Ecclesiastes 5

Mien Bible (Thai Script) © Thailand Bible Society, 2007

← Chapter 4 Jump to: Chapter 6 →

1เม่ย มี่ง หฒั่ง ทิน-ฮู่ง เญย เปย๊า อ๋อย หฒุ ไฝ ฟิม. มี่ง ฟัด หมวัง เซ เก้า หลง เมี่ยน หฮงง เมี่ยน ฝ่ง ห่อ เหฒี่ย. นิ่น บัว ฒู้ง ไม้ ฮิ้ว นิ่น บัว โหฒว เญย เอ๊าะ สี่.

2เยียม ทิน-ฮู่ง เญย หฑะเฮมียน ไม้ ตู๋ง โหฒว เฮญี้ยว เป๊ะ, ไม้ ตู๋ง โหฒว ฑุ่ย เซี้ยบ ก๊อง หาย หญู่ง. ทิน-ฮู่ง เยียม กู้ หงว่าย ลู่ง, เม่ย เยียม กะเดี๊ย เดา, เหว่ย น้าย เม่ย อ๋อย หฒุ ก๊อง หว่า โหฒะ เญย.

3เหยียด เฒย ฮนั้ม ธั้ม, เหยียด เฒย ไฮ่ เบ๋ยๆ, เหยียด เฒย ก๊อง หว่า ธั้ม, เหยียด เฒย ไฮ่ ก๊อง ธ้วด หฮงง เญย หว่า.

4เม่ย แล์ง แหง่ง หว่า ปุน ทิน-ฮู่ง ไม้ ตู๋ง ไง่. อ๋อย หฒุ เซี้ยบๆ เญย จ๊าว ซูง. นิ่น ไม้ อะเฮน้ย เมี่ยน หฮงง เมี่ยน. อ๋อย หฒุ จ๊าว ซูง เม่ย แล์ง เญย แหง่ง หว่า.

5เม่ย ไม้ แล์ง หว่า เซ เก้า หลง แล์ง ลิ์ว หย่า ไม้ จ๊าว.

6ไม้ ตู๋ง ปุน เม่ย เญย ฑุ่ย โหฒว กอน ต้อ เม่ย ป์าม ฒุ์ย. หย่า ไม้ ตู๋ง ตอง เจี๊ยน ไซ เมี่ยน ก๊อง, “เยีย แล์ง เญย หว่า เยีย โฮ้ว ต่อง หมี่ อ๊ะ.” เหว่ย หาย ติ่ว ปุน ทิน-ฮู่ง เฉีย เจี์ย เม่ย ก๊อง เญย หว่า ฯฒฯ เหมียด เหฑ่ง เม่ย เญย ปั์ว โหฒว เญย กง?

7เบ๋ยๆ ธั้ม, ก๊อง หว่า ธั้ม เซ ฮนั้ม ไม้ เม่ง แปะ เญย สี่. มป่า อ๋อย หฒุ กั้ม เหฑีย, ท่าย ทิน-ฮู่ง.

8สี ก๊อง เยียม หาย นอม แซ้ง ปวัด เมี่ยน จ่ม เมี่ยน หฒุ เหฒย, เลี่ยม แป้ง ฟิม เหธา โหฒว หอบ เญย เจ๊า หฒุ ธ้าง มี่ง, ไม้ ตู๋ง บัวะ ฮ่อง. เหว่ย หฒุ เหยียด เต้า เจียน ม่าย เต้า เก้า โฮล ปู๋ง มฒีง หมั่ง. แอ๋ง ม่าย เต้า เก้า โฮล เจี๋ย ปู๋ง มฒีง หมั่ง นิ่น บัว อี เต้า.

9เดา-เป้ย ธ้วด เญย หญู่งๆ เซ เหว่ย หฒวัง เมี่ยน. ฮู่ง เตี๋ย กั้น หย่า ปั่ง เด่ย ตุ๊ หลง.

10ฮนั้ม ญ่าน เญย เมี่ยน, ญ่าน เหยียด ลิ์ว ไม้ เก๋า. ฮนั้ม ฒิ่น ฒ่อย เญย เมี่ยน, เหล่ย ฒิ่น เหยียด ลิ์ว ไม้ ปวั๊ง เฮญี้ยว. น้าย หย่า ขูง-ม่อง.

