1 Chronicles 18

Mien Bible (Thai Script) © Thailand Bible Society, 2007

← Chapter 17 Jump to: Chapter 19 →

1โฮ์ ต้าย ดาวิด มี่ง เบ๊าะ ฮี่ง ฟีลิสะเตีย เมี่ยน, เฒาะ นิ่น บัว เยียม นิ่น เญย ปั์ว-เดี๊ย. นิ่น หย่า ธ้าง ตุ๊ ฟีลิสะเตีย เมี่ยน เญย กัด มู้ง เหธา ฮวีง ก๋อม วั้ว นอม มู้ง เญย ฟิ้ว-ล์าง.

2ดาวิด หย่า เบ๊าะ ฮี่ง โมอับ เมี่ยน. นิ่น บัว ฯฒฯ หฒุ เยียม นิ่น เญย ปั์ว-เดี๊ย หย่า ธ้วด โฑว ปุน นิ่น.

3ดาวิด แอ๋ง มี่ง เบ๊าะ โสบา เญย ฮู่ง, ฮาดัดเอเซ, แอ๋ง เบ๊าะ เจี๊ยน มี่ง เถา ฮามัด, ต๋อย ฮาดัดเอเซ ธ้วด มี่ง เหว่ย อ๋อย ธ้าง อ๋อย กุ๊น ยูเฟติด ด้าย เฮลน เญย ต๋อง.

4ดาวิด ธ้าง ตุ๊ นิ่น บัว เบ๊าะ จ๋า เญย ม์า-เธีย เหยียด ธิน จ๋า, ฒ้าง ม์า-เธีย เญย แปง เสี่ย ธิน เต้า, เหธา ยั่ง เดา เญย แปง อี หว่าน เต้า. นิ่น ฮงะ ม์า เญย ต้ม หลวั่ง จาน ตั๋ง, ขูง เลี่ยว เบ๊าะ จ๋า เธีย เญย ม์า เหยียด แป๊ะ เต้า ฮนั้ง.

5ดามัดกัด เญย ซีเลีย เมี่ยน ธ้วด ต้าย เถง โสบา เญย ฮู่ง, ฮาดัดเอเซ, ดาวิด ไต๋ นิ่น บัว อี หว่าน อี ธิน เต้า แปง ไต่.

6ฆะฮ้า ดาวิด เหลียบ แปง-เธี้ยง เยียม ซีเลีย เมี่ยน เญย เต่ย, ดามัดกัด ฒี่ง. ซีเลีย เมี่ยน ฯฒฯ หฒุ เยียม ดาวิด เญย ปั์ว-เดี๊ย หย่า ธ้วด โฑว ปุน นิ่น. ไม้ กุ๊น ดาวิด มี่ง หาย, เฒี้ยว ปุน นิ่น ฮี่ง เจี๋ย.

7ดาวิด หย่า ธ้าง ฮาดัดเอเซ เญย เจียน นั้น เจี๊ยน เญย เจียม-ท้อง-ป้าย ต้อ มี่ง เยลูซาเลม.

8ดาวิด แอ๋ง มี่ง ฮาดัดเอเซ เญย อี นอม ฒี่ง, เทบา เหธา คูน, ธ้าง ตุ๊ ต้ง ซิ ธั้ม ไห่. ฆะฮ้า ซาโลมอน หล่ง โหฒว ต้ม ต้ง ซิ ปุ้น เหธา ต้ม เดี้ยว เหธา เหฒีย หญู่ง ต้ง ซิ เญย จา-สี่.

9ฮามัด เญย ฮู่ง, โทอู, ไฮ์ ก๊อง ดาวิด เบ๊าะ ฮี่ง โสบา เญย ฮู่ง, ฮาดัดเอเซ, เญย เหยียด ฒู้ง จุน-แปง,

10นิ่น พ้าย นิ่น เญย ตอน, ฮาโดลัม, มี่ง หวุ่ย ปวั้ง ดาวิด ฮู่ง, ก๊อง หว่า เถง นิ่น อะเฮน้ย เหว่ย นิ่น ตุ๊ เบ๊าะ ฮี่ง ฮาดัดเอเซ, เหว่ย หฒุ ฮาดัดเอเซ หฒั่นๆ มี่ง เหธา โทอู เบ๊าะ จ๋า. ฮาโดลัม หย่า ต้อ เจี๊ยน หล่ง เจียม ญ่าน เหธา ต้ง ซิ โหฒว ต้าย เญย หญู่งๆ จา-สี่ ฝูง ปุน ดาวิด.

11ดาวิด ฮู่ง เฒาะ น้าย เต๋ย จา-สี่ ฝูง ปุน เฒี้ยว เหธา เจี๊ยน นิ่น เฒาะ เยียม หม่าน กั๊วะ, เซ เยียม เอโดม, โมอับ, อัมโมน เมี่ยน, ฟีลิสะเตีย เมี่ยน เหธา อามาเล้ก เมี่ยน ธ้าง ต้าย เญย เจียม ญ่าน ฝูง ปุน เฒี้ยว.

12เสลุยา เญย ตอน, อาบีไช, เยียม เฑ้า-ฮ์อง ไต๋ เอโดม เมี่ยน เหยียด หว่าน เหฮยียด ธิน เต้า.

13นิ่น เหลียบ แปง-เธี้ยง เยียม เอโดม. เอโดม เมี่ยน ฯฒฯ หฒุ เยียม ดาวิด เญย ปั์ว-เดี๊ย. ไม้ กุ๊น นิ่น มี่ง หาย, เฒี้ยว ปุน ดาวิด ฮี่ง เจี๋ย.

14ฮนั้ง หน่าย, ดาวิด กุ๊น ก๋อม เหฑ่ง อิสะลาเอน เต่ย-ปูง หย่า เหว่ย นิ่น เญย หฒวัง แปะ ฝีง โหฒว หอบ, โหฒว แป้ง ฟิม.

15เสลุยา เญย ตอน, โยอาบ, โหฒว เก้า โฮล เจี๋ย เญย ต้ม แปง-เปย๊ย. อาหิลู้ด เญย ตอน, เยโฮซาฟัด, โหฒว เฟี้ย โซว-ตาน เญย เจียน.

16อาหิทู้บ เญย ตอน, สาโดก, เหธา อาบียาทา เญย ตอน, อาหิเมเล้ก, โหฒว ไซ เมี่ยน. ซาวะซา โหฒว โซว-ปิ๊ว.

17เยโฮยาดา เญย ตอน, เบไนยา, กุ๊น เคเลที เมี่ยน เหธา เพเล้ด เมี่ยน. ดาวิด เญย ตอน บัว ตุ๊ โหฒว เก้า โฮล เจี๋ย เญย เจียน.

← Chapter 17 Jump to: Chapter 19 →