Ecclesiastes 9

Mien Bible (Thai Script) © Thailand Bible Society, 2007

← Chapter 8 Jump to: Chapter 10 →

1เยีย ฯฒฯ เฒาะ น้าย เต๋ย เหยียด ฒู้ง สี่ เยียม เฮญี้ยว ธ่อง ฯฒฯ ฮิ้ว ตุ๊ คู้ เมี่ยน, ธง-เม่ง เมี่ยน เหธา นิ่น บัว โหฒว เญย สี่, เยียม ทิน-ฮู่ง เญย ปั์ว. มป่า ไม้ ม่าย หาย เต้า ฮิ้ว ตุ๊ นิ่น ไฮ่ ปวั้ง ฮนั้ม เญย ไฟ ฑอง เญย สี่.

2ฆะฮ้า ฮี้ง เต้าๆ ปวั้ง ฟี่ ฮนั้ง เญย. คู้ เมี่ยน เหธา เอ๊าะ เมี่ยน, เมี่ยน หลง เมี่ยน เหธา เมี่ยน หว่าย เมี่ยน, ธีง-เหฑ่ง เญย เหธา ม่าย หวุย เญย, ฝ่ง ห่อ เหฒี่ย เญย เหธา ไม้ ฝ่ง ห่อ เหฒี่ย เญย, หย่า ฟี่ ฮนั้ง. คู้ เมี่ยน ฮนั้ง หาย นอ, ฒุ์ย-เมี่ยน ฮนั้ง วั้ว นอ, โฮ้ว หว่า เญย เมี่ยน ฮนั้ง หาย นอ, ไม้ โฮ้ว หว่า เญย เมี่ยน หย่า ฮนั้ง วั้ว นอ.

3น้าย เซ เยียม เสย หฒั่ง เญย หญู่งๆ สี่ ม่าย เญย เหฒะ หน่าน. เหยียด ฒู้ง อ๋อย หฒุ ปวั้ง ฟี่ ฮนั้ง เญย. ป้าม เมี่ยน เญย เฮญี้ยว ม่าย เอ๊าะ สี่ ปวั๊ง เหฑ่ง. เฒี่ยง เจี๊ยน เญย เฒี่ยง โห่ เฮญี้ยว หย่า ปู๊ ล่ง ปู๊ ตั๊ง เญย. ฆะฮ้า นิ่น บัว ฯฒฯ ไต่.

4หาย เต้า เหธา เฒี่ยง เจี๊ยน เญย เมี่ยน เยียม, วั้ว เต้า ม่าย ลั่ม ฮนั้ม อ๊ะ. เฒี่ยง เจี๊ยน เญย จู๊ ฒู้ง เก้า หลง ไต่ มี่ง เญย เซี่ยน.

5เฒี่ยง เจี๊ยน เญย เมี่ยน ฮิ้ว ตุ๊ นิ่น บัว อ๋อย หฒุ ไต่ มป่า ไต่ มี่ง เญย เมี่ยน ไม้ ฮิ้ว หาย หญู่ง. นิ่น บัว ไม้ ไฮ่ แอ๋ง ตุ๊ ฒิบ ฒี่ง เหญ่ย. หฒวัง เมี่ยน หย่า หละคุ เหฑ่ง นิ่น บัว อ๊ะ.

6นิ่น บัว ฮนั้ม เญย, ฑอง เญย, นิ่น บัว เหมว่ย เจี๊ยะ เญย เหธา นิ่น บัว เหยียด เหฌี่ย หฒุ เหมียด เหฑ่ง. เยียม น้าย เสย โหฒว เญย เหยียด ฒู้ง สี่ นิ่น บัว เหยียด ลิ์ว ไม้ ม่าย นิ่น บัว เญย ป่วน อ๊ะ.

7กุ๊น มี่ง เฌียนๆ โย่วๆ เญย หญั่น เม่ย เญย หฮนาง, หย่า ออน-เหลาะ เญย ฮบ เม่ย เญย อะหงุ่น ติ๊ว, เหว่ย หฒุ ทิน-ฮู่ง ฒู้ง อะเฮน้ย เม่ย โหฒว เญย กง.

8เม่ย เญย ลุย-โหว อ๋อย หฒุ หฒั่นๆ แปะ, มฆ้อง หย่า อ๋อย หฒุ ฑ้าด เจี๊ยน โย่ว.

