1 Chronicles 17

Mien Bible (Thai Script) © Thailand Bible Society, 2007

← Chapter 16 Jump to: Chapter 18 →

1ดาวิด ตุ๊ เยียม เจี๊ยน กั้น เญย ฮู่ง ติ่น, นิ่น ก๊อง บั๋ว โต่ว หว่า เมี่ยน, นาทัน, “หมั่ง ม่าะ! เยีย เยียม เจี๊ยน สีดา ฒ่ง เดี๋ยง เญย เปย๊า มป่า เฒี้ยว เญย แล์ง แหง่ง หว่า ฟาง หธ่อ เยียม ด๊บ-ลิ่ว กะญั์ว.”

2นาทัน เตา ดาวิด, “เยียม เม่ย เญย เฮญี้ยว เม่ย อ๋อย โหฒว หาย หญู่ง, กุ๊น โหฒว ม่าะ! เหว่ย หฒุ ทิน-ฮู่ง เหธา เม่ย เยียม.”

3ต้ง วั้ว ม์วน นาทัน ตุ๊ ฒิบ เฒี้ยว เญย หว่า ก๊อง,

4“มี่ง บั๋ว เยีย เญย โปว, ดาวิด, ‘ เฒี้ยว ฮนั้ง น้าย นอ ก๊อง. “เม่ย ไม้ ตู๋ง ก๊ม เปย๊า ปุน เยีย เยียม โอ่.

5เยียม เยีย ต้อ อิสะลาเอน เมี่ยน ธ้วด อียิบ เต่ย-ปูง เถา อี้ ฮนอย เยีย ไม้ เยียม เจี๋ย เหยียด นอม เปย๊า. เยีย เยียม เจี๋ย เหยียด นอม ด๊บ-ลิ่ว เธี้ยง ซุ้ย เจี๋ย กั้น นอม ด๊บ-ลิ่ว เธี้ยง, เยียม เหยียด นอม ต๋อง ซุ้ย เจี๋ย กั้น นอม ต๋อง.

6ตะฟ่าน เยีย เหธา อิสะลาเอน เญย หฒวัง เมี่ยน ซุ้ย เจี๋ย เญย ต๋อง, เยีย ไม้ ตุ๊ บั๋ว เจี๋ย อิสะลาเอน เญย ต้ม เจียน, ต้ง เยีย พ้าย เหฒียง โก๋ว เยีย เญย แปะ ฝีง เญย หาย เต้า, “เม่ย เหว่ย หาย ติ่ว ไม้ หล่ง สีดา ฒ่ง เดี๋ยง เหธย นอม เปย๊า ปุน เยีย?”’

7“อี้ หฒั่น บั๋ว เยีย เญย โปว, ดาวิด, ‘เน่น เจี๋ย เญย เฒี้ยว ฮนั้ง น้าย นอ ก๊อง, “เยีย เฒาะ เม่ย เยียม ยู่ง เธี้ยง ปู๋ง ปะกี ยู่ง เญย เฒี่ยง โห่ ธ้วด ต้าย, เหลียบ เม่ย โหฒว เยีย เญย แปะ ฝีง, อิสะลาเอน เมี่ยน, เญย ฮู่ง.

8ไม้ กุ๊น เม่ย มี่ง หาย, เยีย เหธา เม่ย เยียม. เยียม เม่ย เญย วั้ว ด่าง แหมง เญย เหยียด ฒู้ง วิน-วั้ง เยีย ไพ กวั่ง หมี่ อ๊ะ. เยีย อ๋อย ปุน เม่ย ตุ๊ เม่ง เต้า โฮล, ด่ง ลู่ง เดี๊ย ม่าย เม่ง เต้า โฮล เจี๋ย เญย เมี่ยน.

