Ecclesiastes 2

Mien Bible (Thai Script) © Thailand Bible Society, 2007

← Chapter 1 Jump to: Chapter 3 →

1เยีย เยียม เฮญี้ยว ฮนั้ม, “ต้าย ม่าะ! เยีย อ๋อย โหฒว เฌียน-โย่ว เหน่า หญิด เญย สี่ เสย หมั่ง ออน-เหลาะ ฮนั้ง หาย นอ.” มป่า ปวัด ฟี่ ฮนั้ง เญย เซ ขูง-ม่อง.

2เยีย ก๊อง เถา อ๋อย คู่ จั๊ด เญย เจ๊า เซ ปู๊ ล่ง ปู๊ ตั๊ง เญย สี่. โหฒว เฌียน-โย่ว เหน่า หญิด ฝู่ง ม่าย หาย หญู่ง ม่าย ลั่ม หล่ง?

3เยีย ฮนั้ม หมั่ง ก๋า, ฮนั้ง หาย นอ ไฮ่ ปั่ง อะหงุ่น ติ๊ว ปุน เยีย เญย ซิน คู่ เยียม, หย่า หล่ง ธง-เม่ง เญย เฮญี้ยว ต้อ, แอ๋ง หล่ง หฮงง เญย เจ๊า. เยีย อ๋อย ฮิ้ว ตุ๊ ป้าม เมี่ยน เยียม น้าย ลู่ง เดี๊ย นั้ง เญย เฒี่ยง โห่ โหฒว หาย หญู่ง เก้า หลง เจี๋ย.

4เยีย โหฒว ธั้ม-หญู่ง ต้ม กง. เยีย เหว่ย เยีย กั้น โหฒว เหฒีย นอม เปย๊า, หฒวัง เหฒีย ฑง อะหงุ่น เปี๊ยว.

5เยีย โหฒว เหฒีย นอม หฮวีง, เหฒีย นอม อะหฑย่าว เญย หฮวีง หย่า เยียม หน่าย กะญั์ว หฒวัง หญู่งๆ เปี๊ยว เญย เดี๋ยง.

6เยีย เว้ด เหฒีย นอม ววม-ฌ่าง เซียว ววม ยู์ง น้าย เต๋ย เดี๋ยง.

7เยีย ม์าย โน่ว เก๊า โน่ว เป์ย, หย่า ม่าย เยียม เยีย เญย เปย๊า ธ้วด เสย เญย โน่ว. เยีย แอ๋ง ม่าย ง่ง กวั้น, ยู่ง เหธา ปะกี ยู่ง กวั้น เก้า ธั้ม เจี๋ย เยียม เยลูซาเลม ด่าง เยีย วั้ว เต๋ย เหยียด ฒู้ง เมี่ยน.

8เยีย แอ๋ง เหว่ย กั้น เซียว เจียม ญ่าน, หย่า เซียว ผุย ฮู่ง เตี๋ย เหธา นอมๆ แซ้ง เญย ฒิ่น ฒ่อย. เยีย เหว่ย กั้น หย่า ม่าย ป๋าว ฑูง เญย มจั่ง มเซียะ, หย่า ม่าย จ๊า-เฒ่ย เอ๊า ธั้ม เญย, เหยียด ฒู้ง หฒิว มจั่ง ตอน เญย เฮญี้ยว อ๋อย หล่ง เญย.

9เยีย ฯฒฯ ตุ๊ โหฒว โฮล, เก้า โฮล เจี๋ย เยียม เยลูซาเลม ฒี่ง ด่าง เยีย วั้ว เต๋ย หฒวัง เมี่ยน. เยีย เญย ธง-เม่ง หธ่อ เยียม เจี๊ยน เยีย.

10เยีย เญย มฒีง ปวัด อ๋อย หล่ง หาย หญู่ง เยีย ไม้ แหง่ง, เยีย เญย เฮญี้ยว อ๋อย โหฒว หาย หญู่ง ตุ๊ เฌียน-โย่ว เยีย หย่า ไม้ ล่าน, เหว่ย หฒุ เยีย เญย เฮญี้ยว อะเฮน้ย ไห่ เยีย โหฒว เญย หญู่งๆ กง. น้าย เซ เยียม เยีย ล่าว หลุ่ย ตุ๊ ต้าย เญย ฒี่ง เหญ่ย.

11เยีย สัม หมั่ง เยีย เญย ปั์ว โหฒว เจี๋ย ต้าย เญย หญู่งๆ, เหธา เยีย ล่าว หลุ่ย โหฒว เญย เหยียด ฒู้ง กง, ฮิ้ว ตุ๊ เซ ขูง-ม่อง, ขูง ปุน หฑยาว สาว ฮนั้ง, เยียม น้าย เสย หฒั่ง ไม้ ไฮ่ ตุ๊ หาย หญู่ง หลง.

12เยีย แอ๋ง กั้น ฮนั้ม ติ่ว เจ๊า, เซ ธง-เม่ง เญย เจ๊า เหธา หฮงง เญย, ปู๊ ล่ง ปู๊ ตั๊ง เญย สี่. หฑิบ เจี๊ยน โหฒว ฮู่ง เญย เมี่ยน ไฮ่ โหฒว หาย หญู่ง ธ้วด ลิ์ว โหฒว เจี๋ย ต้าย เญย สี่?

13เยีย เฒียะ ตุ๊ ธง-เม่ง เก้า หลง โหฒว หฮงง เญย, ฮนั้ง ฌัง เก้า หลง หฮมวัง.