9เยียม เม่ย ขูง-ม่อง เญย ฮนอย-เหญียะ, เซ ทิน-ฮู่ง ปุน เม่ย เยียม น้าย เสย หฒั่ง เญย แหม่ง, เม่ย กุ๊น เหธา เม่ย ฮนั้ม เญย เอ๊า เฌียน-โย่ว เญย เยียม, เหว่ย หฒุ น้าย เซ เม่ย เยียม ลู่ง เดี๊ย ล่าว หลุ่ย โหฒว กง ตุ๊ เญย ป่วน.

10ตะฟ่าน เม่ย เญย ปั์ว ล์อ ปวัด หาย หญู่ง โหฒว, กุ๊น หล่ง ชะ โหฒว, เหว่ย หฒุ เยียม เยี่ยม เกน, ต้ง เม่ย อ๋อย หฒุ มี่ง เยียม เญย ต๋อง, ไม้ ม่าย กง โหฒว ไฟ ต๊า หฒะเอ๋ย เญย เจ๊า ไฟ ว่วน ฒาง ไฟ ธง-เม่ง.

11เยีย แอ๋ง ปวัด เยียม น้าย เสย หฒั่ง แอ๋ง ม่าย เหยียด หญู่ง เซ, สาย ถิว เญย เมี่ยน ไม้ ตุ๊ หฒั่นๆ ฮี่ง. เบ๊าะ จ๋า เฮ้น เญย เมี่ยน เบ๊าะ ต้ม จ๋า หย่า ไม้ ตุ๊ หฒั่นๆ ฮี่ง เจี๋ย, ธง-เม่ง เมี่ยน ไม้ ตุ๊ หฒั่นๆ ม่าย หฮนาง หญั่น. ไกว เญย เมี่ยน ไม้ ตุ๊ หฒั่นๆ ปุ๊ด ฒ่อย, ม่าย ปั้น เหฒ่ย เญย เมี่ยน ไม้ ตุ๊ เมี่ยน หฒั่นๆ อะเฮน้ย นิ่น บัว. มป่า เฒี่ยง โห่ เหธา ว่วน เฉีย เถา เต้าๆ เมี่ยน.

12เมี่ยน มต้าย ไม้ ฮิ้ว กั้น เญย เฒี่ยง โห่ หาย หฒั่น เถา. ฮนั้ง เบย์า หฒุ โตะ ไห่ เญย มู์ง เหฑ่น, ไฟ เหนาะ หฒุ โขว ฮลบ, เมี่ยน หย่า ฟี่ ฮนั้ง เญย หฒุ เธี้ยว ไห่ เญย เฒี่ยง โห่ ห่อย นิ่น บัว.

13เยีย แอ๋ง ปวัด เยียม เสย หฒั่ง ม่าย หญู่ง ธง-เม่ง เญย เจ๊า, เยีย หย่า ปวัด หย่าว ไห่.

14ม่าย นอม ฒี่ง ไฝ เญย, เยียม ฒี่ง กะญั์ว เญย เมี่ยน หย่า โหฒะ. แอ๋ง ม่าย เต้า ต้ม ฮู่ง เตี๋ย ต้าย เบ๊าะ ฯฒฯ เว่ย เจี๊ยน ฒี่ง, หย่า เหลียบ เบ๊าะ จ๋า เญย จา-สี่ เว่ย ก๋อม.

15มป่า ฒี่ง กะญั์ว ม่าย เต้า ธง-เม่ง เญย เมี่ยน จ่ม เมี่ยน. นิ่น หล่ง นิ่น เญย ธง-เม่ง เหฌียว วั้ว นอม ฒี่ง, มป่า ไม้ ม่าย หาย เต้า จั๋ง วั้ว เต้า เมี่ยน จ่ม เมี่ยน.

16เยีย ฯฒฯ ก๊อง, “ธง-เม่ง เซ เก้า หลง เจี๋ย ชะ.” มป่า วั้ว เต้า เมี่ยน จ่ม เมี่ยน เญย ธง-เม่ง หฒุ เมี่ยน หมั่ง เผีย. นิ่น เญย หว่า หย่า ไม้ ม่าย เมี่ยน หมวัง.

17หมวัง ธง-เม่ง เมี่ยน ก๊อง หว่า-ไฝ, เซ เก้า หลง หมวัง กุ๊น เมี่ยน หฮงง เมี่ยน วั้ว เต้า เห่ว เญย เฉีย.

18ธง-เม่ง เซ เก้า หลง เบ๊าะ จ๋า เญย หวัวะ กิ่น, มป่า เหยียด เต้า ฒุ์ย-เมี่ยน ไฮ่ ป่าย หว่าย เหฒีย ตอ คู้ สี่.

← Chapter 8 Jump to: Chapter 10 →