1 Chronicles 27

Mien Bible (Thai Script) © Thailand Bible Society, 2007

← Chapter 26 Jump to: Chapter 28 →

1น้าย เซ อิสะลาเอน เมี่ยน เญย บั๋ว หฒิว นิ่น บัว เญย ปู้ง ป่วน เปย๊ย เฒ้ย เหธา กุ๊น เหยียด ธิน, กุ๊น เหยียด แป๊ะ เต้า แปง เญย เปย๊ย เฒ้ย. แอ๋ง ม่าย ฟู-สู ฮู่ง เตี๋ย เญย เจียน, ต้ง หลิ่ว เล์ย เบ่น หฮลา เจี๋ย หฮลา เฒี่ยง หฮญัง ทิ้ว เปียะ ธ้วด เญย แปง-กวั้น เญย หญู่งๆ สี่. กวั้นๆ แปง ม่าย อี หว่าน เปยย ธิน เต้า.

2ตะเยี้ยด หฮลา, ตะเยี้ยด กวั้น ม่าย สับดีเอน เญย ตอน, ยาโซเบอัม, โหฒว เปย๊ย เฒ้ย. นิ่น เญย กวั้น ม่าย อี หว่าน เปยย ธิน เต้า.

3นิ่น โหฒว เปเล้ด เญย เฒ้ย-ฟุน, เหว่ย ตะเยี้ยด หฮลา โหฒว หฒวัง แปง-เปย๊ย เญย ต้ม เปย๊ย เฒ้ย.

4อาโหไฮ เมี่ยน, โดได, กุ๊น ตะเหญ่ย หฮลา เญย แปง-กวั้น. มิกโล้ด โหฒว นิ่น เญย กวั้น เญย เปย๊ย เฒ้ย. นิ่น เญย กวั้น ม่าย อี หว่าน เปยย ธิน เต้า.

5ตะฟาม หฮลา, ตะฟาม กวั้น เญย เปย๊ย เฒ้ย เซ เยโฮยาดา ไซ เมี่ยน เญย ตอน, เบไนยา. นิ่น เญย กวั้น ม่าย อี หว่าน เปยย ธิน เต้า.

6เบไนยา เซ เหยียด เต้า วั้ว เต๋ย “ฟ่า เหฒียบ เต้า’ เฮ้น ไห่ เญย จุน-เฒ้ย เมี่ยน, ฒู้ง กุ๊น วั้ว เต๋ย “ฟ่า เหฒียบ เต้า.” นิ่น เญย ตอน, อัมมีซะบาด, โหฒว นิ่น เญย กวั้น เญย เปย๊ย เฒ้ย.

7ตะเฝย หฮลา, ตะเฝย กวั้น เญย เปย๊ย เฒ้ย เซ โยอาบ เญย โย์ว, อาสาเฮน. นิ่น เญย ตอน, เสบาดิยา, หฑิบ เจี๊ยน นิ่น โหฒว. นิ่น เญย กวั้น ม่าย อี หว่าน เปยย ธิน เต้า.

8ตะฮม์ หฮลา, ตะฮม์ กวั้น เญย เปย๊ย เฒ้ย ม่าย อิสะลา เมี่ยน, ซัมหุด. นิ่น เญย กวั้น ม่าย อี หว่าน เปยย ธิน เต้า.

9ตะหลัวะ หฮลา, ตะหลัวะ กวั้น เญย เปย๊ย เฒ้ย ม่าย เทโคอา เมี่ยน, อิกเขด เญย ตอน, อิละ. นิ่น เญย กวั้น ม่าย อี หว่าน เปยย ธิน เต้า.

10ตะเธี้ยด หฮลา, ตะเธี้ยด กวั้น เญย เปย๊ย เฒ้ย ม่าย เอฟาอิม ฝีง, เปโลน เมี่ยน, เฮเล้ดเท. นิ่น เญย กวั้น ม่าย อี หว่าน เปยย ธิน เต้า.

11ตะเป๊ด หฮลา, ตะเป๊ด กวั้น เญย เปย๊ย เฒ้ย เซ เฒลา เญย ปู้ง ป่วน, หุซา เมี่ยน, สิบเบไค. นิ่น เญย กวั้น ม่าย อี หว่าน เปยย ธิน เต้า.

12ตะจั๊ว หฮลา, ตะจั๊ว กวั้น เญย เปย๊ย เฒ้ย ม่าย เบนยามิน ฝีง, อานาโท้ด เมี่ยน, อาบีเยเซ. นิ่น เญย กวั้น ม่าย อี หว่าน เปยย ธิน เต้า.

13ตะเหฒียบ หฮลา, ตะเหฒียบ กวั้น เญย เปย๊ย เฒ้ย ม่าย เฒลา เญย ปู้ง ป่วน, เนโทฟา เมี่ยน, มาหะไล. นิ่น เญย กวั้น ม่าย อี หว่าน เปยย ธิน เต้า.

14เหฒียบ เยี้ยด หฮลา, เหฒียบ เยี้ยด วั้ว กวั้น เญย เปย๊ย เฒ้ย ม่าย เอฟาอิม ฝีง, ปิลาโทน เมี่ยน, เบไนยา. นิ่น เญย กวั้น ม่าย อี หว่าน เปยย ธิน เต้า.

15เหฒียบ เหญ่ย หฮลา, เหฒียบ เหญ่ย วั้ว กวั้น เญย เปย๊ย เฒ้ย ม่าย เนโทฟา เมี่ยน, โอดนีเอน เญย ปู้ง ป่วน, เฮนได. นิ่น เญย กวั้น ม่าย อี หว่าน เปยย ธิน เต้า.

16หลิ่ว เล์ย ฝีงๆ อิสะลาเอน เมี่ยน เญย เปย๊ย เฒ้ย ม่าย ฮนั้ง น้าย. ลูเบน ฝีง สิกลี เญย ตอน, เอลีเยเซ สิเมโอน ฝีง มาอาคา เญย ตอน, เซฟาทิยา

17เลวี ฝีง เคมูเอน เญย ตอน, ฮาซาปิยา อาโลน เญย เฒ้ย-ฟุน สาโดก

18ยูดา ฝีง เซ ดาวิด เญย เหยียด เต้า ก๋อ, เอลีฮู อิดสาคา ฝีง มีคาเอน เญย ตอน, โอมลี

19เสบูลุน ฝีง โอบาดี เญย ตอน, อิดไมอา นับทาลี ฝีง อัดลีเอน เญย ตอน, เยลีโม้ด

20เอฟาอิม ฝีง อาซาซิยา เญย ตอน, โฮเซยา มะนัดเส ด๊าม-ฝีง เปดายา เญย ตอน, โยเอน

21เยียม กิเลอาด เญย มะนัดเส เญย ด๊าม-ฝีง อิดโด เญย ตอน, เสคาลิยา เบนยามิน ฝีง อับเน เญย ตอน, ยาอาซีเอน

22ดาน ฝีง เยโลฮัม เญย ตอน, อาซาเลน น้าย เซ ฝีงๆ อิสะลาเอน เมี่ยน เญย เปย๊ย เฒ้ย.

23ดาวิด ไม้ ซ้าว หญี่ เหฒียบ หฮญัง กะเดี๊ย แหมง เญย มจั่ง ตอน เญย โสว โหม่ว เหว่ย หฒุ เฒี้ยว แล์ง ปุน อิสะลาเอน เมี่ยน ด่ง ลู่ง เญย เหฮลย ธั้ม.

24เสลุยา เญย ตอน, โยอาบ, เจี์ย กอน ซ้าว มป่า ซ้าว ไม้ เหฒียง. หลาย นิ่น ซ้าว แปะ ฝีง, อิสะลาเอน เมี่ยน หฒุ ทิน-ฮู่ง โน์ว. ซ้าว เญย โสว โหม่ว ไม้ ตุ๊ เฟี้ย เจี๊ยน ดาวิด เญย ฮู่ง โต้ว ตาน.

25อาดีเอน เญย ตอน, อัดมาเว้ด, โก๋ว ฮู่ง เตี๋ย เซียว จ๋าย เญย กะน้าย เญย ต๋อง. อุดซียา เญย ตอน, โยนาทาน, โก๋ว เซียว จ๋าย เญย กะน้าย เญย ต๋อง เยียม ต้ม ฒี่ง กะเหญี่ย แหมง เญย ฟิ้ว-มู้ง ฟิ้ว-ล์าง เหธา ล่าว.

26เคลู้บ เญย ตอน, เอสะลี, โก๋ว เหยียด ฒู้ง เยียม ลี่ง เต่ย โหฒว กง เญย เมี่ยน.

27ลามา เมี่ยน, ซิเมอี, โก๋ว เหยียด ฒู้ง อะหงุ่น หฮวีง. เซฟาม เมี่ยน, สับดี, โก๋ว เซียว เยียม อะหงุ่น หฮวีง ธ้วด ต้าย เญย อะหงุ่น ติ๊ว เญย ต๋อง.

28เกเด เมี่ยน, บาอันฮานัน, โก๋ว เยียม ไฟ ปูง เญย บง-จั๊วะ เญย กะลั้น เหธา ง่ง หญอ เปี๊ยว เญย เดี๋ยง. โยอาด หฒิว โก๋ว เซียว กะลั้น โย่ว เญย ต๋อง.

29ซาโลน เมี่ยน, ซิดไล, โก๋ว เยียม ซาโลน เญย เมี้ย-เธี้ยง เญย ง่ง กวั้น. อัดไล เญย ตอน, ซาฟัด, โก๋ว เยียม ฮ์อง ยู์ง เญย ง่ง กวั้น.

30อิสะมาเอน เมี่ยน, โอบิน, โก๋ว ล่อ ท่อ กวั้น. เมโลโน้ด เมี่ยน, เยดายา, โก๋ว ล่อ กวั้น.

31ฮากา เมี่ยน, ยาซี้ด, โก๋ว ปะกี ยู่ง กวั้น เหธา ยู่ง กวั้น. น้าย เต๋ย เหยียด ฒู้ง โหฒว หลิ่ว เล์ย ดาวิด ฮู่ง เญย จา-ตี้ง เญย เมี่ยน.

32ดาวิด เญย โย์ว-เตี๋ย, โยนาทาน, ม่าย ธง-เม่ง โหฒว ธ่าง ล่าง เญย เมี่ยน หย่า โหฒว โซว-ปิ๊ว. ฮักโมนี เญย ตอน, เยฮีเอน, โก๋ว ฮู่ง ตอน.

33อาหิโทเฟน หย่า โหฒว ฮู่ง เตี๋ย เญย ธ่าง ล่าง เมี่ยน. อานคี เมี่ยน, หุไซ, โหฒว ฮู่ง เญย ต่อย.

34อาหิโทเฟน ไต่ มี่ง, ฆะฮ้า ม่าย เบไนยา เญย ตอน, เยโฮยาดา เหธา อาบียาทา, หฑิบ เจี๊ยน โหฒว ธ่าง ล่าง เมี่ยน. โยอาบ โหฒว ฮู่ง เตี๋ย เญย จุน-แปง เญย ต้ม แปง-เปย๊ย.

← Chapter 26 Jump to: Chapter 28 →