9เยีย อ๋อย ปุน นอม ต๋อง เยีย เญย แปะ ฝีง, อิสะลาเอน เมี่ยน เยียม, หย่า เหลียบ นิ่น บัว เยียม วั้ว เหว่ย เป๋น นิ่น บัว กั้น เญย ต๋อง, ไม้ หฒุ แอ๋ง เฮญี้ยว หลุ่น. เมี่ยน หว่าย เมี่ยน หย่า ไม้ ตุ๊ แอ๋ง ต้าย ห่อย นิ่น บัว ฮนั้ง ฒิ่น ด่าง วั้ว นอ,

10หย่า ไม้ ฮนั้ง เยีย พ้าย ต้ม เจียน กุ๊น อิสะลาเอน เมี่ยน เญย เฒี่ยง โห่. เยีย หย่า อ๋อย ฮี่ง เจี๋ย เม่ย เญย เหยียด ฒู้ง วิน-วั้ง. “‘ไม้ ตาน บัวะ น้าย. เยีย หย่า บั๋ว เม่ย, เฒี้ยว อ๋อย เหธย โฮ์ ต่อย เฒ้ย-ฟุน ปุน เม่ย.

11เม่ย เญย ฮนอย-เหญียะ ปวั๊ง, เม่ย เกวย เสย วั้ว หฒั่น, เยีย อ๋อย ปุน เม่ย เญย ตอน, เซ เม่ย กั้น เญย เธียน ตอน, ตุ๊ หฑิบ เจี๊ยน เม่ย โหฒว ฮู่ง. เยีย หย่า อ๋อย เหลียบ นิ่น เญย กั๊วะ ว้วน.

12นิ่น ฒู้ง อ๋อย ก๊ม นอม เปย๊า ปุน เยีย เยียม. เยีย หย่า อ๋อย เหลียบ นิ่น เญย เหว่ย เถา เหยียด ลิ์ว.

13เยีย อ๋อย โหฒว นิ่น เญย เตีย. นิ่น หย่า อ๋อย โหฒว เยีย เญย ตอน. เยีย อ๋อย เหยียด ลิ์ว เหฒียบ ฒัวะ เญย ฮนั้ม นิ่น, ไม้ เฒาะ หฑวน ฮนั้ง เยีย เฒาะ หฑวน, ไม้ ฮนั้ม ต้ง โหฒว ฮู่ง ด่าง เม่ย วั้ว เต้า เซาโล.

14เยีย ฒู้ง อ๋อย เหลียบ นิ่น เหยียด ลิ์ว กุ๊น เยีย เญย แปะ ฝีง เหธา เยีย เญย กั๊วะ. นิ่น เญย ฮู่ง เหว่ย ฒู้ง อ๋อย เหลียบ เถา เหยียด ลิ์ว.”’”

15นาทัน เฒาะ ทิน-ฮู่ง หล่าว ย่าง ปุน นิ่น น้าย เต๋ย เหยียด ฒู้ง สี่ ก๊อง บั๋ว ดาวิด.

16ดาวิด ฮู่ง ฯฒฯ เปียะ มี่ง เฒว์ย เจี๊ยน เฒี้ยว เญย หฑะเฮมียน ก๊อง, “โอ เฒี้ยว ทิน-ฮู่ง อ่า, เยีย เซ ต้ง หาย เต้า, เยีย เญย ฮมวั้ง ต่อย หย่า ฝุน เป๋น หาย หญู่ง, เม่ย หธีง ต้าย โหฒว ด่ง น้าย หลง ปุน เยีย?

17โอ ทิน-ฮู่ง อ่า, หฒิว เม่ย หมั่ง, น้าย เซ ไฝ-ฟิ้ว สี่. เม่ย หย่า ก๊อง เถา เม่ย เญย โปว เญย โฮ์ ต่อย เฒ้ย-ฟุน. โอ เฒี้ยว ทิน-ฮู่ง อ่า, เม่ย หมั่ง เยีย ฮนั้ง เยีย โหฒว เต้า โฮล เจี๋ย เญย เมี่ยน.

18“เม่ย ด่ง น้าย ท่าย เม่ย เญย โปว, เยีย, ดาวิด, ไฮ่ จา ก๊อง หาย หญู่ง? เหว่ย หฒุ เม่ย ฮิ้ว ตุ๊ เยีย, เม่ย เญย โปว.