11กะน้าย จา ธั้ม, หล่ง เญย เมี่ยน หย่า จา ธั้ม. กะน้าย เญย เฒี้ยว ตุ๊ หาย หญู่ง ม่าย ลั่ม หล่ง, ธ้วด ลิ์ว ปุน มฒีง หมั่ง ฮนั้ง?

12ล่าว หลุ่ย เญย กง-เมี่ยน ไม้ กุ๊น นิ่น ตุ๊ หญั่น ธั้ม ไฟ โหฒะ, นิ่น เปว๋ย มฌ่อม คู้ เญย. มป่า ปุ๊ด-ฒ่อย เมี่ยน ม่าย กะน้าย ธั้ม ฯฒฯ ปุน นิ่น เปว๋ย ไม้ ฌ่อม.

13เยียม น้าย เสย หฒั่ง เยีย ปวัด ม่าย เหยียด หญู่ง เฮยี้ยน ไห่ เญย สี่. ม่าย เมี่ยน เซียว ฒิ่น ฒ่อย ธั้ม เถา ฒู้ง ห่อย หฒุ กั้น.

14นิ่น โหฒว แซง-เอ๋ย, นิ่น เญย ฒิ่น ฒ่อย ด๊อด เหฑ่ง. นิ่น ม่าย เต้า ตอน, หย่า ไม้ ม่าย เหยียด หญู่ง เลี่ยว นิ่น เญย ตอน.

15เมี่ยน ธ้วด เสย ฌัง ซิน เญย ต้าย, หย่า ฮนั้ง วั้ว นอ ฌัง ซิน เญย เกวย เสย. นิ่น ล่าว หลุ่ย โหฒว กง, นิ่น เญย ปั์ว หย่า ไม้ ไฮ่ ต้อ หาย หญู่ง มี่ง.

16น้าย หย่า เป๋น เหยียด หญู่ง เฮยี้ยน ไห่ เญย สี่. เมี่ยน ฮนั้ง หาย นอ ธ้วด เสย, นิ่น ฮนั้ง วั้ว นอ เกวย เสย. นิ่น ขูง เหว่ย หฑยาว ล่าว หลุ่ย ฮนั้ง, นิ่น ฯฒฯ ตุ๊ หาย หญู่ง?

17เยียม เสย หฒั่ง เญย ฮนอย-เหญียะ นิ่น ขูง เยียม หฮมวัง, ม่าย ขวน เฮญี้ยว เญย สี่ ธั้ม, ม่าย เหฒะ หน่าน ห่อย, หย่า ม่าย เฉีย เจี์ย เญย เจ๊า.

18เยีย ปวัด หอบ เญย, หลง เญย เซ เมี่ยน เยียม เสย หฒั่ง, ต้ง ทิน-ฮู่ง เหธย ปุน เญย ฮนอย-เหญียะ นั้ง เญย, อ๋อย หฒุ หญั่น หย่า ฮบ หย่า อะเฮน้ย นิ่น ล่าว หลุ่ย โหฒว เญย กง, เหว่ย หฒุ น้าย เป๋น นิ่น เญย ป่วน.

19แอ๋ง ม่าย หญู่ง. สี ก๊อง ทิน-ฮู่ง ปุน เมี่ยน ปุ๊ด ฒ่อย, เป๋น เญย, หย่า ปุน นิ่น อะเฮน้ย หล่ง, ฒิบ เป๋น นิ่น เญย ป่วน, อะเฮน้ย นิ่น ล่าว หลุ่ย โหฒว เญย กง, น้าย เซ ทิน-ฮู่ง เญย ฒี่ง เหญ่ย.

20นิ่น ไม้ หฒุ ฮนั้ม ธั้ม เถา กั้น เฒี่ยง เญย ฮนอย-เหญียะ, เหว่ย หฒุ ทิน-ฮู่ง ปุน นิ่น เญย เฮญี้ยว เฌียน-โย่ว.

← Chapter 4 Jump to: Chapter 6 →