1 Chronicles 29

Mien Bible (Thai Script) © Thailand Bible Society, 2007

← Chapter 28 Jump to:

1ดาวิด ก๊อง บั๋ว กั๊บ ฒุ้น เญย หฒวัง เมี่ยน, “เยีย เญย ตอน, ซาโลมอน, เซ ต้ง ทิน-ฮู่ง กิ๊น วั้ว เต้า, หฮญัง-เจ๊ย หธ่อ หลุน เญย หย่า ไม้ แก้ง โหะ ฮิ้ว ธั้ม. น้าย เต๋ย กง เซ โฮล ไห่, เหว่ย หฒุ น้าย นอม ติ่น เซ เหว่ย เฒี้ยว ทิน-ฮู่ง, ไม้ เฒ์ย เหว่ย เมี่ยน.

2เหว่ย น้าย เยีย หล่ง เหฑ่ง ปั้น เหฒ่ย หลิ่ว เล์ย กะน้าย เหว่ย โหฒว เยีย เญย ทิน-ฮู่ง เญย เปย๊า เญย จา-สี่. เยีย ล์อ เจียม เหว่ย โหฒว เจียม เญย จา-สี่, ล์อ ญ่าน โหฒว ญ่าน เญย จา-สี่, ล์อ ต้ง ซิ โหฒว ต้ง ซิ เญย จา-สี่, ล์อ เฮลียะ โหฒว เฮลียะ เญย จา-สี่, ล์อ เดี๋ยง โหฒว เดี๋ยง เญย จา-สี่. แอ๋ง ม่าย จ๋าย เญย หละเปย๊ย เปน เญย, บั๊ว-แมง เญย เหธา เหฒีย หญู่ง เซ้ด เญย, แอ๋ง ม่าย หละเปย๊ย-หม่วน เหธา หละเปย๊ย-เมา.

3ไม้ ตาน บัวะ น้าย. ธ้วด ลิ์ว เยีย เหว่ย เยีย เญย ทิน-ฮู่ง เญย เปย๊า หลิ่ว เล์ย เญย กะน้าย, เหว่ย หฒุ เยีย ฮนั้ม เยีย เญย ทิน-ฮู่ง เญย เปย๊า, เยีย เฒาะ เยีย กั้น เซียว ต้าย เญย เจียม ญ่าน เหว่ย วั้ว นอม ธีง-เหฑ่ง เปย๊า.

4ม่าย เจียม จุ๊ หว่าน ปัว ธิน จ้อย, เซ เยียม โอฟี ต้าย เญย เจียม, เหธา สิน ลิ์ว เญย ญ่าน เหฒียบ เฝย หว่าน เสี่ย ธิน จ้อย, เหว่ย ปวัง เจี๊ยน เปย๊า เญย หฌ่ง,

5เหว่ย เจียม จา-สี่, ญ่าน จา-สี่, หย่า เหว่ย หฒั่ง เมี่ยน โหฒว เญย หญู่งๆ กะน้าย. อี้ ฮนอย ม่าย หาย เต้า ปวั๊ง เฮญี้ยว ฝ่ง ห่อ กะน้าย หย่า เฒาะ กั้น ฝูง ปุน เฒี้ยว ไฟ?”

6อิสะลาเอน เมี่ยน ฝีงๆ เญย เปย๊ย เฒ้ย เหธา ปู้ง ป่วน เญย เปย๊ย เฒ้ย, เหธา กุ๊น เหยียด ธิน เต้า แปง เหธา เหยียด แป๊ะ เต้า แปง เญย แปง-เปย๊ย, เหธา กุ๊น ฮู่ง เตี๋ย เญย กง เญย หฒวัง เจียน, ปวั๊ง เฮญี้ยว ฝ่ง ห่อ.

7นิ่น บัว เหว่ย ทิน-ฮู่ง เญย เปย๊า เญย กง ฝ่ง ห่อ เหฒียบ หว่าน ปยา ธิน จ้อย เหธา ฮม์ เหฒียบ เหญ่ย จ้อย เจียม, อี สิน เหยียด หว่าน จ้อย ญ่าน, ปัว สิน เสี่ย หว่าน เหฮยียด ธิน จ้อย ต้ง ซิ, เหธา หญี่ เหฒียบ เยี้ยด สิน จ้อย เฮลียะ.

8หาย เต้า ม่าย หละเปย๊ย-จ๋าย ฯฒฯ จิว ปุน เกโซน เมี่ยน, เยฮีเอน, ฝูง เปียะ หฒั่ง เฒี้ยว เญย เปย๊า เซียว กะน้าย เญย ต๋อง.

9หฒวัง แปะ ฝีง ฯฒฯ อะเฮน้ย เหว่ย หฒุ น้าย เต๋ย เมี่ยน ปวั๊ง เฮญี้ยว ธ้วด ฟิม ฝ่ง ห่อ ปุน เฒี้ยว. ดาวิด ฮู่ง หย่า หฒะเก้ง เฌียน-โย่ว ไห่ อ๊ะ.

