Ecclesiastes 12

Mien Bible (Thai Script) © Thailand Bible Society, 2007

← Chapter 11 Jump to:

1หฮญัง- เจ๊ย หลุน เญย เฒี่ยง โห่, อ๋อย หฒุ จั๋ง เจี๊ยน เหฒย เม่ย ต้าย วั้ว เต้า. โค้ว หน่าน เญย ฮนอย-เหญียะ ไม้ แก้ง เถา, เม่ย ฒู้ง อ๋อย ก๊อง, “เยียม น้าย เต๋ย หฮญัง เญย ฮนอย-เหญียะ ไม้ ม่าย หาย หญู่ง เถง เยีย อะเฮน้ย.”

2ไม้ ตู๋ง ฒั้ว เถา บะฮนอย เหธา ฌัง, หฮลา เหธา เหฮลย หฮมวัง มี่ง, บยู่ง เหฑ่ง, บ๋วน หย่า หฑวน.

3วั้ว ฮนอย โก๋ว เปย๊า เญย เมี่ยน ซิน หฒิน, เมี่ยน เฮ้น เมี่ยน จ๊าย จุ๊ด, หม่อ บ๊วน เญย เมี่ยน ตี้ง เหฌี่ย เหว่ย หฒุ นิ่น บัว โหฒะ, หมั่ง ธ้วด ฟง ม่วน เญย เมี่ยน มฒีง ฮววน-ฮวา.

4ธ้วด วั้ว เจ๊า เญย แก้ง กวน เจี๊ยน, หม่อ บ๊วน เญย เฉีย หย่า ไฝ เจี๊ยน เหฌี่ย. เหนาะ เห่ว, เมี่ยน ฯฒฯ เจี์ย ซิน ต้าย, ป๋าว ฑูง เญย เซียะ ป๋าว ฑูง เฉีย ไฝ.

5เมี่ยน กั้ม เหฑีย ฮลัง เญย ต๋อง, เหธา เยียม เจ๊า หฒั่ง ม่าย เธี้ยว เญย สี่, อันมัน เดี๋ยง ฆอย เปี้ยง, จ๊บ-เหญ่ย ทอ กั้น เญย ซิน มี่ง, อ๋อย เญย เจ๊า หย่า ตั๋ง หมี่ อ๊ะ. เหว่ย หฒุ เมี่ยน มี่ง นิ่น เหยียด ลิ์ว เญย เปย๊า, เฑ่า เญี้ยม เญย เมี่ยน เยียม วั้ว เจ๊า มี่งๆ ต้ายๆ.

6วั้ว หฒั่น ญ่าน หลิ่ม ฯฒฯ ตั๋ง, เจียม-หฑ่อม หย่า บ๋าย, ฒ่าง ววม เญย แป้ง เยียม ววม-ฒี้ง ฮู้, เธีย ววม เยี่ยน เยียม ววม-ค้วด-ฑุ่ย หว่าย.

7เนีย-บูง หย่า หฑวน มี่ง เป๋น เนีย ฮนั้ง โล์ นอ, เท้า เญย เฉีย หย่า หฑวน มี่ง เถา เหธย เฉีย ต้าย เญย ทิน-ฮู่ง.

8ธง-เม่ง ฟิน-แซง ก๊อง, ขูง-ม่อง, ขูง-ม่อง. หญู่งๆ ขูง-ม่อง.

9ธง-เม่ง ฟิน-แซง ไม้ ตาน ม่าย ธง-เม่ง, นิ่น เฒาะ นิ่น เญย ว่วน ฒาง หฌาว หฒวัง เมี่ยน. นิ่น ธ่อง หย่า ชะ ฒ่า ล์อ หย่า เฒว่ย เยี้ยด เฒว่ย เหญ่ย เญย เฟี้ย ธั้ม-ติ้ว หว่า-เป๊ย.

10ธง-เม่ง ฟิน-แซง ล์อ ปุน เมี่ยน อะเฮน้ย หมวัง เญย หว่า, หย่า เฮญี้ยว หฒีง เญย เฟี้ย เฒียน เล์ย เญย หว่า.

11ธง-เม่ง เมี่ยน ก๊อง เญย หว่า ฮนั้ง หฒุ่น แซง-คู้ เญย ปย๊า. เซียว ฒุ้น ธง-เม่ง เมี่ยน เญย หว่า หย่า ฮนั้ง ตีง ตุ๊ เจี๊ยน เญย ตีง, เยียม เหยียด เต้า โก๋ว ปะกี ยู่ง เญย เมี่ยน ต้าย.

12เยีย เญย ตอน อ่า, ไม้ ตาน บัวะ น้าย. เม่ย อ๋อย หฒุ บู้ง หลง. เฟี้ย โซว ธั้ม ไม้ ไฮ่ จ่ม. โตะ โซว ธั้ม, ซิน หย่า โค้ว.

13น้าย เต๋ย เหยียด ฒู้ง สี่ ไฮ์ ลิ์ว อ๊ะ. อี้ หฒั่น ก๊อง เซ้ด เมว์ย หว่า. อ๋อย หฒุ กั้ม เหฑีย, ท่าย ทิน-ฮู่ง เอย เจี๊ยน นิ่น เญย เล์ย-หลัด โหฒว. น้าย เซ เหยียด ฒู้ง ป้าม เมี่ยน อ๋อย หฒุ โหฒว เญย ป่วน.

14เหว่ย หฒุ ป้าม เมี่ยน โหฒว เญย เหยียด ฒู้ง สี่, เลี่ยม ปี๋ง เจี๊ยน เญย สี่, ไม้ กุ๊น หลง ไฟ เธี้ยว, ทิน-ฮู่ง อ๋อย เซี้ยม เหฑ่ง.

← Chapter 11 Jump to: