่ย-ปูง, ฟีลิสะเตีย เญย หฒวัง เมี่ยน ฯฒฯ ธ้วด มี่ง ล์อ ดาวิด. ดาวิด ฮิ้ว ตุ๊ ฯฒฯ ธ้วด มี่ง เหธา นิ่น บัว เบ๊าะ จ๋า.

9ฟีลิสะเตีย เมี่ยน ฒู้ง ต้าย ลู้ เลฟาอิม ฮ์อง หมี่ อ๊ะ.

10ดาวิด ฯฒฯ หน่าย ทิน-ฮู่ง, “เยีย อ๋อย หฒุ มี่ง เบ๊าะ ฟีลิสะเตีย เมี่ยน ไฟ? เม่ย อ๋อย เฒาะ นิ่น บัว จิว ปุน เยีย ไฟ?” เฒี้ยว เตา นิ่น, “กุ๊น มี่ง เบ๊าะ อ๊ะ. เยีย อ๋อย เฒาะ นิ่น บัว จิว ปุน เยียม เม่ย เญย ปั์ว-เดี๊ย.”

11ดาวิด เหธา นิ่น เญย เมี่ยน ฯฒฯ มี่ง บาอันเปลาซิม, เยียม หน่าย เบ๊าะ ฮี่ง ฟีลิสะเตีย เมี่ยน. นิ่น ก๊อง, “ทิน-ฮู่ง หล่ง เยีย เญย ปั์ว เบ๊าะ ป่าย เยีย เญย วิน-วั้ง ฮนั้ง ววม-เป๊ะ หธง ทง มี่ง นอ.” เหว่ย น้าย วั้ว นอม ต๋อง เมี่ยน เห่ว บาอันเปลาซิม

12ฟีลิสะเตีย เมี่ยน เฒาะ นิ่น บัว เญย หมิ่ว-ฝัง กวั่ง เจี๊ยน วั้ว เปย๋า, ดาวิด ฯฒฯ หัด เมี่ยน หล่ง โต์ว ปั๊ว กวั่ง เหฑ่ง.

13ฟีลิสะเตีย เมี่ยน แอ๋ง ต้าย ลู้ หฑุ่น เลฟาอิม ฮ์อง.

14ดาวิด ฯฒฯ แอ๋ง หน่าย หฑุ่น ทิน-ฮู่ง. ทิน-ฮู่ง แอ๋ง เตา, “ไม้ ตู๋ง แป้ง หฒะ ฝาว. อ๋อย หฒุ ฮวีง มี่ง เถา นิ่น บัว เญย ฆะฮ้า ฆาง, เยียม เยี่ยน โหฒ่ว หล่ม ต๋อย-หง่าน เบ๊าะ นิ่น บัว.

15เม่ย บัว เยี้ยด ไฮ์ แปง-กวั้น ยั่ง เจ๊า บุย เญย เฉีย เยียม เยี่ยน โหฒ่ว หล่ม เญย เดี๋ยง กู้ หงว่าย, กุ๊น ธ้วด มี่ง เบ๊าะ อ๊ะ, เหว่ย หฒุ น้าย ปุน ธีง ทิน-ฮู่ง ธ้วด เม่ย บัว เญย วั้ว ด่าง แหมง เบ๊าะ ฟีลิสะเตีย เมี่ยน เญย แปง-กวั้น.”

16ดาวิด เอย เจี๊ยน ทิน-ฮู่ง พ้าย เญย หว่า โหฒว. นิ่น บัว ฯฒฯ เยียม กิเบโอน เบ๊าะ เจี๊ยน ฟีลิสะเตีย เมี่ยน มี่ง เถา เกเซ.

17ดาวิด เญย เม่ง เต้า ฯฒฯ ซีง ปวั๊ง นอมๆ กั๊วะ. เฒี้ยว หย่า ปุน หม่าน ฝีง กั้ม เหฑีย ดาวิด.

← Chapter 13 Jump to: Chapter 15 →