10ดาวิด ตอง เจี๊ยน กั๊บ ฒุ้น เญย หฒวัง เมี่ยน เธง เฒี้ยว. นิ่น ก๊อง, “โอ เฒี้ยว, เยีย บัว เญย อง-ถาย, อิสะลาเอน, เญย ทิน-ฮู่ง อ่า, อ๋อย หฒุ เหยียด ลิ์ว เธง เม่ย เถา หม่าน โก๊ว หม่าน ต่อย.

11โอ เฒี้ยว อ่า, เม่ย เซ โฮล ไห่, ม่าย ชะ, หย่า ม่าย ฌัง-หล่าง, เม่ย ตุ๊ ฮี่ง เจี๋ย หย่า ม่าย ฮ่าง ต้าว. เยียม ลู่ง เยียม เดา เหยียด ฒู้ง เป๋น เม่ย เญย. โอ เฒี้ยว อ่า, กั๊วะ หย่า เป๋น เม่ย เญย, เม่ย ตุ๊ โหฒว โฮล กุ๊น หม่าน หมวด.

12เหยียด ฒู้ง ฒิ่น ฒ่อย เหธา ฌัง-หล่าง เยียม เม่ย ต้าย, เม่ย ตุ๊ กุ๊น หม่าน หมวด, เยียม เม่ย เญย ปั์ว กะญั์ว ม่าย ชะ โหย่ว โฮล โหย่ว เฮ้น, เม่ย หย่า ปุน เมี่ยน ตุ๊ โหฒว โฮล หย่า ปุน หม่าน หมวด เฮ้น.

13เยีย บัว เญย ทิน-ฮู่ง อ่า, อี้ หฒั่น เยีย บัว แล์ง ฒี่ง เม่ย หย่า เธง เม่ย เญย ฌัง-หล่าง เญย บั๋ว.

14“มป่า เยีย ต้ง หาย เต้า, เยีย เญย แปะ ฝีง หย่า ต้ง หาย เต้า, เยีย บัว หธีง ต้าย ไฮ่ ด่ง หน่าย ปวั๊ง เฮญี้ยว ฝ่ง ห่อ ปุน เม่ย? เหว่ย หฒุ หม่าน หมวด เยียม เม่ย ต้าย. เยีย บัว ขูง เฒาะ ต้ง เยียม เม่ย กั้น เญย ปั์ว ต้าย เญย กะน้าย ฝูง ปุน เม่ย.

15หฒิว เม่ย หมั่ง, เยีย บัว เซ ฮนั้ง เจี๋ย เจ๊า เญย กั้น ฝีง เมี่ยน, ฮนั้ง เยีย บัว เญย อง-ถาย นอ. เยีย บัว เยียม ป้าม เกน เญย ฮนอย-เหญียะ เซ ฮนั้ง ต้ง ลิ่น, ไม้ ลั่ม ฮนั้ม ต๋อง.

16โอ เฒี้ยว, เยีย บัว เญย ทิน-ฮู่ง อ่า, เยีย บัว หลิ่ว เล์ย น้าย เต๋ย เหยียด ฒู้ง กะน้าย ธั้ม เญย เหว่ย เม่ย เญย ธีง-เหฑ่ง เม่ง เหธย นอม เปย๊า. น้าย เต๋ย เหยียด ฒู้ง กะน้าย เยียม เม่ย กั้น เญย ปั์ว ต้าย หย่า เป๋น เม่ย เญย.

17เยีย เญย ทิน-ฮู่ง อ่า, เยีย ฮิ้ว ตุ๊ เม่ย เสย เมี่ยน เญย เฮญี้ยว หย่า อะเฮน้ย เมี่ยน โหฒว เฮญี้ยว หฒีง. เยีย ปวั๊ง เฮญี้ยว หย่า เฮญี้ยว หฒีง เญย ฝ่ง ห่อ น้าย เต๋ย เหยียด ฒู้ง กะน้าย. อี้ หฒั่น เยีย เฌียน-โย่ว ปวัด เม่ย เญย แปะ ฝีง เยียม น้าย ปวั๊ง เฮญี้ยว ฝ่ง ห่อ ปุน เม่ย.

18โอ เฒี้ยว, เยีย บัว เญย อง-ถาย, อับลาฮัม, อีสัก เหธา ยาโค้บ เญย ทิน-ฮู่ง อ่า, โท้ ปุน เม่ย เญย แปะ ฝีง เหยียด ลิ์ว ม่าย เฮญี้ยว อ๋อย ฮนั้ง น้าย นอ โหฒว, หย่า ปุน นิ่น บัว เหลียบ ตี่ง เฮญี้ยว กัน เม่ย.

19โท้ เหธย ปุน เยีย เญย ตอน, ซาโลมอน, ม่าย เฮญี้ยว เอย เม่ย เญย หลี่ง, เม่ย หัด เญย หว่า เหธา เม่ย เญย เล์ย โหฒว น้าย เต๋ย เหยียด ฒู้ง, แอ๋ง หล่ง ต้ง เยีย หลิ่ว เล์ย น้าย เต๋ย หญู่งๆ กะน้าย เหธย เม่ย เญย เปย๊า.”