14ธง-เม่ง เมี่ยน เญย มฒีง ฌัง, มป่า เมี่ยน หฮงง เมี่ยน ยั่ง หฮมวัง กะญั์ว. ไม้ กุ๊น ฮนั้ง หน่าย, เยีย ปวัด ตุ๊ เม่ง เญย. อี ฮ่อง เมี่ยน ฒู้ง หฒุ ปวั้ง ฟี่ ฮนั้ง เญย.

15เยีย ฯฒฯ เยียม เฮญี้ยว ฮนั้ม, “เมี่ยน หฮงง เมี่ยน ปวั้ง เญย สี่ เยีย หย่า อ๋อย หฒุ ปวั้ง เญย. วั้ว หญู่ง เยีย ม่าย ธง-เม่ง ธั้ม เยีย ตุ๊ หาย หญู่ง หลง?” เยีย เยียม เฮญี้ยว ฮนั้ม, “น้าย หย่า ฟี่ ฮนั้ง เญย ขูง-ม่อง.”

16เหว่ย หฒุ ธง-เม่ง เมี่ยน เหธา เมี่ยน หฮงง เมี่ยน ฟี่ ฮนั้ง เญย ไม้ ม่าย เมี่ยน จั๋ง นิ่น บัว เล่า. โฮ์ ฆาง เญย ฮนอย-เหญียะ อี หญู่ง ฒู้ง หละคุ เหฑ่ง หมี่ อ๊ะ. ไม้ กุ๊น ไกว ไฟ หฮงง, เหยียด ฒู้ง หฒุ ไต่ ฟี่ ฮนั้ง เญย.

17เยีย ฯฒฯ ฑอง ไห่ แหม่ง, เหว่ย หฒุ เยียม ลู่ง เดี๊ย โหฒว เญย เหยียด ฒู้ง สี่ ขูง ปุน เยีย เฑ่า. เหยียด ฒู้ง เซ ขูง-ม่อง. ขูง ปุน หฑยาว สาว ฮนั้ง.

18เยีย ฑอง เยีย เยียม น้าย เสย หฒั่ง ล่าว หลุ่ย โหฒว เญย เหยียด ฒู้ง กง, เหว่ย หฒุ เยีย อ๋อย หฒุ เลี่ยว เจี๊ยน ปุน ฆะฮ้า เญย เมี่ยน.

19ม่าย หาย เต้า ฮิ้ว ตุ๊ วั้ว ล่าน เมี่ยน ไกว ไฟ หฮงง? มป่า นิ่น ตุ๊ กุ๊น เหฑ่ง เยีย หล่ง เยีย เญย ธง-เม่ง เยียม น้าย เสย หฒั่ง ล่าว หลุ่ย ตุ๊ ต้าย เญย เหยียด ฒู้ง. น้าย หย่า ฟี่ ฮนั้ง เญย ขูง-ม่อง.

20เยีย ฯฒฯ เหว่ย เยีย เยียม น้าย เสย หฒั่ง ล่าว หลุ่ย โหฒว เญย เหยียด ฒู้ง กง ไม้ ลั่ม ฮนั้ม ต๋อง อ๊ะ.

21เหว่ย หฒุ เมี่ยน หล่ง ธง-เม่ง, หล่ง ว่วน ฒาง, หล่ง ปั้น เหฒ่ย โหฒว นิ่น เญย กง, ฆะฮ้า อ๋อย หฒุ เลี่ยว เหฌี่ย ปุน กั้น เต้า ไม้ ด๊อด ชะ โหฒว เญย เมี่ยน. น้าย เซ ขูง-ม่อง หย่า หฒะเก้ง ไม้ หอบ.

22เมี่ยน เยียม เสย หฒั่ง เฮญี้ยว เฑ่า, เฮญี้ยว โค้ว เจี๊ยน ล่าว หลุ่ย โหฒว กง, นิ่น ตุ๊ หาย หญู่ง?

23เหว่ย หฒุ นิ่น เฒี่ยง เสย หฒั่ง เญย ฮนอย-เหญียะ นิ่น โหฒว กง, หฒุ มุน, หฒุ เฑ่า โค้ว. เลี่ยม ลู่ง ม์วน หฒั่น นิ่น เญย เฮญี้ยว หย่า ไม้ เฮ่น. น้าย หย่า ฟี่ ฮนั้ง เญย ขูง-ม่อง.

24เหว่ย ป้าม เมี่ยน ไม้ ม่าย หาย หญู่ง เก้า หลง หญั่น หย่า ฮบ, เหธา ล่าว หลุ่ย โหฒว กง ตุ๊ เฌียน-โย่ว. น้าย เยีย หย่า ปวัด เยียม ทิน-ฮู่ง เญย ปั์ว ต้าย.

25เมี่ยน ไม้ เขา ทิน-ฮู่ง, หาย เต้า ไฮ่ ตุ๊ หญั่น ไฟ ล์อ เฌียน-โย่ว เญย เจ๊า?

26เหว่ย หฒุ ทิน-ฮู่ง เหธย ธง-เม่ง, ว่วน ฒาง เหธา เฌียน-โย่ว ปุน หอบ นิ่น เญย เฮญี้ยว เญย เมี่ยน. มป่า ฒุ์ย-เมี่ยน นิ่น ปุน โหฒว กง โค้ว เซียว ฒุ้น, ดุย เจี๊ยน ฒิ่น ฒ่อย, จิว ปุน หอบ ทิน-ฮู่ง เญย เฮญี้ยว เญย เมี่ยน. น้าย ฟี่ ฮนั้ง เญย ขูง-ม่อง. ขูง ปุน หฑยาว สาว ฮนั้ง.

← Chapter 1 Jump to: Chapter 3 →