19โอ เฒี้ยว อ่า, เหว่ย เม่ย เญย โปว หย่า หฒิว เม่ย กั้น เญย เอ๋ย, เม่ย โหฒว น้าย เต๋ย เหยียด ฒู้ง โฮล ไห่ เญย สี่, หย่า หล่าว ย่าง น้าย เต๋ย เหยียด ฒู้ง โฮล ไห่ เญย สี่ ธ้วด ต้าย.

20“โอ เฒี้ยว อ่า, หฒิว เยีย บัว กั้น เญย มน่อม ไฮ์, ไม้ ม่าย หาย เต้า ฮนั้ง เม่ย. ธ้วด ลิ์ว เม่ย, ไม้ ม่าย กั้น เต้า ทิน-ฮู่ง.

21แอ๋ง ม่าย หาย ฝีง ฮนั้ง เม่ย เญย แปะ ฝีง, อิสะลาเอน เมี่ยน? เยียม ลู่ง เดี๊ย เซ ต้ง น้าย ฝีง, ทิน-ฮู่ง หฒัวะ หฑวน โหฒว กั้น เญย แปะ ฝีง. เหว่ย ปุน เม่ย กั้น ตุ๊ เม่ง เต้า โฮล, เม่ย หย่า โหฒว ต้ม บัวะ ฮ่อง เญย สี่, หฒุ่น ธ้วด กั้น ฝีง เมี่ยน เยียม เม่ย เญย แปะ ฝีง เญย วั้ว ด่าง แหมง เปย๋า ธ้วด อียิบ.

22เม่ย ปุน อิสะลาเอน เมี่ยน เหยียด ลิ์ว โหฒว เม่ย กั้น เญย แปะ ฝีง. โอ เฒี้ยว อ่า, เม่ย ตุ๊ โหฒว นิ่น บัว เญย ทิน-ฮู่ง.

23“โอ เฒี้ยว อ่า, โท้ เฒาะ เม่ย เหว่ย เยีย, เม่ย เญย โปว, เหธา เยีย เญย เฒ้ย-ฟุน แล์ง เญย หว่า เหลียบ ว้วน เถา เหยียด ลิ์ว. โท้ เม่ย เอย เจี๊ยน เม่ย ก๊อง เญย หว่า โหฒว.

24เม่ย เญย เม่ง ฯฒฯ เหลียบ ว้วน หย่า ม่าย เมี่ยน เหยียด ลิ์ว เธง เว่ย โฮล. นิ่น บัว ฯฒฯ ก๊อง, ‘เน่น เจี๋ย เญย เฒี้ยว เซ กุ๊น อิสะลาเอน เญย ทิน-ฮู่ง. นิ่น โหฒว อิสะลาเอน เญย ทิน-ฮู่ง.’ ดาวิด เญย โต้ว ฒง หย่า ตุ๊ เยียม เม่ย เญย หฑะเฮมียน เหลียบ ว้วน.

25“เยีย เญย ทิน-ฮู่ง อ่า, เม่ย หล่าว ย่าง ปุน เยีย, เม่ย เญย โปว, ฮิ้ว ตุ๊ เม่ย อ๋อย เหลียบ เยีย เญย โฮ์ ต่อย เฒ้ย-ฟุน. เหว่ย น้าย เยีย, เม่ย เญย โปว, ต๊าม โฮล เญย เยียม เม่ย เญย หฑะเฮมียน เต๋า เก๋า.

26เฒี้ยว อ่า, เม่ย เซ ทิน-ฮู่ง. เม่ย แล์ง น้าย เต๋ย หลง เญย สี่ ปุน เยีย, เม่ย เญย โปว.

27เหว่ย น้าย โท้ เม่ย อะเฮน้ย เหธย ฟุ ปุน เยีย, เม่ย เญย โปว, เญย เฒ้ย-ฟุน เหว่ย ปุน นิ่น บัว เหยียด ลิ์ว ตุ๊ เยียม เม่ย เญย หฑะเฮมียน. เฒี้ยว อ่า, เม่ย ฒู้ง เหธย ฟุ ปุน นิ่น บัว หย่า อ๋อย เหธย ฟุ นิ่น บัว เถา เหยียด ลิ์ว.”

← Chapter 16 Jump to: Chapter 18 →