20ดาวิด ก๊อง บั๋ว กั๊บ ฒุ้น เญย หฒวัง เมี่ยน, “เธง เฒี้ยว, เม่ย บัว เญย ทิน-ฮู่ง.” กั๊บ ฒุ้น เญย หฒวัง เมี่ยน ฯฒฯ เธง เฒี้ยว, นิ่น บัว เญย อง-ถาย เญย ทิน-ฮู่ง. นิ่น บัว หย่า โด๊ะ มฆ้อง ป๋าย เฒี้ยว หย่า ท่าย ฮู่ง เตี๋ย.

21ตะเหญ่ย ฮนอย นิ่น บัว ต้อ กะน้าย ฝ่ง ห่อ เหฒี่ย ปุน เฒี้ยว, หย่า ฝ่ง ห่อ ปั๊ว เหฒี่ย ปุน นิ่น. ม่าย เหยียด ธิน เต้า ง่ง โก๊ว, เหยียด ธิน เต้า ยู่ง โก๊ว เหธา เหยียด ธิน เต้า ปะกี ยู่ง ตอน แอ๋ง เหธา น้าย เต๋ย เหยียด เหฌี่ย เธี้ย เหฒี่ย เญย กะน้าย. นิ่น บัว แอ๋ง เหว่ย อิสะลาเอน เญย หฒวัง เมี่ยน ฝ่ง ห่อ เหฒี่ย เญย กะน้าย ธั้ม ไห่.

22วั้ว ฮนอย นิ่น บัว ฯฒฯ เยียม เฒี้ยว เญย หฑะเฮมียน เฌียนๆ โย่วๆ เญย หญั่น หย่า ฮบ. นิ่น บัว แอ๋ง เหญี่ยม ดาวิด เญย ตอน, ซาโลมอน, โหฒว ฮู่ง ตะเหญ่ย หฑุ่น, หย่า หล่ง โย่ว ออน นิ่น เหว่ย เฒี้ยว โหฒว ฮู่ง หย่า ออน สาโดก โหฒว ไซ เมี่ยน.

23ซาโลมอน ฯฒฯ ตุ๊ เฒว์ย เฒี้ยว เญย เหว่ย หฑิบ เจี๊ยน นิ่น เญย เตีย, ดาวิด, โหฒว ฮู่ง. เยียม หญู่งๆ สี่ นิ่น หลง เจี๊ยน ฝาว. อิสะลาเอน เญย หฒวัง เมี่ยน หย่า หมวัง นิ่น เญย หว่า.

24หฒวัง เปย๊ย เฒ้ย เหธา เฮ้น ไห่ เญย แปง, เลี่ยม ดาวิด ฮู่ง เญย เหยียด ฒู้ง ตอน, แล์ง ปุน ซาโลมอน กุ๊น.

25เฒี้ยว ปุน ซาโลมอน เยียม อิสะลาเอน เญย หฒวัง เมี่ยน เญย หฑะเฮมียน ตุ๊ เม่ง เต้า โฮล, หย่า ปุน นิ่น ตุ๊ ฌัง-หล่าง เก้า โฮล เจี๋ย เยียม อิสะลาเอน เญย หาย เต้า ฮู่ง.

26เจียดซี เญย ตอน, ดาวิด, โหฒว ฮู่ง กุ๊น เหฑ่ง อิสะลาเอน เต่ย-ปูง.

27นิ่น โหฒว ฮู่ง กุ๊น อิสะลาเอน เต่ย-ปูง ปวั๊ง เฝย เหฒียบ หฮญัง, เยียม เฮโบโลน ฒี่ง กุ๊น เสี่ย หฮญัง, เยียม เยลูซาเลม กุ๊น ฟ่า เหฒียบ ฟาม หฮญัง.

28นิ่น เญย หฮญัง-เจ๊ย โก๋ ไห่, เสี่ยว ญ่วน ปวั๊ง, ฯฒฯ เกวย เสย หมี่ อ๊ะ. นิ่น เป๋น เญย, ม่าย เม่ง เต้า หลง เญย. นิ่น เญย ตอน, ซาโลมอน, หย่า หฑิบ เจี๊ยน นิ่น โหฒว ฮู่ง.

29ดาวิด โหฒว ฮู่ง เญย เฒี่ยง โห่, เยียม กอน เถา เซ้ด เมว์ย ธ้วด เญย สี่, เฟี้ย เจี๊ยน โต่ว หว่า เมี่ยน, ซามูเอน, เญย โซว-ตาน เหธา โต่ว หว่า เมี่ยน, นาทัน, เญย โซว-ตาน, เหธา โต่ว หว่า เมี่ยน, กาด, เญย โซว-ตาน.

30นิ่น บัว หย่า เฟี้ย เหฑ่ง นิ่น กุ๊น กั๊วะ เญย เจ๊า-โหล่ว, นิ่น โหฒว ฮู่ง เญย ชะ, หย่า เฟี้ย เจี๊ยน นิ่น เหธา อิสะลาเอน เมี่ยน เหธา เว่ย ก๋อม เญย เหยียด ฒู้ง กั๊วะ ปวั้ง เญย สี่.

← Chapter 28 Jump to: