Ecclesiastes 1

Mien Bible (Thai Script) © Thailand Bible Society, 2007

Jump to: Chapter 2 →

1น้าย เซ ดาวิด ฮู่ง เญย ตอน, เยียม เยลูซาเลม ฒี่ง เญย ฮู่ง วั้ว เต้า ธง-เม่ง ฟิน-แซง, ก๊อง เญย หว่า.

2ธง-เม่ง ฟิน-แซง ก๊อง, “ขูง-ม่อง, หฒะเก้ง! ขูง-ม่อง, หญู่งๆ ขูง-ม่อง.”

3เมี่ยน เยียม เสย หฒั่ง ล่าว หลุ่ย โค้ว, ปวัด ตุ๊ หาย หญู่ง หลง?

4ป้าม เมี่ยน เหยียด ต่อย เจี๋ย ลิ์ว, เหยียด ต่อย เถา, มป่า ป้าม เกน เหยียด ลิ์ว เยียม.

5บะฮนอย ธ้วด ต้าย, บะฮนอย แอ๋ง ด๊อด มี่ง, หย่า เซี้ยบๆ เญย หฑวน เถา นิ่น ธ้วด เญย ต๋อง.

6หฑยาว ป่วน มี่ง น่าม ปูง, กวิ้น หฑวน ป๊ะ ปูง, ป่วน กวิ้น มี่ง กวิ้น ต้าย, แอ๋ง ป่วน กัน โล์-เจ๊า หฑวน.

7ติ้วๆ โด๊ะ เหลี่ยว มี่ง กั๊บ ค้อย, มป่า ค้อย หย่า ไม้ ปวั๊ง. ววม เยียม หาย เหลี่ยว ต้าย, ฯฒฯ หฑวน วั้ว นอม โล์-ต๋อง.

8หม่าน สี่ ปุน เมี่ยน โค้ว, ฒู้ง ไม้ ไฮ่ ก๊อง ไม้ เหฑ่ง. มฒีง หมั่ง หย่า หมั่ง ไม้ เป๊ว, มน่อม หมวัง หย่า หมวัง ไม้ เก๋า.

9ธ้วด ต้าย เญย สี่ แอ๋ง อ๋อย ธ้วด หฑุ่น, ฒิ่น ด่าง โหฒว เจี๋ย เญย สี่ ฒู้ง แอ๋ง โหฒว. เยียม ลู่ง เดี๊ย ไม้ ม่าย หาย หญู่ง เซียง.

10ม่าย หาย หญู่ง ปุน เมี่ยน ไฮ่ ก๊อง, “หมั่ง ม่าะ! น้าย เซ เซียง เญย”? เยียม บัว ไม้ แก้ง ธ้วด เสย วั้ว หฒั่น, เฑี้ยว ฮนอย ฒู้ง ม่าย ต้าย เล่า อ๊ะ.

11อี้ จ๋า ฮนอย เญย เมี่ยน ไม้ จั๋ง โล์-ฮนอย เญย เมี่ยน. โฮ์ ต่อย เมี่ยน หย่า ฟี่ ฮนั้ง เญย, ไม้ จั๋ง อี้ จ๋า ฮนอย เญย เมี่ยน.

12เยีย, ธง-เม่ง ฟิน-แซง, เยียม เยลูซาเลม โหฒว เจี๋ย อิสะลาเอน เมี่ยน เญย ฮู่ง.

13เยีย เหลียบ เฮญี้ยว หล่ง ธง-เม่ง ฒ่า หมั่ง หย่า โหะ ฮิ้ว เยียม น้าย ลู่ง เดี๊ย โหฒว เญย หญู่งๆ สี่. ทิน-ฮู่ง ปุน ป้าม เมี่ยน กีง เจี๋ย เญย สี่ หฒะเก้ง อะ เญย, โค้ว เญย.

14เยีย ปวัด เยียม ลู่ง เดี๊ย โหฒว เญย หญู่งๆ สี่ เซ ขูง-ม่อง, ขูง ปุน หฑยาว สาว ฮนั้ง.

15เงา ฌ้วด เญย กะน้าย, ไม้ ไฮ่ ปุน หฒะ. หาย หญู่ง ธา, ไม้ เก๋า โสว โหม่ว, ไม้ ไฮ่ ซ้าว ปวั๊ง โสว โหม่ว.

16เยีย เยียม เฮญี้ยว ธ่อง ลิ์ว อ๊ะ, “เยีย เก้ง ม่าย ธง-เม่ง ฮลัง ไห่, ฒู้ง เก้า ธั้ม กุ๊น เจี๋ย เยลูซาเลม เญย เต้าๆ เมี่ยน. เยีย ตุ๊ กีง เจี๋ย ธง-เม่ง เหธา ว่วน ฒาง เญย สี่.”

17เยีย เหลียบ ตี่ง เฮญี้ยว อ๋อย เม่ง แปะ ธง-เม่ง เญย เจ๊า เหธา หฮงง เญย, ปู๊ ล่ง ปู๊ ตั๊ง เญย สี่. มป่า เยีย โหะ ฮิ้ว เญย เซ น้าย เต๋ย สี่, หย่า ขูง ปุน หฑยาว สาว ฮนั้ง.

18เหว่ย หฒุ เหยียด เฒย ม่าย ธง-เม่ง ธั้ม, เหยียด เฒย เฑ่า ฟ่าน ธั้ม. จา ม่าย ว่วน ฒาง, ฯฒฯ จา ม่าย โยว-เฑ่า.

Jump to: Chapter 2 →